ಸಾಂಬಾರ ಬೆಳೆಯಲ್ಲಿ ರೈತರು ಸ್ವಾವಲಂಬಿ ಬದುಕು ಕಂಡುಕೊಳ್ಳಬೇಕು ಎಂಬ ಧ್ಯೇಯದಿಂದ ಆರಂಭಗೊಂಡ ಸಹ್ಯಾದ್ರಿ ಕಾಫಿ ಸಹಕಾರ ಸಂಘ ೨೫ ವರ್ಷಗಳನ್ನು ಪೂರೈಸಿದೆ. ಮಡಸೂರು ಲಿಂಗದಹಳ್ಳಿಯ ಮಹಾಬಲೇಶ್ವರ ಅವರ ಕನಸುಗಳಲ್ಲಿ ಕೆಲವನ್ನಾದರೂ ಸಾರ್ಥಕಗೊಳಿಸಿರುವ ಸಂಸ್ಥೆ ಈ ವರ್ಷ ಬೆಳ್ಳಿ ಹಬ್ಬದ ನೆಲೆಯಲ್ಲಿ ಸಾಗರದಲ್ಲಿ ಕಾಫಿ ಮಂಡಳಿ ಶಾಖೆ ಆರಂಭ ಸೇರಿದಂತೆ ಗುರುತರ ಹೆಜ್ಜೆಗಳನ್ನು ದಾಖಲಿಸಲು ನಿರ್ಧರಿಸಿದೆ ಎಂದು ಸಹ್ಯಾದ್ರಿ ಕಾಫಿ ಸಹಕಾರ ಸಂಘ ಎಸ್‌ಹೆಚ್‌ಸಿಎಫ್‌ಆರ್‌ಡಿಎಂ ಕೋಸ್ ಅಧ್ಯಕ್ಷ ಎಂ.ಬಿ.ಚಂದ್ರಶೇಖರ, ಮಗೆಕೊಪ್ಪ ತಿಳಿಸಿದರು.
ನಗರದ ನಗರೇಶ್ವರ ದೇವಸ್ಥಾನದ ವಿನಾಯಕ ಸಭಾಂಗಣದಲ್ಲಿ ಆಯೋಜಿಸಿದ್ದ ಸಂಸ್ಥೆಯ ೨೫ನೇ ವರ್ಷದ ವಾರ್ಷಿಕ ಸರ್ವಸದಸ್ಯರ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ಬರುವ ವರ್ಷದಲ್ಲಿ ಸಾಗರದಲ್ಲಿ ಕಾಫಿ ವಿಸ್ತೀರ್ಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಸಾಗರದಲ್ಲಿಯೇ ಕಾಫಿ ಮಂಡಳಿ ಶಾಖೆ ತೆರೆಯಲು ಇನ್ನೊಂದು ಪ್ರಯತ್ನ ಮಾಡಲಾಗುವುದು. ಪ್ರಸ್ತುತ ಕೇಂದ್ರ ಸಾಂಬಾರು ಮಂಡಳಿಗೆ ಸದಸ್ಯರಾಗಿ ನಮ್ಮ ಭಾಗದ ಪ್ರಸನ್ನ ಕೆರೆಕೈ ಆಯ್ಕೆಯಾಗಿರುವುದು ಈ ನಿಟ್ಟಿನಲ್ಲಿ ಸಹಕಾರಿ ಆಗಲಿದೆ ಎಂದರು.
ಸಂಸ್ಥೆ ಹಲವು ಯೋಜನೆಗಳನ್ನು ಹಾಕಿಕೊಂಡಿದೆ. ಷೇರು ಸಂಖ್ಯೆಯನ್ನು ಹೆಚ್ಚಿಸುವುದರ ಜೊತೆಗೆ ಸಾಂಬಾರು ಪದಾರ್ಥಗಳ ಖರೀದಿ, ಮಾರಾಟದ ಜಾಲವನ್ನು ವಿಸ್ತರಿಸುವುದು, ತೆಂಗಿನ ಉತ್ತಪನ್ನಗಳ ಖರೀದಿ, ಸಂಸ್ಕರಣೆ, ಮಾರಾಟಕ್ಕೆ ಒತ್ತು ನೀಡುವುದು, ಕಾಫಿ ಬೆಳೆಗಾರರಿಗೆ ಹೆಚ್ಚಿನ ಮಾರ್ಗದರ್ಶನ, ಕಾಫಿ ಬೀಜದ ವ್ಯವಸ್ಥಿತ ಟೆಂಡರ್ ಮೊದಲಾದ ಚಟುವಟಿಕೆಗಳನ್ನು ಇನ್ನಷ್ಟು ಬಲಪಡಿಸಲಿದ್ದೇವೆ ಎಂದರು.
ಸಂಸ್ಥೆ ನೂತನವಾಗಿ ತೆಂಗಿನ ಎಣ್ಣೆ ತೆಗೆಯುವ ಯಂತ್ರವನ್ನು ಅಳವಡಿಸಿದೆ. ಚಿಕ್ಕಮಗಳೂರಿನ ಸಹ್ಯಾದ್ರಿ ಶ್ರೇಣಿಯಲ್ಲಿ ಬೆಳೆದ ಕಾಫಿ ಬೀಜದಿಂದ ತಯಾರಿಸಿದ ಅತ್ಯುತ್ತಮ ಗುಣಮಟ್ಟದ ಸಹ್ಯಾದ್ರಿ ಗೋಲ್ಡ್ ಕಾಫಿಯನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ರಿಯಾಯ್ತಿ ದರದಲ್ಲಿ ಜಾತಿಯ ಕಾಫಿ ಗಿಡಗಳು ಸಂಘದಲ್ಲಿ ಲಭ್ಯವಿದೆ. ಸಂಘದ ಪ್ರಾಡಕ್ಟ್‌ಗಳನ್ನು ಸದಸ್ಯರು ಹಾಗೂ ಸಾಗರದ ಜನತೆ ಬಳಸಿಕೊಳ್ಳುವ ಮೂಲಕ ಸಹಕಾರಿ ವ್ಯವಸ್ಥೆಯನ್ನು ಬಲಪಡಿಸಿದರೆ ಸಂಘ ತಾನೇತಾನಾಗಿ ಬಲವರ್ಧಿಸುತ್ತದೆ ಎಂದರು.
ಸಂಸ್ಥೆಯ ಉಪಾಧ್ಯಕ್ಷ ರಾಘವೇಂದ್ರ ಕೆ.ಎಸ್., ನಿರ್ದೇಶಕರಾದ ಸೂರ್ಯನಾರಾಯಣ ಬ್ಯಾಗಡಿಪಾಲು, ಮಯೂರ ಕುಗ್ವೆ, ದಯಾನಂದ ಗೌಡ, ನಾಗೇಂದ್ರ ಎಚ್., ಎಸ್.ಕುಮಾರ, ವಿಜಯಲಕ್ಷ್ಮಿ, ಶಾಂತಕುಮಾರಿ ಬೇದೂರು ಇನ್ನಿತರರು ಇದ್ದರು. ಇದೇ ಸಂದರ್ಭದಲ್ಲಿ ವಾರ್ಷಿಕ ಗರಿಷ್ಠ ವ್ಯಾಪಾರ ಮಾಡಿದ ವೆಂಕಟೇಶ್ ಕವಲಕೋಡು ಅವರನ್ನು ಗೌರವಿಸಲಾಯಿತು. ವಿಜಯಲಕ್ಷ್ಮಿ ಪ್ರಾರ್ಥಿಸಿದರು. ಹಂಗಾಮಿ ಸಿಇಓ ಅಶ್ವಿನಿ ಹೆಗಡೆ ವರದಿ ಮಂಡಿಸಿದರು. ಸಹಜಾನಂದ ಎಂ.ಎಂ. ಸ್ವಾಗತಿಸಿದರು. ಬಿ.ಎನ್.ನಾಗರಾಜ ವಂದಿಸಿದರು.

ಪ್ರತಿ ವರ್ಷದಂತೆ ಈ ಬಾರಿಯೂ ಜಿಲ್ಲಾ ಕನ್ನಡ ಸಾಹಿತ್ಯ ಸಾಂಸ್ಕೃತಿಕ ವೇದಿಕೆ ಹಾಗೂ ಶ್ರೀ ಆದಿಚುಂಚನಗಿರಿ ಮಹಾಸಂಸ್ಥಾನ ಮಠದ ಶಿವಮೊಗ್ಗ ಶಾಖೆಯ ನೇತೃತ್ವದಲ್ಲಿ ದಸರಾ ರಾಜ್ಯ ಮಟ್ಟದ ಕವಿಗೋಷ್ಠಿಆಯೋಜಿಸಲಾಗುತ್ತಿದೆ.

ವರ್ತಮಾನದ ಹಲವು ಸಾಮಾಜಿಕ ಸಮಸ್ಯೆಗಳು ಹಾಗೂ ಜನರ ತಲ್ಲಣಗಳಿಗೆ ಕವಿಗಳು ತಮ್ಮ ಕವನಗಳ ಮೂಲಕ ಧ್ವನಿಯಾಗುವಂತೆ ಕನ್ನಡ ಸಾಹಿತ್ಯ ಪರಿಷತ್ತು ಅಧ್ಯಕ್ಷರು ಹಾಗೂ ಜಿಲ್ಲಾ ಕನ್ನಡ ಸಾಹಿತ್ಯ ಸಾಂಸ್ಕೃತಿಕ ವೇದಿಕೆಯ ಅಧ್ಯಕ್ಷರಾದ ಡಿ. ಮಂಜುನಾಥ ಅವರು ಮನವಿ ಮಾಡಿದ್ದಾರೆ.

ಪಶ್ಚಿಮ ಘಟ್ಟಗಳ ಸಂರಕ್ಷಣೆ, ಕಸ್ತೂರಿ ರಂಗನ್ ವರದಿ, ಶರಾವತಿ ಪಂಪ್ಡ್ ಸ್ಟೋರೇಜ್ ಯೋಜನೆ, ಬರದ ಸಂಕಷ್ಟ, ಜನಸಾಮಾನ್ಯರ ಬದುಕು, ಸರ್ಕಾರದ ಯೋಜನೆಗಳು, ನಿರುದ್ಯೋಗ ಹಾಗೂ ಯುವಜನರ ತಲ್ಲಣ ಸೇರಿದಂತೆ ಹಲವು ವಿಚಾರಗಳನ್ನು ಕವನಗಳ ಮೂಲಕ ಅಭಿವ್ಯಕ್ತಪಡಿಸುವಂತೆ ಅವರು ಕೋರಿದ್ದಾರೆ.

ಅದೇ ರೀತಿ, ದ್ವಿಭಾಷಾ ನೀತಿಯ ಹೆಸರಿನಲ್ಲಿ ಕನ್ನಡ ಭಾಷೆಗೆ ಆಗುತ್ತಿರುವ ಅನ್ಯಾಯ, ಇಂಗ್ಲಿಷ್ ಭಾಷೆಯ ಮೇಲಿನ ಅತಿಯಾದ ವ್ಯಾಮೋಹ ಹಾಗೂ ವಿಶ್ವಾಸಾರ್ಹತೆ ಕಳೆದುಕೊಳ್ಳುತ್ತಿರುವ ಸ್ಪರ್ಧಾತ್ಮಕ ಪರೀಕ್ಷೆಗಳ ಕುರಿತು ಕೂಡ ಕವಿಗಳು ತಮ್ಮ ಚಿಂತನೆಗಳನ್ನು ಕವನದ ಮೂಲಕ ವ್ಯಕ್ತಪಡಿಸಬಹುದು ಎಂದು ತಿಳಿಸಿದ್ದಾರೆ.

ಹೊಸ ತಲೆಮಾರಿನ ಸೃಜನಶೀಲ ಮನಸ್ಥಿತಿಗೆ ಸಾಹಿತ್ಯವೇ ಭರವಸೆಯಾಗಬೇಕು. ಈ ಹಿನ್ನೆಲೆಯಲ್ಲಿ ಎಳೆಯರಿಂದ ಹಿರಿಯರವರೆಗೆ ಎಲ್ಲರೂ ಕವಿಗೋಷ್ಠಿಯಲ್ಲಿ ಭಾಗವಹಿಸಿ ತಮ್ಮ ಕವನಗಳನ್ನು ವಾಚಿಸಲು ಅವಕಾಶ ಕಲ್ಪಿಸಲಾಗಿದೆ ಎಂದು ಡಿ. ಮಂಜುನಾಥ ತಿಳಿಸಿದ್ದಾರೆ.

ಕವಿಗಳು ತಮ್ಮ ಕವನಗಳ ಜೊತೆಗೆ ಹೆಸರು, ವಿಳಾಸ ಹಾಗೂ ದೂರವಾಣಿ ಸಂಖ್ಯೆಯನ್ನು ನಮೂದಿಸಿ, ಸೆಪ್ಟೆಂಬರ್ 30ರೊಳಗೆ ಡಿ. ಮಂಜುನಾಥ, ಅಧ್ಯಕ್ಷರು, ಕನ್ನಡ ಸಾಹಿತ್ಯ ಪರಿಷತ್ತು, ಆರ್.ಟಿ.ಓ. ಕಚೇರಿ ರಸ್ತೆ, ಶಿವಮೊಗ್ಗ ಇವರಿಗೆ ತಲುಪಿಸುವಂತೆ ಕೋರಲಾಗಿದೆ.

2026-27 ನೇ ಸಾಲಿನ ‘ಪ್ರಧಾನಮಂತ್ರಿ ಕೃಷಿ ಸಿಂಚಾಯಿ ಯೋಜನೆ’ಯಡಿ ತೋಟಗಾರಿಕೆ ಬೆಳೆಗಳಲ್ಲಿ ನೀರಿನ ಬಳಕೆಯ ದಕ್ಷತೆಯನ್ನು ಹೆಚ್ಚಿಸುವ ಉದ್ದೇಶದಿಂದ, ‘ಪ್ರತಿ ಹನಿಗೆ ಅಧಿಕ ಬೆಳೆ’ ಕಾರ್ಯಕ್ರಮದ ಮೂಲಕ ಹನಿ ಹಾಗೂ ತುಂತುರು ನೀರಾವರಿ ಪದ್ಧತಿ ಅಳವಡಿಸಿಕೊಳ್ಳಲು ಸಹಾಯಧನ ನೀಡಲಾಗುತ್ತಿದೆ.
ಸಹಾಯಧನದ ವಿವರ: 5ಎಕರೆವರೆಗಿನ ಪ್ರದೇಶಕ್ಕೆ ಶೇಕಡಾ 90 ರಷ್ಟು ಹಾಗೂ 5 ಎಕರೆ ಮೇಲ್ಪಟ್ಟ ಪ್ರದೇಶಕ್ಕೆ ಶೇಕಡಾ 45 ರ ದರದಲ್ಲಿ ಗರಿಷ್ಠ12.50 ಎಕರೆ ಪ್ರದೇಶದವರೆಗೆ ಸಹಾಯಧನ ನೀಡಲಾಗುವುದು.
ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಹಾಗೂ ಇತರೆ ಎಲ್ಲಾ ವರ್ಗಗಳ ಆಸಕ್ತ ರೈತರು ಈ ಸೌಲಭ್ಯವನ್ನು ಪಡೆಯಬಹುದು.
ಮರು ಅಳವಡಿಕೆಗೆ ಅವಕಾಶ: ಈಗಾಗಲೇ 7 ವರ್ಷಗಳ ಹಿಂದೆ ಸೂಕ್ಷ್ಮ ನೀರಾವರಿ ಪದ್ಧತಿಯನ್ನು ಅಳವಡಿಸಿಕೊಂಡು ಸಹಾಯಧನ ಪಡೆದಿದ್ದು, ಪ್ರಸ್ತುತ ಉಪಕರಣಗಳು ಹಾಳಾಗಿದ್ದರೆ ಅಂತಹ ರೈತರು ಸಹ ಪುನಃ ಸಹಾಯಧನ ಪಡೆಯಲು ಅರ್ಹರಿರುತ್ತಾರೆ.
ಸಹಾಯಧನವನ್ನು ಯೋಜನೆಯ ಮಾರ್ಗಸೂಚಿ, ಅನುದಾನದ ಲಭ್ಯತೆ ಹಾಗೂ ಜೇಷ್ಠತೆಯ ಆಧಾರದ ಮೇಲೆ ನೀಡಲಾಗುವುದು. ಹೆಚ್ಚಿನ ಮಾಹಿತಿಗಾಗಿ ರೈತರು ತಮ್ಮ ಹೋಬಳಿ ಅಥವಾ ತಾಲೂಕು ಮಟ್ಟದ ತೋಟಗಾರಿಕಾ ಕಚೇರಿಯನ್ನು ಸಂಪರ್ಕಿಸಬಹುದೆಂದು‌ ತೋಟಗಾರಿಕೆ ಜಂಟಿ ನಿರ್ದೇಶಕರು ತಿಳಿಸಿದ್ದಾರೆ.

Klive Special Article ಕರ್ನಾಟಕದ ಗ್ರಾಮೀಣ ಆರ್ಥಿಕತೆಯಲ್ಲಿ ಪಶುಪಾಲನೆ ಪ್ರಮುಖ ಪಾತ್ರ ವಹಿಸುತ್ತದೆ. ಕೃಷಿಯ ಜೊತೆಗೆ ಹೈನುಗಾರಿಕೆ ಮತ್ತು ಪಶುಪಾಲನೆಯನ್ನೇ ಜೀವನಾಧಾರವಾಗಿಸಿಕೊಂಡಿರುವ ಸಾವಿರಾರು ಕುಟುಂಬಗಳಿಗೆ ಜಾನುವಾರುಗಳು ಆರ್ಥಿಕ ಭದ್ರತೆಯ ಪ್ರಮುಖ ಆಧಾರವಾಗಿವೆ. ಹೀಗಾಗಿ ಜಾನುವಾರುಗಳಿಗೆ ಅಗತ್ಯ ಪ್ರಮಾಣದಲ್ಲಿ ಗುಣಮಟ್ಟದ ಮೇವು ಲಭ್ಯವಾಗುವಂತೆ ಮಾಡುವುದು ರೈತರ ಹಿತದೃಷ್ಟಿಯಿಂದ ಅತ್ಯಂತ ಮಹತ್ವದ್ದಾಗಿದೆ.
ರಾಜ್ಯದಲ್ಲಿ ಪ್ರಸಕ್ತ ಮಳೆಯ ಪ್ರಮಾಣ ಕಡಿಮೆಯಾಗಿರುವ ಹಿನ್ನೆಲೆಯಲ್ಲಿ ಜಾನುವಾರುಗಳಿಗೆ ಅಗತ್ಯವಿರುವ ಹಸಿರು ಮೇವು ಲಭ್ಯತೆ ರೈತರಿಗೆ ಮಾತ್ರವಲ್ಲದೆ ಸರ್ಕಾರಕ್ಕೂ ಪ್ರಮುಖ ಸವಾಲಾಗಿದೆ. ಪಶುಪಾಲನೆಯ ಮೇಲೆ ಅವಲಂಬಿತರಾಗಿರುವ ರೈತರ ಜೀವನೋಪಾಯಕ್ಕೆ ಜಾನುವಾರುಗಳ ಆರೋಗ್ಯ ಮತ್ತು ಉತ್ಪಾದಕತೆ ಅತ್ಯಂತ ಮುಖ್ಯವಾಗಿದ್ದು, ಅದಕ್ಕೆ ಗುಣಮಟ್ಟದ ಮೇವು ನಿರಂತರವಾಗಿ ದೊರೆಯುವುದು ಅಗತ್ಯ.
ಸಾಮಾನ್ಯವಾಗಿ ಮೇವು ಹುಲ್ಲಿನ ಬೀಜಗಳನ್ನು ಬಿತ್ತನೆಮಾಡಿದ ನಂತರ ಉತ್ತಮ ಪ್ರಮಾಣದಲ್ಲಿ ಹಸಿರುಮೇವು ಪಡೆಯಲು ಸುಮಾರು50 ರಿಂದ 60 ದಿನಗಳ ಅವಧಿ ಬೇಕಾಗುತ್ತದೆ. ಮಳೆಯ ಕೊರತೆ ಮತ್ತು ನೀರಿನ ಲಭ್ಯತೆ ಕಡಿಮೆಯಾಗಿರುವ ಸಂದರ್ಭದಲ್ಲಿಇಂತಹ ಸಾಂಪ್ರದಾಯಿಕ ಮೇವು ಬೆಳೆಗಳ ಮೇಲೆ ಮಾತ್ರ ಅವಲಂಬಿಸುವುದು ರೈತರಿಗೆ ಕಷ್ಟಕರವಾಗಬಹುದು. ಹೀಗಾಗಿ ಕಡಿಮೆ ನೀರಿನಲ್ಲಿ, ಕಡಿಮೆ ಸ್ಥಳದಲ್ಲಿ ಮತ್ತು ಕಡಿಮೆ ಅವಧಿಯಲ್ಲಿ ಪೌಷ್ಟಿಕಾಂಶಯುಕ್ತ ಮೇವನ್ನು ಉತ್ಪಾದಿಸುವ ಪರ್ಯಾಯ ತಂತ್ರಜ್ಞಾನಗಳನ್ನು ಉತ್ತೇಜಿಸುವ ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ಅಜೋಲಾ (Azolla) ಒಂದು ಗಮನಾರ್ಹ ಪರ್ಯಾಯ ಪೂರಕ ಮೇವು ಸಂಪನ್ಮೂಲವಾಗಿದೆ.
ಹಾಲು ಕೊಡುವ ಹಸುಗಳು ಸೇರಿದಂತೆ ಜಾನುವಾರುಗಳಲ್ಲಿ ಅಜೋಲಾವನ್ನು ಪೂರಕ ಆಹಾರವಾಗಿ ಬಳಸುವ ಕುರಿತು ಹಲವು ಅಧ್ಯಯನಗಳು ನಡೆದಿವೆ. ಸೂಕ್ತ ಪ್ರಮಾಣದಲ್ಲಿ ನೀಡಿದಾಗ ಪೌಷ್ಟಿಕಾಂಶಗಳ ಸೇವನೆ, ಆಹಾರದ ಬಳಕೆ ಹಾಗೂ ಕೆಲವು ಸಂದರ್ಭಗಳಲ್ಲಿ ಬೆಳವಣಿಗೆ ಮತ್ತು ಹಾಲಿನ ಉತ್ಪಾದನೆಯಲ್ಲಿ ಸುಧಾರಣೆ ಕಂಡುಬಂದಿರುವುದನ್ನು ಉಲ್ಲೇಖಿಸಲಾಗಿದೆ. ಇದರ ಪರಿಣಾಮವು ಜಾನುವಾರುಗಳ ಜಾತಿ, ಆಹಾರದಲ್ಲಿ ಸೇರಿಸುವ ಪ್ರಮಾಣ, ಒಟ್ಟಾರೆ ಆಹಾರದ ಸಂಯೋಜನೆ ಮತ್ತು ಅಜೋಲಾದ ಗುಣಮಟ್ಟದ ಮೇಲೆ ಅವಲಂಬಿತವಾಗಿರುತ್ತದೆ. ಹೀಗಾಗಿ ರೈತರಿಗೆ ಅಜೋಲಾ ಉತ್ಪಾದನೆಯ ಕುರಿತು ವೈಜ್ಞಾನಿಕ ತರಬೇತಿ ಮತ್ತು ಸೂಕ್ತ ಆಹಾರ ನಿರ್ವಹಣೆಯ ಮಾರ್ಗದರ್ಶನ ನೀಡುವುದು ಮುಖ್ಯವಾಗಿದೆ. ಕಡಿಮೆ ನೀರಿನಲ್ಲಿ ಹೆಚ್ಚಿನ ಪೌಷ್ಟಿಕಾಂಶ
ಅಜೋಲಾ ನೀರಿನಲ್ಲಿ ತೇಲುವ ಸಣ್ಣ ಜಲಸಸ್ಯವಾಗಿದ್ದು, ಅತ್ಯಂತ ವೇಗವಾಗಿ ಬೆಳೆಯುವ ಸಾಮರ್ಥ್ಯ ಹೊಂದಿದೆ. ಪ್ರೋಟೀನ್, ಖನಿಜಾಂಶಗಳು, ಜೀವಸತ್ವಗಳು ಹಾಗೂ ಅಗತ್ಯ ಅಮೈನೋಆಮ್ಲಗಳನ್ನು ಹೊಂದಿರುವ ಕಾರಣ ಇದನ್ನು ಜಾನುವಾರುಗಳ ಆಹಾರದಲ್ಲಿ ಪೂರಕವಾಗಿ ಬಳಸುವ ಸಾಧ್ಯತೆಯಿದೆ. ಅಜೋಲಾದೊಂದಿಗೆ ಸಹಜೀವನ ಹೊಂದಿರುವ Anabaena azollae ಎಂಬನೈಟ್ರೋಜನ್ ಸ್ಥೀರೀಕರಿಸುವ ಸಯನೋಬ್ಯಾಕ್ಟೀರಿಯಾವು ಅದರ ವೇಗವಾದ ಜೈವಿಕ ಬೆಳವಣಿಗೆಗೆ ಸಹಕಾರಿಯಾಗಿದೆ.
ಅಜೋಲಾದಲ್ಲಿ 50-60% ಸಾಂದ್ರಕ ಪ್ರಧಾನ ಸಮುದಾಯಗಳು, ಜೀವದ್ರವ್ಯಗಳ ಎ ಮತ್ತು ಬಿ ಕ್ಯಾರೋಟಿನ್ ಹಾಗೂ (ಸುಣ್ಣ) ಕ್ಯಾಲ್ಸಿಯಂ (ರಂಜಕ), ಫಾಸ್ಪರಸ್, ಜೈವಿಕಾಂಶ, (ಕಬ್ಬಿಣ), ಐರನ್, (ತಾಮ್ರ) ಕಾಪರ್ ಮತ್ತು ಮೆಗ್ನೀಷಿಯಂ ಖನಿಜಾಂಶಗಳು ಹೆಚ್ಚಾಗಿ ಲಭ್ಯವಿರುತ್ತವೆ.

ಸಾಂದರ್ಭಿಕಚಿತ್ರ
ಅಜೋಲಾದ ಕಚ್ಚಾ ಪ್ರೋಟೀನ್ ಪ್ರಮಾಣವು ಅದರ ಜಾತಿ, ಬೆಳೆಸುವ ವಿಧಾನ, ನೀರಿನ ಗುಣಮಟ್ಟ ಮತ್ತು ಕೊಯ್ಲಿನ ಹಂತದ ಆಧಾರದ ಮೇಲೆ ಬದಲಾಗುತ್ತದೆ. ಒಣಪದಾರ್ಥದ ಆಧಾರದ ಮೇಲೆ ಸಾಮಾನ್ಯವಾಗಿ ಸುಮಾರು15 ರಿಂದ 35 ಪ್ರತಿಶತದಷ್ಟು ಕಚ್ಚಾ ಪ್ರೋಟೀನ್ ವರದಿಯಾಗಿದೆ. ಇದರ ಜೊತೆಗೆ ಖನಿಜಾಂಶಗಳು, ಅಗತ್ಯ ಅಮೈನೋಆಮ್ಲಗಳು, ಕ್ಯಾರೋಟಿನಾಯ್ಡ್‌ಗಳು ಮತ್ತು ಜೀವಸತ್ವಗಳೂ ಇವೆ. ಆದ್ದರಿಂದ ಅಜೋಲಾವನ್ನು ಸಾಂಪ್ರದಾಯಿಕ ಆಹಾರಕ್ಕೆ ಸಂಪೂರ್ಣ ಪರ್ಯಾಯವಾಗಿ ಪರಿಗಣಿಸುವುದಕ್ಕಿಂತ ಪೂರಕ ಮೇವು ಆಗಿಬಳಸುವುದು ಸೂಕ್ತವಾಗಿದೆ.
ಅಜೋಲಾ ಬೆಳೆ ಉತ್ಪಾದನಾ ವಿಧಾನ
ಮೊದಲಿಗೆ 2.6 ಮೀ. ಉದ್ದ ಹಾಗೂ 1.6 ಮೀ. ಅಗಲ ಮತ್ತು 1 ಮೀಟರ್ ಆಳದ ಗುಂಡಿಯನ್ನು ಸ್ವಲ್ಪ ನೆರಳು ಇರುವ ಜಾಗದಲ್ಲಿ ತೋಡಬೇಕು. ನೆಲವನ್ನು ಮಟ್ಟಮಾಡಿ 2.6 ಮೀ. X 1.6 ಮೀ. ಆಕಾರದಲ್ಲಿ ಮಂದವಾದ ಮಣ್ಣಿನಿಂದ ಗುಂಡಿಯ ಆಕಾರದಲ್ಲಿ ಹಾಸಬೇಕು.

10-15 ಕೆ.ಜಿ. ಕೊಳೆತಿರುವ ಮಣ್ಣು, 2 ದಿನ ಕೊಳೆದ ಗೊಬ್ಬರ, 1-2 ಕೆ.ಜಿ. ಮತ್ತು 10-20 ಗ್ರಾಂ ಸೂಪರ್ ಫಾಸ್ಪೇಟ್ ಅನ್ನು 10 ಲೀ. ನೀರಿನಲ್ಲಿ ಕಲಸಿ ಗುಂಡಿಯಲ್ಲಿ ಹಾಕಬೇಕು. ಗುಂಡಿಯಲ್ಲಿ 10 ಸೆಂ.ಮೀ. ನಮ್ನು ನೀರು ತುಂಬಿಸಬೇಕು ನಂತರ 20 ಗ್ರಾಂ ಖನಿಜ ಮಿಶ್ರಣ ಸೇರಿಸಬೇಕು. 0.5-1 ಕೆ.ಜಿ. ತಾಜಾ ಅಜೋಲಾವನ್ನು ನೀರಿನಮೇಲೆ (ಬಿತ್ತನೆ) ಬಿಡಬೇಕು.

ಅಜೋಲಾವನ್ನು ತೇವವಾದ ವಾತಾವರಣದಲ್ಲಿ ಬೆಳೆಸಬೇಕು. ನೀರಿನ pH 5.5-7 ಇರಬೇಕು.10-15 ದಿನಗಳ ನಂತರ ಅಜೋಲಾ ಗುಂಡಿ ತುಂಬಾ ಬೆಳೆದ 0.5-1 ಕೆ.ಜಿ. ಅಜೋಲಾ ಬೆಳೆಯನ್ನು ಪಡೆಯಬಹುದು. ಪ್ರತಿ 5 ದಿನಕ್ಕೊಮ್ಮೆ 0.5-1 ಕೆ.ಜಿ. ಗೊಬ್ಬರ ಮತ್ತು 10 ಗ್ರಾಂ ಸೂಪರ್ ಫಾಸ್ಪೇಟ್ ಹಾಕಬೇಕು. ಇದರಿಂದ ಪ್ರತಿದಿನವೂ 1 ಕೆ.ಜಿ. ಅಜೋಲಾ ಪಡೆಯಬಹುದು. ಅಜೋಲಾವನ್ನು ಹಸುಗಳಿಗೆ ನೀಡುವ ಮುನ್ನ ಸಗಣಿ ಗೊಬ್ಬರವನ್ನು ತೆಗೆದುಹಾಕಿ ತೊಳೆಯಬೇಕು. ಕೋಳಿಗಳಿಗೆ ಕೂಡ ಮೇವಿನ ರೂಪದಲ್ಲಿ ನೀಡಬಹುದು.

ಒಂದು ಅಜೋಲಾ ಘಟಕದ ವೆಚ್ಚ
ಅಜೋಲಾ ಉತ್ಪಾದನಾ ಘಟಕವನ್ನು ಸ್ಥಾಪಿಸಲು ಅಗತ್ಯವಿರುವ ಸಾಮಗ್ರಿ ವೆಚ್ಚವು ಒಟ್ಟು ₹2,450 ಆಗಿರುತ್ತದೆ. ಇದರಲ್ಲಿ 450 GSM ಗುಣಮಟ್ಟದ 10×6 ಅಡಿಗಾತ್ರದ UV-Stabilized HDPE ಅಜೋಲಾ ಬೆಡ್/ಶೀಟ್‌ಗೆ ₹1,350, 80% ನೆರಳು ಬಲೆ (Shade Net) ಹಾಗೂ GI ಫ್ರೇಮ್‌ಗೆ ₹650, ಫಾಸ್ಫೇಟ್‌ಯುಕ್ತ ಗೊಬ್ಬರ ಮತ್ತು ಸೂಪರ್ಫಾಸ್ಫೇಟ್‌ಗೆ ₹250 ಹಾಗೂ ಅಜೋಲಾ ಮದರ್‌ ಕಲ್ಚರ್/ಬೀಜ ಸಂಸ್ಕೃತಿ (Starter Culture/Inoculum) 2 ಕೆ.ಜಿ.ಗೆ ₹200 ವೆಚ್ಚವಾಗುತ್ತದೆ. ಘಟಕದ ಕಾರ್ಮಿಕ ವೆಚ್ಚವು ₹700 ಆಗಿದ್ದು, ಸ್ಥಳ ಸಿದ್ಧತೆ, ತೊಟ್ಟಿಯ/ಬೆಡ್ನ ಅಳವಡಿಕೆ, ಸಂರಕ್ಷಣಾ ವ್ಯವಸ್ಥೆ ಹಾಗೂ ಬೀಜ ಸಂಸ್ಕೃತಿ ಹಾಕುವಂತಹ ಕಾರ್ಯಗಳಿಗೆ 2 ಮಾನವ ದಿನಗಳ ಕೂಲಿಯನ್ನು ಒಳಗೊಂಡಿರುತ್ತದೆ. ಹೀಗಾಗಿ, ಅಜೋಲಾ ಉತ್ಪಾದನಾ ಘಟಕವನ್ನು ಸ್ಥಾಪಿಸಲು ಒಟ್ಟು ಅಂದಾಜು ವೆಚ್ಚ ₹3,150 ಆಗಿರುತ್ತದೆ.
2026-27ನೇ ಸಾಲಿನಲ್ಲಿ ರಾಜ್ಯದ ಎಲ್ಲಾ 31 ಜಿಲ್ಲೆಗಳ 240 ತಾಲ್ಲೂಕುಗಳಲ್ಲಿ ಒಟ್ಟು 12000 ಅಜೋಲಾ ಘಟಕಗಳನ್ನು ರೂ. 3150/- ಪ್ರತಿ ಘಟಕ ವೆಚ್ಚದಂತೆ, ರೂ. 3.78 ಕೋಟಿ ವೆಚ್ಚದಲ್ಲಿ ಅನುದಾನ ಒದಗಿಸಲಾಗಿದೆ. ಇದಕ್ಕಾಗಿ ಪ್ರತಿ ಜಿಲ್ಲೆಗಳಿಗೆ ಜಿಲ್ಲಾವಾರು ಗುರಿಯನ್ನು ನಿಗದಿಪಡಿಸಲಾಗಿದೆ.

ಅಜೋಲಾ ಕಲ್ಚರ್ (Azolla Culture)ಎಲ್ಲಾ ಕೃಷಿ ವಿಜ್ಞಾನ ಕೇಂದ್ರಗಳಲ್ಲಿ (KVK), ಕೃಷಿ ವಿಶ್ವ ವಿದ್ಯಾಲಯಗಳಲ್ಲಿ, ಪಶುವೈದ್ಯಕೀಯ ಮಹಾ ವಿದ್ಯಾಲಯಗಳಲ್ಲಿ ಹಾಗೂ ಖಾಸಗಿ ವ್ಯಾಪಾರಿಗಳಲ್ಲಿ ಲಭ್ಯವಿರುತ್ತದೆ. ಇದರ ಅಂದಾಜು ಬೆಲೆ ಪ್ರತಿ ಕಲ್ಚರ್‌ಗೆ ಕೆ.ಜಿ. ₹50 ಆಗಿರುತ್ತದೆ.
ಜಾನುವಾರುಗಳ ಆಹಾರದಲ್ಲಿ ಅಜೋಲಾ ಪೂರಕ ಬಳಕೆ
ಜಾನುವಾರುಗಳಿಗೆ ಅಜೋಲಾವನ್ನು ಪೂರಕ ಆಹಾರವಾಗಿ ನೀಡುವಾಗ, ವಯಸ್ಕ ಹಸುವಿಗೆ ದಿನಕ್ಕೆ 1.0–1.5 ಕೆ.ಜಿ., ವಯಸ್ಕ ಎಮ್ಮೆಗೆ ದಿನಕ್ಕೆ 1.0–1.5 ಕೆ.ಜಿ., ಮೇಕೆಗೆ ದಿನಕ್ಕೆ 200–300 ಗ್ರಾಂ ಮತ್ತು ಕೋಳಿಗಳಿಗೆ ದಿನಕ್ಕೆ 10–15 ಗ್ರಾಂ ತಾಜಾ ಅಜೋಲಾವನ್ನು ನೀಡಬಹುದು. ಇದು ಜಾನುವಾರುಗಳಿಗೆ ನೀಡುವ ಒಟ್ಟು ಕೇಂದ್ರೀಕೃತ ಆಹಾರ/ಮೇವಿನ ಪ್ರಮಾಣದಲ್ಲಿ ಕ್ರಮವಾಗಿ ಸುಮಾರು 10–15%ರಷ್ಟು (ಹಸು, ಎಮ್ಮೆ ಮತ್ತು ಮೇಕೆಗಳಿಗೆ) ಹಾಗೂ 5–10%ರಷ್ಟು (ಕೋಳಿಗಳಿಗೆ) ಪೂರಕವಾಗಿರಬಹುದು. ಅಜೋಲಾ ಉತ್ಪಾದನೆ, ಕೊಯ್ಲು, ಸಂಸ್ಕರಣೆ ಮತ್ತು ಜಾನುವಾರುಗಳಿಗೆ ನೀಡುವ ಪ್ರಮಾಣದ ಕುರಿತು ಪ್ರಮಾಣಿತ ಮಾರ್ಗಸೂಚಿ (SOP) ಗಳನ್ನು ಅನುಸರಿಸುವುದು ಅಗತ್ಯ.
ಜಾನುವಾರುಗಳ ಒಟ್ಟು ಆಹಾರ ಪಡಿತರವನ್ನು ಅವಲಂಬಿಸಿ ಈ ಪ್ರಮಾಣದಲ್ಲಿ ವ್ಯತ್ಯಾಸವಾಗಬಹುದು. ಆರಂಭದಲ್ಲಿ ಕಡಿಮೆ ಪ್ರಮಾಣದ ಅಜೋಲಾವನ್ನುನೀಡಿ, ನಂತರ ಕ್ರಮೇಣ ಪ್ರಮಾಣವನ್ನು ಹೆಚ್ಚಿಸಬೇಕು.
ಹೆಚ್ಚಿನ ಮಾಹಿತಿಗಾಗಿ ಪಶುಪಾಲನೆ ಮತ್ತು ಪಶುವೈದ್ಯಕೀಯ ಸೇವೆಗಳ (AHVS) ಇಲಾಖೆಯ ಉಪನಿರ್ದೇಶಕರು, ಜಿಲ್ಲಾ ಅಧಿಕಾರಿಗಳು ಅಥವಾ ತಾಲ್ಲೂಕು ಮುಖ್ಯ ಪಶುವೈದ್ಯಾಧಿಕಾರಿಗಳನ್ನುಸಂಪರ್ಕಿಸಬಹುದು.
ಗುಣಮಟ್ಟ ಮತ್ತು ಸುರಕ್ಷತೆ ಅತ್ಯಗತ್ಯ
ಅಜೋಲಾ ಉತ್ಪಾದಿಸುವಾಗ ಗುಣಮಟ್ಟ ಮತ್ತು ಸುರಕ್ಷತೆಗೆ ವಿಶೇಷ ಆದ್ಯತೆ ನೀಡಬೇಕು. ಅಜೋಲಾದ ಪೌಷ್ಟಿಕ ಸಂಯೋಜನೆ ಬೆಳೆಯುವ ಪರಿಸ್ಥಿತಿಯ ಮೇಲೆ ಬದಲಾಗುತ್ತದೆ. ಹೆಚ್ಚಿನ ಪ್ರಮಾಣದಲ್ಲಿ ಬಳಸುವುದರಿಂದ ನಾರು ಮತ್ತು ಕೆಲವು ಪ್ರತಿ ಪೌಷ್ಟಿಕ ಅಂಶಗಳ ಪರಿಣಾಮ ಉಂಟಾಗಬಹುದಾಗಿದೆ. ಕಲುಷಿತ ನೀರಿನಲ್ಲಿ ಬೆಳೆದ ಅಜೋಲಾ ಮಾಲಿನ್ಯಕಾರಕಗಳನ್ನು ಸಂಗ್ರಹಿಸಿಕೊಳ್ಳುವ ಸಾಧ್ಯತೆ ಇರುವುದರಿಂದ ಸ್ವಚ್ಛ ನೀರು ಮತ್ತು ಗುಣಮಟ್ಟದ ಉತ್ಪಾದನಾ ವ್ಯವಸ್ಥೆಅತ್ಯಂತ ಮುಖ್ಯ.
ರೈತರ ಮನೆಯ ಬಳಿಯೇ ಮೇವು ಉತ್ಪಾದನೆ:
ಅಜೋಲಾದ ಮತ್ತೊಂದು ಪ್ರಮುಖ ಪ್ರಯೋಜನವೆಂದರೆ ಇದನ್ನು ದೊಡ್ಡ ಪ್ರಮಾಣದ ಕೃಷಿಭೂಮಿ ಅಗತ್ಯವಿಲ್ಲದೆ ಸಣ್ಣ ಪ್ರಮಾಣದ ವ್ಯವಸ್ಥೆಯಲ್ಲಿಯೇ ಉತ್ಪಾದಿಸಬಹುದಾಗಿದೆ. ಸೂಕ್ತ ನೀರಿನ ವ್ಯವಸ್ಥೆ ಹೊಂದಿರುವ ರೈತರು ತಮ್ಮ ಮನೆ ಅಥವಾ ಜಾನುವಾರು ಕೊಟ್ಟಿಗೆಯ ಸಮೀಪದಲ್ಲಿಯೇ ಅಜೋಲಾ ಬೆಳೆಸಿಕೊಳ್ಳಬಹುದು. ಇದರಿಂದ ಪ್ರತಿದಿನ ಜಾನುವಾರುಗಳಿಗೆ ಅಗತ್ಯವಿರುವ ಪೂರಕ ಮೇವನ್ನು ಸ್ಥಳೀಯವಾಗಿ ಉತ್ಪಾದಿಸುವ ಅವಕಾಶ ದೊರೆಯುತ್ತದೆ. ವಿಶೇಷವಾಗಿ ಮಳೆಯಾಶ್ರಿತ ಪ್ರದೇಶಗಳಲ್ಲಿ ಹಸಿರುಮೇವು ಲಭ್ಯತೆ ಕಡಿಮೆಯಾದಾಗ ಇದು ರೈತರಿಗೆ ಸಹಾಯಕವಾಗಬಹುದು.
ಒಬ್ಬರೈತ – ಹಲವು ಜಾನುವಾರುಗಳಿಗೆ ನೆರವು’
ಅಜೋಲಾ ಉತ್ಪಾದನೆಯನ್ನು ಕೇವಲ ವೈಯಕ್ತಿಕ ರೈತರ ಪ್ರಯೋಜನಕ್ಕೆ ಸೀಮಿತಗೊಳಿಸದೆ, ಗ್ರಾಮ ಮಟ್ಟದ ಮೇವು ಭದ್ರತಾ ವ್ಯವಸ್ಥೆಯಾಗಿ ಅಭಿವೃದ್ಧಿಪಡಿಸುವ ಸಾಧ್ಯತೆಯಿದೆ. ನೀರಾವರಿ ಇರುವ ಪ್ರದೇಶಗಳಲ್ಲಿ ಆಯ್ದ ರೈತರು ಅಜೋಲಾ ಸೇರಿದಂತೆ ಪೂರಕ ಮೇವು ಉತ್ಪಾದಿಸಿ, ಅದನ್ನು ಮೇವು ಕೊರತೆ ಯಿರುವ ಪ್ರದೇಶಗಳಿಗೆ ಅಥವಾ ಅಗತ್ಯವಿರುವ ಜಾನುವಾರು ಮಾಲೀಕರಿಗೆ ಪೂರೈಸುವ ವ್ಯವಸ್ಥೆಯನ್ನು ರೂಪಿಸಬಹುದು. ಈ ಮೂಲಕ ಸರ್ಕಾರದ ಮೇವು ವಿತರಣಾ ಕಾರ್ಯಕ್ರಮಕ್ಕೆ ಸ್ಥಳೀಯ ಉತ್ಪಾದನೆಯ ಮೂಲಕ ಮತ್ತಷ್ಟು ಬಲ ದೊರೆಯುತ್ತದೆ.
ಸರ್ಕಾರದ ಬೆಂಬಲದೊಂದಿಗೆ ಮೇವು ಭದ್ರತೆ
ಹೆಚ್ಚುವರಿ ಅಜೋಲಾ ಘಟಕಗಳನ್ನು ಸ್ಥಾಪಿಸಲು ರಾಜ್ಯದ ಎಲ್ಲಾ 31 ಜಿಲ್ಲೆಗಳಲ್ಲಿ ಉದ್ಯೋಗ ಖಾತರಿ ಯೋಜನೆಯಡಿ 2026-27ನೇ ಸಾಲಿನ ಜಿಲ್ಲಾವಾರು ಕ್ರಿಯಾ ಯೋಜನೆ/ಕಾರ್ಯ ಯೋಜನೆಯಲ್ಲಿ “ಅಜೋಲಾ ಪೌಷ್ಟಿಕ ಪೂರಕ ಮೇವು ಉತ್ಪಾದನಾ ಘಟಕ ನಿರ್ಮಾಣ”ಕಾಮಗಾರಿಯನ್ನು ಕೈಗೊಳ್ಳಲಾಗುತ್ತಿದೆ.
ಸರ್ಕಾರವು ಮೇವು ಬೀಜಗಳ ಖರೀದಿ ಮತ್ತು ವಿತರಣಾ ಕಾರ್ಯಕ್ರಮಕ್ಕಾಗಿ ರೂ. 25 ಕೋಟಿಗಳನ್ನು ಒದಗಿಸಿದೆ. ಈ ಪೈಕಿ, 4,72,114 ಮೇವಿನ ಬೀಜದ ಮಿನಿಕಿಟ್‌ಗಳನ್ನು ಖರೀದಿಸಿ, ನೀರಾವರಿ ಸೌಲಭ್ಯ ಹೊಂದಿರುವ ರೈತರನ್ನು ಗುರುತಿಸಿ, ಅವರಿಗೆ ಮೇವು ಉತ್ಪಾದನೆಗೆ ಅಗತ್ಯವಾದ ಬೀಜ, ತರಬೇತಿ ಹಾಗೂ ತಾಂತ್ರಿಕ ಮಾರ್ಗದರ್ಶನ ಒದಗಿಸಲಾಗುವುದು. ಇಂತಹ ರೈತರೊಂದಿಗೆ ಒಡಂಬಡಿಕೆ (MOU) ಮಾಡಿಕೊಂಡು, ಅವರು ಉತ್ಪಾದಿಸುವ ಹೆಚ್ಚುವರಿ ಮೇವನ್ನು ಸರ್ಕಾರದ ಮೂಲಕ ಮೇವು ಅಗತ್ಯವಿರುವ ಜಾನುವಾರು ಮಾಲೀಕರಿಗೆ ತಲುಪಿಸಲಾಗುವುದು. ಇದರಿಂದ ಮೇವು ಉತ್ಪಾದಿಸುವ ಸಾಮರ್ಥ್ಯವಿರುವ ರೈತರಿಗೆ ಅವಕಾಶ ದೊರೆಯುವುದರ ಜೊತೆಗೆ, ಸ್ವಂತವಾಗಿ ಮೇವು ಉತ್ಪಾದಿಸಲು ಸಾಧ್ಯವಾಗದ ರೈತರಿಗೆ ಸರ್ಕಾರದ ಮೂಲಕ ಅಗತ್ಯ ಮೇವು ಲಭ್ಯವಾಗುವಂತೆ ಮಾಡಲಾಗುವುದು.
ಸುಸ್ಥಿರ ಪಶುಪಾಲನೆಯತ್ತ ಹೆಜ್ಜೆ
ಅಜೋಲಾದ ವೇಗವಾದ ಜೈವಿಕ ಬೆಳವಣಿಗೆ, ನೈಟ್ರೋಜನ್ ಸ್ಥಿರೀಕರಣದ ಸಾಮರ್ಥ್ಯ ಮತ್ತು ಪೌಷ್ಟಿಕ ಗುಣಗಳು ಸಣ್ಣ ಪ್ರಮಾಣದ ಹಾಗೂ ಸಮಗ್ರ ಕೃಷಿವ್ಯವಸ್ಥೆಗಳಿಗೆ ಪೂರಕವಾಗಿದೆ. ಆದರೆ ಸುರಕ್ಷಿತ ಮತ್ತು ಆರ್ಥಿಕವಾಗಿ ಸೂಕ್ತ ಬಳಕೆಗೆ ಪ್ರಮಾಣಿತ ಉತ್ಪಾದನಾ ವಿಧಾನಗಳು ಮತ್ತು ಸೂಕ್ತ ಆಹಾರ ನಿರ್ವಹಣೆ ಅಗತ್ಯವಾಗಿದೆ.
ಸಮಾರೋಪ
ಮಳೆಯ ಕೊರತೆ ಮತ್ತು ನೀರಿನ ಅಭಾವದಂತಹ ಪರಿಸ್ಥಿತಿಯಲ್ಲಿ ಜಾನುವಾರುಗಳಿಗೆ ನಿರಂತರವಾಗಿ ಮೇವು ಒದಗಿಸುವುದು ನಮ್ಮೆಲ್ಲರ ಜವಾಬ್ದಾರಿಯಾಗಿದೆ. ಸಾಂಪ್ರದಾಯಿಕ ಮೇವು ಬೆಳೆಗಳು ಉತ್ತಮ ಆಯ್ಕೆಯಾಗಿದ್ದರೂ, ಅವುಗಳಿಗೆ ಅಗತ್ಯವಿರುವ ಬೆಳವಣಿಗೆಯ ಅವಧಿ ಮತ್ತು ನೀರಿನ ಲಭ್ಯತೆಯನ್ನು ಗಮನದಲ್ಲಿಟ್ಟುಕೊಂಡು ಅಜೋಲಾದಂತಹ ಕಡಿಮೆ ನೀರಿನಲ್ಲಿ ಉತ್ಪಾದಿಸಬಹುದಾದ ಪೂರಕ ಮೇವು ಸಂಪನ್ಮೂಲಗಳಿಗೆ ಹೆಚ್ಚಿನ ಗಮನನೀಡುವುದು ಇಂದಿನ ಅಗತ್ಯವಾಗಿದೆ.
ಸರ್ಕಾರದ ನೆರವು, ಇಲಾಖೆಗಳ ಸಮನ್ವಯ, ನೀರಾವರಿ ಸೌಲಭ್ಯ ಹೊಂದಿರುವ ರೈತರ ಸಹಭಾಗಿತ್ವ ಮತ್ತು ವೈಜ್ಞಾನಿಕ ಮಾರ್ಗದರ್ಶನದ ಮೂಲಕ ಜಾನುವಾರುಗಳ ಮೇವು ಲಭ್ಯತೆಯನ್ನು ಬಲಪಡಿಸಲು ಅಜೋಲಾ ತಂತ್ರಜ್ಞಾನವನ್ನು ರೈತರ ಬಳಿಗೆ ಕೊಂಡೊಯ್ಯುವುದು ಇಂದಿನ ಮೇವು ಭದ್ರತೆಯ ಸವಾಲಿಗೆ ಒಂದು ಸುಸ್ಥಿರ ಪರಿಹಾರವಾಗಬಹುದು ಎಂದು ಭಾವಿಸಿದೆ.

(ಡಾ. ಶಾಲಿನಿರಜನೀಶ್)
ಸರ್ಕಾರದ ಮುಖ್ಯ ಕಾರ್ಯದರ್ಶಿ

ಸಾಗರ ನಗರದ ಮಿನಿ ವಿಧಾನಸೌಧದಲ್ಲಿರುವ ತಾಲ್ಲೂಕು ಕಚೇರಿಯಲ್ಲಿ ಮಿತಿಮೀರಿರುವ ಮಧ್ಯವರ್ತಿಗಳ ಹಾವಳಿ ಹಾಗೂ ಅನಧಿಕೃತ ವ್ಯಕ್ತಿಗಳ ಹಸ್ತಕ್ಷೇಪವನ್ನು ಖಂಡಿಸಿ ಸಾಮಾಜಿಕ ಕಾರ್ಯಕರ್ತ ಜಮೀಲ್ ಸಾಗರ್ ಅವರು ಮಂಗಳವಾರ ಕಚೇರಿಯ ಪ್ರವೇಶ ದ್ವಾರದ ಮುಂಭಾಗ ದಿಢೀರ್ ಏಕಾಂಗಿ ಪ್ರತಿಭಟನೆ ನಡೆಸಿದರು. ಯಾವುದೇ ಪೂರ್ವ ಸೂಚನೆಯಿಲ್ಲದೆ ಏಕಾಏಕಿ ಧರಣಿ ಕುಳಿತ ಅವರ ನಡೆ ಕಚೇರಿ ಆವರಣದಲ್ಲಿ ಕೆಲಕಾಲ ತೀವ್ರ ಸಂಚಲನ ಮೂಡಿಸಿತು. ಜಾತಿ ಮತ್ತು ಆದಾಯ ಪ್ರಮಾಣಪತ್ರದ ಕೆಲಸಕ್ಕಾಗಿ ಉಪ ತಹಶೀಲ್ದಾರ್ ಶ್ರೀಮತಿ ರೇಖಾ ಅವರ ಕೊಠಡಿಗೆ ತೆರಳಿದ್ದ ವೇಳೆ, ಅಲ್ಲಿಯೇ ಆಸೀನನಾಗಿದ್ದ ಮಧ್ಯವರ್ತಿಯೊಬ್ಬ ಅಧಿಕಾರಿಯಂತೆ ವರ್ತಿಸಿ ಸಾರ್ವಜನಿಕರ ಕೆಲಸಕ್ಕೆ ಅಡ್ಡಬಾಯಿ ಹಾಕಿ ದರ್ಪ ತೋರಿದ್ದೇ ಈ ದಿಢೀರ್ ಆಕ್ರೋಶಕ್ಕೆ ಪ್ರಮುಖ ಕಾರಣವಾಯಿತು. ಸರ್ಕಾರಿ ಕಚೇರಿಗಳಲ್ಲಿ ಬ್ರೋಕರ್‌ಗಳ ಹಾವಳಿ ತಡೆಯಲು ಸರ್ಕಾರ ಹಾಗೂ ಸ್ಥಳೀಯ ಶಾಸಕರ ಕಟ್ಟುನಿಟ್ಟಿನ ಸೂಚನೆಗಳಿದ್ದರೂ, ಕೆಲ ಅಧಿಕಾರಿಗಳ ಬೆಂಬಲದಿಂದಲೇ ಇಂತಹ ಕೃತ್ಯಗಳು ರಾಜಾರೋಷವಾಗಿ ನಡೆಯುತ್ತಿವೆ ಎಂದು ಪ್ರತಿಭಟನಾಕಾರರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ಕಚೇರಿ ಆವರಣದಲ್ಲಿ ರಾಜಾರೋಷವಾಗಿ ತಿರುಗಾಡುವ ಅನಧಿಕೃತ ವ್ಯಕ್ತಿಗಳ ಪ್ರವೇಶಕ್ಕೆ ತಕ್ಷಣವೇ ಬ್ರೇಕ್ ಹಾಕಿ, ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಜರುಗಿಸಬೇಕೆಂದು ಒತ್ತಾಯಿಸಿ ತಹಶೀಲ್ದಾರ್ ಅವರಿಗೆ ದೂರು ಸಲ್ಲಿಸಲಾಯಿತು. ಈ ಮನವಿಯ ಪ್ರತಿಯನ್ನು ಸ್ಥಳೀಯ ಶಾಸಕರು ಹಾಗೂ ಉಪವಿಭಾಗಾಧಿಕಾರಿಗಳಿಗೂ ಸೂಕ್ತ ಕ್ರಮಕ್ಕಾಗಿ ರವಾನಿಸಲಾಗಿದೆ. ಸ್ಥಳದಲ್ಲೇ ದೂರು ಸ್ವೀಕರಿಸಿ ಮಾತನಾಡಿದ ತಹಶೀಲ್ದಾರ್ ಡಾ. ಪ್ರತಿಭಾ ಆರ್., ತಾಲ್ಲೂಕು ಆಡಳಿತದ ವ್ಯಾಪ್ತಿಯಲ್ಲಿ ಮಧ್ಯವರ್ತಿಗಳ ಹಾವಳಿಗೆ ಯಾವುದೇ ಕಾರಣಕ್ಕೂ ಆಸ್ಪದ ನೀಡುವುದಿಲ್ಲ ಎಂದು ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದರು. ಸಾರ್ವಜನಿಕರಿಗೆ ಯಾವುದೇ ಅಡೆತಡೆಯಿಲ್ಲದೆ ಪಾರದರ್ಶಕವಾಗಿ ಸೇವೆಗಳು ದೊರೆಯುವಂತೆ ಶಿಸ್ತುಕ್ರಮ ಕೈಗೊಳ್ಳಲಾಗುವುದು ಎಂದ ಭರವಸೆ ನೀಡಿದರು.

ಪ್ರವಾಹವು ಕೇವಲ ಪ್ರಕೃತಿ ವಿಕೋಪವಲ್ಲ, ಮಾನವ ನಿರ್ಮಿತ ತಪ್ಪುಗಳ ಪರಿಣಾಮವೂ ಆಗಿದೆ. ನದಿ ದಂಡೆಗಳಲ್ಲಿ ಅನಿಯಂತ್ರಿತ ನಿರ್ಮಾಣ, ಜಲಮೂಲಗಳ ಅತಿಕ್ರಮಣ, ಯೋಜಿತವಲ್ಲದ ನಗರೀಕರಣ, ಜೌಗು ಪ್ರದೇಶಗಳ ನಾಶ, ಹೂಳು ತೆಗೆಯುವ ಕಾರ್ಯದ ನಿರ್ಲಕ್ಷ್ಯ ಹಾಗೂ ಕಳಪೆ ಅಣೆಕಟ್ಟು ನಿರ್ವಹಣೆಯಂತಹ ಅಂಶಗಳು ಪ್ರವಾಹದ ತೀವ್ರತೆಯನ್ನು ಮತ್ತಷ್ಟು ಹೆಚ್ಚಿಸುತ್ತಿವೆ ಎಂದು ಭಾರತೀಯ ರೆಡ್ ಕ್ರಾಸ್ ಸಂಸ್ಥೆಯ ರಾಷ್ಟ್ರೀಯ ಪ್ರಧಾನ ಕಚೇರಿಯ ರಾಷ್ಟ್ರೀಯ ವಿಪತ್ತು ನಿರ್ವಹಣಾ ತಂಡದ ಸದಸ್ಯ ಡಾ. ಕುಮಾರ್ ವಿ.ಎಲ್.ಎಸ್. ಹೇಳಿದರು.

ನಗರದ ರಾಜೇಂದ್ರನಗರದ ರೋಟರಿ ಈಸ್ಟ್ ಶಾಲೆಯಲ್ಲಿ ರೋಟರಿ ಕ್ಲಬ್ ಶಿವಮೊಗ್ಗ ಈಸ್ಟ್ ವತಿಯಿಂದ ಆಯೋಜಿಸಿದ್ದ “ಅಸ್ಸಾಂ ಪ್ರವಾಹ ಪರಿಹಾರ ಕಾರ್ಯಾಚರಣೆ–2026 ಸ್ಮರಣೀಯ ಕ್ಷಣಗಳು” ಎಂಬ ವಿಷಯದ ಕುರಿತ ವಾರದ ಸಭೆಯಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

ಪಶ್ಚಿಮ ಘಟ್ಟಗಳಂತಹ ಪರ್ವತ ಪ್ರದೇಶಗಳಲ್ಲಿ ನಡೆಯುತ್ತಿರುವ ಅನಿಯಂತ್ರಿತ ನಿರ್ಮಾಣ, ಅರಣ್ಯನಾಶ ಹಾಗೂ ಅಕ್ರಮ ಕಲ್ಲು ಗಣಿಗಾರಿಕೆ ಭೂಕುಸಿತ ಮತ್ತು ಶಿಲಾಖಂಡರಾಶಿಗಳ ಜಾರುವಿಕೆಗೆ ಕಾರಣವಾಗುತ್ತಿವೆ. ನಗರ ಯೋಜನೆಯಲ್ಲಿ ಪರಿಸರ ಸುಸ್ಥಿರತೆಯನ್ನು ಪ್ರಮುಖ ಅಂಶವಾಗಿ ಪರಿಗಣಿಸಬೇಕು. ಜೊತೆಗೆ ನಾಗರಿಕರು ತಮ್ಮ ಕರ್ತವ್ಯ ಹಾಗೂ ಜವಾಬ್ದಾರಿಗಳನ್ನು ನಿರ್ಲಕ್ಷಿಸುವುದೂ ಇಂತಹ ದುಸ್ಥಿತಿಗೆ ಕಾರಣವಾಗುತ್ತಿದೆ ಎಂದು ಅವರು ಅಭಿಪ್ರಾಯಪಟ್ಟರು.

ಅಸ್ಸಾಂನಲ್ಲಿ ಈ ವರ್ಷ ಸಂಭವಿಸಿದ ಭೀಕರ ಪ್ರವಾಹ ಮತ್ತು ಭೂಕುಸಿತದ ಸಂದರ್ಭದಲ್ಲಿ ಭಾರತೀಯ ರೆಡ್ ಕ್ರಾಸ್ ಸಂಸ್ಥೆಯ ರಾಷ್ಟ್ರೀಯ ವಿಪತ್ತು ಪ್ರತಿಕ್ರಿಯಾ ತಂಡ ಕೈಗೊಂಡ ಪರಿಹಾರ ಕಾರ್ಯಾಚರಣೆಗಳ ಕುರಿತು ವಿವರಿಸಿದ ಅವರು, ಪರಿಹಾರ ಶಿಬಿರಗಳ ಸ್ಥಾಪನೆ, ಆಹಾರ, ಕುಡಿಯುವ ನೀರು, ಔಷಧಿ ಹಾಗೂ ಅಗತ್ಯ ವಸ್ತುಗಳ ವಿತರಣೆ, ನೀರು ಶುದ್ಧೀಕರಣ ಘಟಕಗಳ ನಿಯೋಜನೆ ಮತ್ತು ಸ್ಥಳೀಯ ಸ್ವಯಂಸೇವಕರಿಗೆ ತರಬೇತಿ ನೀಡುವ ಕಾರ್ಯಗಳನ್ನು ಕೈಗೊಂಡಿರುವುದಾಗಿ ತಿಳಿಸಿದರು.

ಭಾರೀ ಮಳೆಯ ಅವಧಿಯಲ್ಲಿ ಸರ್ಕಾರದ ಸೂಚನೆಗಳು ಹಾಗೂ ಹವಾಮಾನ ಮುನ್ಸೂಚನೆಗಳ ಆಧಾರದ ಮೇಲೆ ನದಿ ಮಟ್ಟಗಳ ನಿರಂತರ ಮೇಲ್ವಿಚಾರಣೆ ನಡೆಸಲಾಯಿತು. ಪ್ರವಾಹದ ನೀರು ಇಳಿದ ನಂತರ ಮನೆಗಳು, ರಸ್ತೆಗಳು ಹಾಗೂ ಸಾರ್ವಜನಿಕ ಮೂಲಸೌಕರ್ಯಗಳಿಗೆ ಉಂಟಾದ ಹಾನಿಯ ಮೌಲ್ಯಮಾಪನವನ್ನೂ ಕೈಗೊಳ್ಳಲಾಯಿತು ಎಂದು ಪರಿಹಾರ ಕಾರ್ಯಾಚರಣೆಯ ಅನುಭವಗಳನ್ನು ಹಂಚಿಕೊಂಡರು.

ಅಧ್ಯಕ್ಷತೆ ವಹಿಸಿ ಮಾತನಾಡಿದ ರೋಟರಿ ಕ್ಲಬ್ ಶಿವಮೊಗ್ಗ ಈಸ್ಟ್ ಅಧ್ಯಕ್ಷ ಶೇಷಗಿರಿ ಅವರು, ಮಾನ್ಸೂನ್ ಪ್ರವಾಹದಿಂದಾಗಿ ಅಸ್ಸಾಂನಲ್ಲಿ ಸಾವಿರಾರು ಕುಟುಂಬಗಳು ವಸತಿ, ಆಹಾರ ಮತ್ತು ಶುದ್ಧ ಕುಡಿಯುವ ನೀರಿನ ಕೊರತೆಯನ್ನು ಅನುಭವಿಸಿವೆ. ಹವಾಮಾನ ವೈಪರೀತ್ಯವು ದೇಶಾದ್ಯಂತ ಪ್ರವಾಹ ಮತ್ತು ಭೂಕುಸಿತಗಳಿಗೆ ಕಾರಣವಾಗುತ್ತಿರುವ ಹಿನ್ನೆಲೆಯಲ್ಲಿ ಪ್ರತಿಯೊಂದು ಪರಿಹಾರ ಕಿಟ್, ಪ್ರತಿಯೊಬ್ಬ ಸ್ವಯಂಸೇವಕ ಹಾಗೂ ಪ್ರತಿಯೊಂದು ಸೇವಾ ಗಂಟೆಯೂ ಸಂಕಷ್ಟದಲ್ಲಿರುವ ಜನರ ಬದುಕಿಗೆ ಆಶಾಕಿರಣವಾಗಿದೆ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಡಾ. ಕುಮಾರ್ ಅವರು ಪವರ್‌ಪಾಯಿಂಟ್ ಪ್ರಸ್ತುತಿಯ ಮೂಲಕ ಅಸ್ಸಾಂ ಪ್ರವಾಹ ಪರಿಹಾರ ಕಾರ್ಯಾಚರಣೆಯ ವಿವರಗಳನ್ನು ನೀಡಿದ್ದು, ರೋಟರಿ ಸದಸ್ಯರ ಪ್ರಶ್ನೆಗಳಿಗೆ ಉತ್ತರಿಸಿದರು.

ಈ ಸಂದರ್ಭದಲ್ಲಿ ಚುನಾಯಿತ ಜಿಲ್ಲಾ ಗವರ್ನರ್ ವಸಂತ್ ಹೋಬಳಿದಾರ್, ಝೋನಲ್ ಲೆಫ್ಟಿನೆಂಟ್ ಮಹೇಶ್ ಆಲೇಮನೆ, ರೋಟರಿ ಕ್ಲಬ್ ಶಿವಮೊಗ್ಗ ಈಸ್ಟ್ ಕಾರ್ಯದರ್ಶಿ ಆರ್. ಮನೋಹರ್, ಮಾಜಿ ಸಹಾಯಕ ಗವರ್ನರ್ ರೊಟೇರಿಯನ್ ಜಿ. ವಿಜಯಕುಮಾರ್, ಮಾಜಿ ಅಧ್ಯಕ್ಷರಾದ ಎಚ್.ಬಿ. ಗಣೇಶ್, ಎಸ್. ಶ್ರೀಕಾಂತ್, ಎನ್.ಎಚ್. ಡಾ. ಪರಮೇಶ್ವರ್ ಶಿಗ್ಗಾವ್, ಅರುಣ್ ದೀಕ್ಷಿತ್, ಕೃಷ್ಣಮೂರ್ತಿ ಬಿ., ನಿಕಟಪೂರ್ವ ಅಧ್ಯಕ್ಷ ಡಿ. ಕಿಶೋರ್ ಕುಮಾರ್, ಬಿ.ಆರ್. ಧನಂಜಯ್, ಧರಣೇಂದ್ರ ದಿನಕರ್, ಕೇಶವಪ್ಪ, ಶಶಿಕಾಂತ್ ನಾಡಿಗ್, ಜಿ. ಸುನಿಲ್ ಕುಮಾರ್, ರವಿಪ್ರಕಾಶ್ ಕಾಳಾಚಾರ್, ಕಾಸಲ ವಿ. ಸುರೇಂದ್ರ, ಶ್ರೀನಿವಾಸ್ ಗೌಡ, ಡಾ. ಅರುಣ್ ಎಂ., ಗಂಗಪ್ಪ, ಜಗದೀಶ್, ಕೆ.ಟಿ. ಗುರುಮೂರ್ತಿ, ರಾಜೇಶ್ ಸೇರಿದಂತೆ ರೋಟರಿ ಹಾಗೂ ಇನ್ನರ್ ವೀಲ್ ಪದಾಧಿಕಾರಿಗಳು, ಸದಸ್ಯರು ಉಪಸ್ಥಿತರಿದ್ದರು.

ಕೇಂದ್ರ ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಚಿವಾಲಯ (MoEFCC) ‘ಸ್ವಚ್ಛ ವಾಯು ದಿವಸ 2026’ ಅಂಗವಾಗಿ ಘೋಷಿಸಿರುವ 2025-26 ನೇ ಸಾಲಿನ “ಸ್ವಚ್ಛ ವಾರ್ಡ್ ವಾಯು ಸರ್ವೇಕ್ಷಣೆ 2025” ಮೌಲ್ಯಮಾಪನದಲ್ಲಿ ದಾವಣಗೆರೆ ನಗರವು ರಾಜ್ಯಮಟ್ಟದ ಎರಡು ಪ್ರಮುಖ ಪ್ರಶಸ್ತಿಗಳನ್ನು ತನ್ನದಾಗಿಸಿಕೊಂಡಿದೆ.

​ರಾಷ್ಟ್ರೀಯ ಸ್ವಚ್ಛ ವಾಯು ಕಾರ್ಯಕ್ರಮದ (NCAP) ನಾನ್-ಅಟೈನ್‌ಮೆಂಟ್ ನಗರವಾಗಿರುವ ದಾವಣಗೆರೆಯು, ಜನಸಂಖ್ಯೆ ಆಧಾರಿತ ವರ್ಗೀಕರಣದಡಿ ಅತ್ಯುತ್ತಮ ಸಾಧನೆ ತೋರಿದೆ. ನಗರದ ಎಸ್‌ಎಸ್‌ ಬಡಾವಣೆ – ಬಿ ಬ್ಲಾಕ್ (ಜನಸಂಖ್ಯೆ ವರ್ಗ 2) ಹಾಗೂ ಡಿಸಿಎಂ ಟೌನ್‌ಶಿಪ್ (ಜನಸಂಖ್ಯೆ ವರ್ಗ 3) ಈ ವಿಭಾಗಗಳಲ್ಲಿ ಪ್ರಶಸ್ತಿಯನ್ನು ಪಡೆದುಕೊಂಡಿವೆ.

​ಸದರಿ ಗೌರವದೊಂದಿಗೆ ನಗರಕ್ಕೆ ಒಟ್ಟು ರೂ‌ 25.00 ಲಕ್ಷ ರೂಪಾಯಿಗಳ ನಗದು ಬಹುಮಾನ ಲಭಿಸಿದೆ. ವಾಯು ಮಾಲಿನ್ಯ ನಿಯಂತ್ರಣ, ಪರಿಸರ ಜಾಗೃತಿ ಹಾಗೂ ನೈರ್ಮಲ್ಯ ನಿರ್ವಹಣೆಯಲ್ಲಿ ಸ್ಥಳೀಯ ನಿವಾಸಿಗಳು ಮತ್ತು ಮಹಾನಗರ ಪಾಲಿಕೆಯ ಸತತ ಪ್ರಯತ್ನಕ್ಕೆ ಈ ಪ್ರಶಸ್ತಿ ಸಾಕ್ಷಿಯಾಗಿದೆ.

​ಮಹಾನಗರ ಪಾಲಿಕೆ ಅಧಿಕಾರಿಗಳು, ಸ್ಥಳೀಯ ಪ್ರತಿನಿಧಿಗಳು ಹಾಗೂ ದಾವಣಗೆರೆಯ ನಾಗರಿಕರು ತೋರಿದ ಸಹಕಾರ ಮತ್ತು ಶ್ರಮಕ್ಕೆ ಈ ಮೂಲಕ ಕೃತಜ್ಞತೆಗಳನ್ನು ಸಲ್ಲಿಸಲಾಗಿದ್ದು, ಮುಂದಿನ ದಿನಗಳಲ್ಲಿಯೂ ನಗರದ ಗಾಳಿಯ ಗುಣಮಟ್ಟವನ್ನು ಇನ್ನಷ್ಟು ಸುಧಾರಿಸಲು ಬದ್ಧರಾಗಿರುವುದಾಗಿ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ

​State-Level Recognition for Davanagere City: Wins “Swachh Ward Vayu Survekshan 2025”

ಉತ್ತಮ ಆರೋಗ್ಯದ ಮೂಲವೇ ಪೌಷ್ಟಿಕ ಆಹಾರ. ವಿಶೇಷವಾಗಿ ಗರ್ಭಿಣಿಯರು, ಮಕ್ಕಳು ಹಾಗೂ ಮಹಿಳೆಯರು ಸಮತೋಲಿತ ಆಹಾರ ಸೇವಿಸುವ ಮೂಲಕ ಆರೋಗ್ಯವಂತ ಸಮಾಜ ನಿರ್ಮಾಣಕ್ಕೆ ಸಹಕರಿಸಬೇಕು”
ಎಂದು ಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಸಂಘದ ರಾಜ್ಯಾಧ್ಯಕ್ಷ ಸಿ.ಎಸ್.ಷಡಾಕ್ಷರಿ ಹೇಳಿದರು.

ರಾಷ್ಟ್ರೀಯ ಪೌಷ್ಟಿಕ ಆಹಾರ ಸಪ್ತಾಹದ ಅಂಗವಾಗಿ ಶಿವಮೊಗ್ಗದ ಶಕ್ತಿಧಾಮದಲ್ಲಿರುವ ನಮ್ಮ ಕ್ಲಿನಿಕ್ ನಲ್ಲಿ ಗರ್ಭಿಣಿಯರ ಆರೋಗ್ಯ ತಪಾಸಣೆ ಹಾಗೂ ಪೌಷ್ಟಿಕ ಆಹಾರ ಜಾಗೃತಿಗಾಗಿ ಆಯೋಜಿಸಿದ್ದ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಪೌಷ್ಟಿಕ ಆಹಾರದ ಕೊರತೆಯಿಂದ ರಕ್ತಹೀನತೆ, ಅಪೌಷ್ಟಿಕತೆ ಸೇರಿದಂತೆ ಹಲವು ಆರೋಗ್ಯ ಸಮಸ್ಯೆಗಳು ಉಂಟಾಗುತ್ತವೆ. ಗರ್ಭಿಣಿಯರು ಪೌಷ್ಟಿಕಾಂಶಯುಕ್ತ ಆಹಾರ ಸೇವಿಸುವುದರಿಂದ ತಾಯಿ ಹಾಗೂ ಮಗುವಿನ ಆರೋಗ್ಯ ಉತ್ತಮವಾಗಿರುತ್ತದೆ. ಇಂದಿನ ಜೀವನಶೈಲಿಯಲ್ಲಿ ಆರೋಗ್ಯಕರ ಆಹಾರ ಪದ್ಧತಿಯನ್ನು ಅಳವಡಿಸಿಕೊಳ್ಳುವುದು ಅತ್ಯಗತ್ಯವಾಗಿದೆ ಎಂದು ತಿಳಿಸಿದರು.

ಪ್ರತಿವರ್ಷ ಸೆಪ್ಟೆಂಬರ್ 01 ರಿಂದ 07 ರವರೆಗೆ ರಾಷ್ಟ್ರೀಯ ಪೌಷ್ಟಿಕ ಆಹಾರ ಸಪ್ತಾಹವನ್ನು ಆಚರಿಸಲಾಗುತ್ತದೆ. ಜನರಲ್ಲಿ ಪೌಷ್ಟಿಕ ಆಹಾರದ ಮಹತ್ವದ ಬಗ್ಗೆ ಅರಿವು ಮೂಡಿಸುವುದು, ಅಪೌಷ್ಟಿಕತೆಯನ್ನು ತಡೆಗಟ್ಟುವುದು ಹಾಗೂ ತಾಯಿ-ಮಕ್ಕಳ ಆರೋಗ್ಯವನ್ನು ಸುಧಾರಿಸುವುದು ಇದರ ಪ್ರಮುಖ ಉದ್ದೇಶವಾಗಿದೆ. ಪೌಷ್ಟಿಕ ಆಹಾರವು ದೈಹಿಕ ಹಾಗೂ ಮಾನಸಿಕ ಬೆಳವಣಿಗೆಗೆ ಅಗತ್ಯವಾಗಿದ್ದು, ಆರೋಗ್ಯಕರ ರಾಷ್ಟ್ರ ನಿರ್ಮಾಣಕ್ಕೆ ಪೂರಕವಾಗಿದೆ.

ಈ ಸಂದರ್ಭದಲ್ಲಿ ಗರ್ಭಿಣಿಯರಿಗೆ ರಕ್ತ ಪರೀಕ್ಷೆ ಸೇರಿದಂತೆ ವಿವಿಧ ವೈದ್ಯಕೀಯ ತಪಾಸಣೆಗಳನ್ನು ನಡೆಸಲಾಯಿತು. ಆರೋಗ್ಯ ತಪಾಸಣೆಯೊಂದಿಗೆ ಪೌಷ್ಟಿಕ ಆಹಾರ ಸೇವನೆಯ ಮಹತ್ವದ ಕುರಿತು ಅರಿವು ಮೂಡಿಸಲಾಯಿತು.

ಕಾರ್ಯಕ್ರಮದಲ್ಲಿ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ. ನಟರಾಜ್, ಜಿಲ್ಲಾ ರೋಗವಾಹಕ ಆಶ್ರಿತ ರೋಗಗಳ ನಿಯಂತ್ರಣಾಧಿಕಾರಿ ಡಾ. ಗುಡದಪ್ಪ ಕಸಬಿ, ಜಿಲ್ಲಾ ಸರ್ವೇಕ್ಷಣಾಧಿಕಾರಿ ಡಾ. ನಾಗರಾಜ್ ನಾಯಕ್, ಜಿಲ್ಲಾ ಆರ್‌ಸಿಎಚ್ ಅಧಿಕಾರಿ ಡಾ. ಮಲ್ಲಪ್ಪ, ತಾಲೂಕು ಆರೋಗ್ಯಾಧಿಕಾರಿ ಡಾ. ಚಂದ್ರಶೇಖರ್, ಡಾ. ಮೋಹನ್, ಡಾ. ನವೀದ್ ಖಾನ್, ಡಾ. ಹರ್ಷವರ್ಧನ್, ಡಾ. ಅರುಣ್ ಕುಮಾರ್, ಡಾ. ಸೃಜನ್ ಉಪಸ್ಥಿತರಿದ್ದರು.

ರೋಟರಿ ಕ್ಲಬ್ ಶಿವಮೊಗ್ಗ ಸೆಂಟ್ರಲ್ ಅಧ್ಯಕ್ಷೆ ವಿನುತಾ ಅಶ್ವಿನ್, ಕಾರ್ಯದರ್ಶಿ ಜ್ಯೋತಿ ಶ್ರೀರಾಮ್, ರೊ. ಜಿ.ವಿಜಯ್ ಕುಮಾರ್, ಪ್ರಾಥಮಿಕ ಆರೋಗ್ಯ ಸುರಕ್ಷತಾಧಿಕಾರಿ ಶೃತಿ ಎಸ್ ಎನ್ , ಪವನ್ ,ನಮ್ಮ ಕ್ಲಿನಿಕ್ ವ್ಯಾಪ್ತಿಯ ಆರೋಗ್ಯ ಸಿಬ್ಬಂದಿ, ಆಶಾ ಕಾರ್ಯಕರ್ತೆಯರು, ಅಂಗನವಾಡಿ ಕಾರ್ಯಕರ್ತೆಯರು, ಕ್ಲಿನಿಕ್ ಶಕ್ತಿಧಾಮದ ಸಿಬ್ಬಂದಿ ಹಾಗೂ ಗರ್ಭಿಣಿಯರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಒಂದೊಮ್ಮೆ ಅದು ಪತ್ರಿಕಾರಂಗ ಎನಿಸಿಕೊಂಡದ್ದ ಕಾಲದಲ್ಲಿ ಪತ್ರಿಕೆಗಳಲ್ಲಿ ಸತ್ಯ ಧರ್ಮಗಳನ್ನು ಎತ್ತಿ ಹಿಡಿಯಲಾಗುತ್ತಿತ್ತು ಆಗ ಸಂಪಾದಕರ ವೈಯಕ್ತಿಕ ವರ್ಚಸ್ಸಿನಲ್ಲೇ ಪತ್ರಿಕೆ ನಡೆಸುತ್ತಿದ್ದರು.
ಆದರೆ ಅದು ಪತ್ರಿಕೋದ್ಯಮದ ರೂಪು ಪಡೆದಾದ ಪ್ರಕಟಣೆಯ ವ್ಯಾಪ್ತಿ ಮತ್ತು ಸುದ್ದಿ ಉದ್ಯಮಿಗಳ ನಿಯಂತ್ರಣಕ್ಕೆ ಬಂತು.
ಆಯಾ ಉದ್ಯಮಿಯ
ಇಂಗಿತವನ್ನಾಧರಿಸಿ ಪತ್ರಿಕೆಗಳು ತಮ್ಮ ತಮ್ಮ ಸುದ್ದಿಯ ಸ್ವರೂಪವನ್ನು ರೂಪಿಸಿಕೊಂಡವು.
ಇಂತಹ ಸಂದರ್ಭದಲ್ಲಿ ಸುದ್ದಿಯು ಕಳೆದುಕೊಂಡ ಪಾವಿತ್ರ್ಯತೆಯನ್ನು ಉಳಿಸಿಕೊಂಡ ಪ್ರಕಾರವೇ ” ಅಂಕಣ ಬರಹ”ಗಳು. ಅವು ಸುದ್ದಿಯ ಕ್ಷಣಿಕ ಪ್ರಸ್ತುತತೆಯನ್ನು ಮೀರಿ, ನಾನಾ ಸುದ್ದಿಗಳ ಹಿಂದಿನ ಸತ್ಯವನ್ನು ಹಲವು ಆಯಾಮಗಳಲ್ಲಿ ವಿಶ್ಲೇಷಿಸುತ್ತಾ ಸಾರ್ವಕಾಲಿಕ ಮಹತ್ವವನ್ನು ಅಂಕಣ ಬರಹಗಳು
ಪಡೆದುಕೊಂಡವು. ಹೀಗಾಗಿ ಸಂಪಾದಕ ವರ್ಗವೇ ಅಲ್ಲದೇ ಸಾಹಿತ್ಯ ವಲಯ, ವಿವಿಧ ವೃತ್ತಿನಿರತರಿಂದ ಅಂಕಣ ಬರಹಗಳು ಇನ್ನೂ ಹೆಚ್ಚು ಶ್ರೀಮಂತವಾದವು. ಪತ್ರಿಕೆಗಳಿಗೆ ನಿಯತವಾಗಿ ಓದುಗ ವರ್ಗವನ್ನೂ ಹೆಚ್ಚಿಸುವಲ್ಲಿ ಅಂಕಣ ಬರಹಗಾರರು ತಮ್ಮದೇ ಕೊಡುಗೆ ನೀಡಿದರು ಎಂದು ಶಿವಮೊಗ್ಗ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ವೈದ್ಯನಾಥ್ ಹೇಳಿದರು.
ಕನ್ನಡ ಪತ್ರಿಕಾಕ್ಷೇತ್ರದಲ್ಲಿ ಅಂಕಣ ಸಾಹಿತ್ಯ ಈಗೀಗ ಪ್ರತಿಷ್ಠಿತವೆನಿಸಿದೆ.
ಅಂಕಣ ಬರಹಗಳು
ಸಮಾಜದ ಅನೇಕ ತಲ್ಲಣ, ಪಲ್ಲಟ ಮತ್ತು ಸಾಮಾಜಿಕ ಸಮಸ್ಯೆಗಳ ರೂಢಮೂಲ ವಿಶ್ಲೇಷಣೆ ಮತ್ತು ಪರ ವಿರೋಧ ಚರ್ಚೆಗೆ ಅವಕಾಶ ನೀಡುತ್ತಿವೆ. ಅಂತಹ ಸಮರ್ಥ ವಿಶ್ಲೇಷಣೆ ಮತ್ತು ವಿಡಂಬನಾತ್ಮಕ ಲೇಖನಗಳು ಡಾ.ರಾಘವೇಂದ್ರ ವೈಲಾಯರ ” ಖಾರ ಬಾತ್ ” ಪುಸ್ತಕದಲ್ಲಿವೆ
ಎಂದು ಹಿರಿಯ ಪತ್ರಕರ್ತ, ಚಲನಚಿತ್ರ ಕಲಾವಿದರಾದ ವೈದ್ಯನಾಥ್ ಅವರು ಖಾರ ಬಾತ್ ಪುಸ್ತಕ ಪರಿಚಯದ ಭಾಣದಲ್ಲಿ ಹೇಳಿದರು. ಅಖಿಲ ಭಾರತಿಯ ಸಾಹಿತ್ಯ ಪರಿಷತ್ತು,ಶಿವಮೊಗ್ಗ ಶಾಖೆ, ಜನನಿ ನ್ಯೂಲೈಫ್ ಆಸ್ಪತ್ರೆ ಮತ್ತು ಯಾಜಿ ಪ್ರಕಾಶನಗಳ ಸಹಯೋಗದಲ್ಲಿ ಖಾರ ಬಾತ್ ಪುಸ್ತಕ ಲೋಕಾರ್ಪಣೆ ಸಮಾರಂಭ ನಡೆಯಿತು. ಶಿವಮೊಗ್ಗದ ಸನ್ ಸ್ಪೆಷಾಲಿಟಿ ಆಸ್ಪತ್ರೆಯ ಸಭಾಂಗಣದಲ್ಲಿ ನಡೆದ ಸುಂದರ ಸಮಾರಂಭದಲ್ಲಿ ನಾಡಿನ ಹಿರಿಯ ಅಂಕಣ ಬರಹಗಾರ ರಂಗಸ್ವಾಮಿ ಮೂಕನಹಳ್ಳಿ ಅವರು “ಖಾರ ಬಾತ್” ಪುಸ್ತಕವನ್ನು ಲೋಕಾರ್ಪಣೆಗೊಳಿಸಿದರು.
ಪುಸ್ತಕಗಳಿಂದ ಜೀವನವೇ ಬದಲಾಗುತ್ತದೆ. ವೈಯಕ್ತಿಕ ಜೀವನದಲ್ಲಿ ಅಪಘಾತಕ್ಕೆ ಸಿಲುಕಿ ಆಸ್ಪತ್ರೆಗೆ ದಾಖಲಾಗಿದ್ದೆ. ಅಂತಹ ಸಂದರ್ಭದಲ್ಲಿ ಅರ್ಥಶಾಸ್ತ್ರಜ್ಞರ ಪುಸ್ತಕಗಳನ್ನ ಓದುವ ಅವಕಾಶ ಸಿಕ್ಕಿತು.
ಅಲ್ಲಿಂದ ನನ್ನ ಬದುಕೇ ಬದಲಾಯಿತು.
ಹಣ ಚಲಾವಣೆ, ಹೂಡಿಕೆ ಮುಂತಾದ ಬುದ್ಧಿಕೌಶಲಗಳ ಬಗ್ಗೆ ಬರೆಯುವ ಪ್ರೇರಣೆ ಅದರಿಂದಲೇ ಸಿಕ್ಕಿತು. ಪತ್ರಿಕೆಯಲ್ಲಿ “ಹಣ- ಕ್ಲಾಸು” ಮುಂತಾದ ಅಂಕಣಗಳಿಗೆ ಓದುಗರು ಒಳ್ಳೆಯ ಪ್ರತಿಕ್ರಿಯೆ ನೀಡಿದರು.
ಜೊತೆಗೆ ಪುಸ್ತಕಗಳನ್ನ ಕೊಂಡು ಓದುವ ಹವ್ಯಾಸಕೂಡ ಬೆಳೆಸಿಕೊಂಡೆ.

ಪ್ರಸ್ತುತ ಖಾರಬಾತ್ ಪುಸ್ತಕದ ಲೇಖಕ ಡಾ.ರಾಘವೇಂದ್ರ ವೈಲಾಯರು ಒಬ್ಬ ಅನನ್ಯ ಚಿಂತಕರು. ನಮ್ಮ ಸಮಾಜ, ರಾಜಕೀಯ, ಶಿಕ್ಷಣರಂಗ, ಸಂಸ್ಕೃತಿ, ವೈದ್ಯಕೀಯ ರಂಗ ಎಲ್ಲದರ ಬಗ್ಗೆ ವಾಸ್ತವ
ಚಿತ್ರಣವನ್ನು ನಿಷ್ಠುರವಾಗಿ, ನೇರನುಡಿಗಳಲ್ಲಿ ಹಿಡಿದಿಟ್ಟಿದ್ದಾರೆ. ಹೀಗಾಗಿ ನನಗೆ ಅವರ ಬರಹಗಳು ಇಷ್ಟವಾಗಿವೆ ಎಂದು‌ ಖಾರಬಾತ್ ಪುಸ್ತಕ‌ ಲೋಕಾರ್ಪಣೆಗೊಳಿಸಿ ಅವರು ಮಾತನಾಡಿದರು. ಪುಸ್ತಕ ಲೋಕಾರ್ಪಣೆ ಸಮಾರಂಭವನ್ನು ಸನ್ ಸ್ಪೆಷಾಲಿಟಿ ಆಸ್ಪತ್ರೆಯ ವೈದ್ಯಕೀಯ ನಿರ್ದೇಶಕ ,ಮೂಳೆ ಮತ್ತು ಬೆನ್ನುಹುರಿ ತಜ್ಞ ಡಾ.ಆಕಾಶ್ ಹೊಸತೋಟ
ಅವರು ಜ್ಯೋತಿ ಬೆಳಗಿಸಿ, ಭಾರತಾಂಬೆ, ಕನ್ನಡಾಂಬೆ ಹಾಗೂ ಸಾಯಿಬಾಬ ಗುರುಪೀಠಕ್ಕೆ ಪುಷ್ಪಾರ್ಚನೆ ಮಾಡಿ ಉದ್ಘಾಟಿಸಿದರು. ಸತ್ಸಂಗಕ್ಕೆ, ತರಬೇತಿ, ಸಮಾಜಕ್ಕೆ ಹಿತವೆನ್ನಿಸುವ ವಿಚಾರ ಸಂಕಿರಣಗಳಿಗೆ ‌ಸದಾ ಮೀಸಲಾಗಿರುವ ಈ ಸಭಾಂಗಣದಲ್ಲಿ ಖಾರ ಬಾತ್ ನಂತಹ ವೈವಿಧ್ಯ ಲೇಖನಗಳ ಸಂಕಲನ ಲೋಕಾರ್ಪಣೆಯು‌ ನನಗೆ
ಖುಷಿಕೊಟ್ಟಿದೆ ಎಂದು ಡಾ.ಆಕಾಶ್ ಹೇಳಿದರು. ಮುಖ್ಯ ಅತಿಥಿಗಳಾಗಿ‌‌’ ಕಗ್ಗ’ ಖ್ಯಾತಿಯ ಖ್ಯಾತ ವಾಗ್ಮಿ ಜಿ.ಎಸ್.ನಟೇಶ್, ಕೃತಿಕರ್ತ ಡಾ.ಸಿ.ಜಿ.ರಾಘವೇಂದ್ರ ವೈಲಾಯ, ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ತಿನ ಶಿವಮೊಗ್ಗ ಜಿಲ್ಲಾ ಶಾಖೆಯ ಅಧ್ಯಕ್ಷ ಡಾ.ಸುಧೀಂದ್ರ ಉಪಸ್ಥಿತರಿದ್ದರು.
ಒಂದು ಶ್ರೇಷ್ಠ ಕಾವ್ಯಕ್ಕೆ ಮನಸ್ಸನ್ನು ತೀವ್ರವಾಗಿ ತಟ್ಟುವುದು, ಹೊಸ ವಿಚಾರಗಳಿಗೆ ಪ್ರೇರಣೆ ನೀಡುವುದು ಮೊದಲಾದ ಹಲವು ಲಕ್ಷಣಗಳಿವೆ. ಅಂತಹ ತೀವ್ರತೆ, ಪ್ರೇರಣೆ, ಚಿಂತನ-ಮಂಥನಗಳು ಖಾರಬಾತ್ ಪುಸ್ತಕದ ಓದಿನಿಂದ ಸಿಗುತ್ತದೆ. ಹಲವು ಸಂಗತಿಗಳನ್ನಂತೂ ವೇದಕಾಲೀನ ಉಕ್ತಿಗಳಿಂದಲೂ, ಕನ್ನಡದ ಹಲವು ಜನಪ್ರಿಯ ನಾಣ್ಣುಡಿಗಳಿಂದಲೂ ಪರಿಣಾಮಕಾರಿಯಾಗಿ ನಿರೂಪಿಸಲಾಗಿದೆ ಎಂದು ಜಿ.ಎಸ್.ನಟೇಶ್ ತಮ್ಮ ಸೋದಾಹರಣ ಭಾಷಣದಲ್ಲಿ ತಿಳಿಸಿದರು.
ಲೇಖರಾಗಿ ಡಾ.ಸಿಜಿ.ರಾಘವೇಂದ್ರ ವೈಲಾಯರು ತಮ್ಮನ್ನು ತೀವ್ರವಾಗಿ ಕಾಡಿದ ವಿಚಾರಗಳು, ಸಾರ್ವಜನಿಕವಾಗಿ ಅವುಗಳ ಕುರಿತು ಚರ್ಚೆಗೆ ಇರುವ ಪ್ರತಿರೋಧ, ತಾತ್ವಿಕ ಜಿಜ್ಞಾಸೆಗಳು, ಹಲವಾರು ಐತಿಹಾಸಿಕ ಮತ್ತು ಪೌರಾಣಿಕ ತಥ್ಯಗಳ ತಪ್ಪು ನಿರೂಪಣೆಗಳ ಮುಂದುವರಿಕೆಯಿಂದ ದೇಶದಲ್ಲಿ ಭುಗಿಲೆದ್ದಿರುವ ವಾದ ವಿವಾದಗಳು ತಮ್ಮನ್ನು ಖಾರವಾಗಿಯೂ ನಿಷ್ಠುರವಾಗಿಯೂ ಬರೆಯುವಂತೆ ಮಾಡಿವೆ. ಎಲ್ಲೂ ಪರಿಣಾಮಗಳಿಗೆ ಭಯಪಟ್ಟು ನಾನು ನನ್ನ ವಿಚಾರ ಮತ್ತು ವಿಷಯ ನಿರೂಪಣೆಗಳಲ್ಲಿ ಕಿಂಚಿತ್ತೂ ರಾಜಿ ಇಲ್ಲದಂತೆ ವಸ್ತುವಿವರಣೆಗಳನ್ನು ಓದುಗರ ಮುಂದಿಟ್ಟುರುವೆ ಎಂದು ನುಡಿದರು.

ಪುಸ್ತಕ ಲೋಕಾರ್ಪಣೆ ,ಕವಿಗೋಷ್ಠಿ , ಕಾವ್ಯಕಮ್ಮಟ , ರಾಜ್ಯೋತ್ಸವ ಆಚರಣೆ ಮೂಲಕ ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ತು ಶಿವಮೊಗ್ಗ ಜಿಲ್ಲೆಯಲ್ಲಿ ಸಾಹಿತ್ಯ ಚಟುವಟಿಕೆಗಳನ್ನ ಆರಂಭಿಸಿದೆ.
ಈ ಮೂಲಕ ಭಾರತೀಯ ಸಾಹಿತ್ಯ,ಸಂಗೀತ, ಕಲೆ,ಸಂಸ್ಕೃತಿಯ ಜಾಗೃತಿ ಮೂಡಿಸುವ ಹಿನ್ನೆಲೆಯಲ್ಲಿ ವಿವಿಧ ಕಾರ್ಯಕ್ರಮಗಳನ್ನ ಆಯೋಜಿಸುವುದು ಪರಿಷತ್ತಿನ ಆಶಯವಾಗಿದೆ. ಸಹೃದಯರು ಪರಿಷತ್ತಿಗೆ ಸದಸ್ಯರಾಗುವ ಮೂಲಕ ತಮ್ಮ ಬೆಂಬಲ,ಸಹಕಾರ ನೀಡಬೇಕೆಂದು ಅಭಾಸಾಪ ಜಿಲ್ಲಾಧ್ಯಕ್ಷರಾದ ಡಾ.ಸುಧೀಂದ್ರ ಅವರು ಮನವಿ ಮಾಡಿದರು.
ಶ್ರೀಶಾರದಾ ಸಂಗೀತ ವಿದ್ಯಾಲಯದ ಗಾಯಕಿಯರು ವೈಲಾಯರು ರಚಿಸಿದ ಆಯ್ದ ಭಕ್ತಿ, ಭಾವ, ದೇಶಭಕ್ತಿ ಗೀತೆಗಳ ಗಾನಪ್ರಸ್ತುತಿಯ ಮೂಲಕ ಕಲಾಸಕ್ತರನ್ನು ರಂಜಿಸಿದರು. ಅಭಾಸಾಪದ ಉಪಾಧ್ಯಕ್ಷ ಡಾ.ಕೃಷ್ಣ ಎಸ್ ಭಟ್ ಅವರು ಎಲ್ಲರನ್ನೂ ಸ್ವಾಗತಿಸಿದರು. ಪುಸ್ತಕ‌ ಲೋಕಾರ್ಪಣೆಯನ್ನು ಬಾಣಸಿಗರ ಛದ್ಮವೇಷಧಾರಿಗಳು ವಿಶಾಲ ಕರಂಡಿಕೆಯಲ್ಲಿ ವೇದಿಕೆಗೆ ಪುಸ್ತಕಗಳನ್ನ ” ಲಘು ಉಪಾಹಾರ”ವನ್ನು ವಿತರಿಸುವಂತೆ ” ಖಾರ ಬಾತ್ ” ಪುಸ್ತಕಗಳನ್ನು ಒಂದೊಂದಾಗಿ ಅನಾವರಣಗೊಳಿಸಿದ ದೃಶ್ಯ ವಿನ್ಯಾಸ ಎಲ್ಲರಿಂದ ಮೆಚ್ಚುಗೆ ಪಡೆಯಿತು.
ಸಮಾರಂಭದಲ್ಲಿ ಮಧ್ಯಂತರವಾಗಿ ಸಾಹಿತ್ಯದ ಕುರಿತು ಹಲವು ರಸಪ್ರಶ್ನೆಗಳನ್ನು ಕೇಳಿ ಪುಸ್ತಕಗಳನ್ನು ಬಹುಮಾನವಾಗಿ ನೀಡಿ ನೆರೆದವರ ಮಸ್ತಕವನ್ನೂ ಪ್ರಚೋದಿಸಲಾಯ್ತು.
ಅಭಾಸಾಪದ ಕೋಶಾಧಿಕಾರಿ ಕೆ.ಜಿ.ಮಂಜುನಾಥ ಶರ್ಮರ ಆಭಾರ ಮನ್ನಣೆಯೊಂದಿಗೆ ಕಾರ್ಯಕ್ರಮವು ಸಂಪನ್ನಗೊಂಡಿತು.