Wednesday, November 18, 2026
Wednesday, November 18, 2026
Home Blog Page 999

Lok Sabha Election Shivamogga ಶಿವಮೊಗ್ಗ ಲೋಕಸಭಾ ಕ್ಷೇತ್ರ ಚುನಾವಣೆ 24, ಮೊದಲ ದಿನವೇ 06 ನಾಮಪತ್ರ ಸಲ್ಲಿಕೆ

0

Lok Sabha Election Shivamogga ಶಿವಮೊಗ್ಗ ಲೋಕಸಭಾ ಮತಕ್ಷೇತ್ರದ ಸಾರ್ವತ್ರಿಕ ಚುನಾವಣೆಗೆ ಇಂದಿನಿಂದ ನಾಮಪತ್ರ ಸಲ್ಲಿಕೆ ಆರಂಭವಾಗಿದ್ದು, ಮೊದಲ ದಿನವಾದ ಏ.12 ರಂದು ಒಟ್ಟು 06 ನಾಮಪತ್ರ ಸಲ್ಲಿಕೆ ಆಗಿವೆ.
ಕರ್ನಾಟಕ ರಾಷ್ಟ್ರ ಸಮಿತಿ ಪಕ್ಷದಿಂದ ಎಸ್.ಕೆ.ಪ್ರಭು, ಎಎಪಿ ಪಕ್ಷದಿಂದ ಸುಭಾನ್ ಖಾನ್, ಉತ್ತಮ ಪ್ರಜಾಕೀಯ ಪಕ್ಷದ ಅಭ್ಯರ್ಥಿಯಾಗಿ ಅರುಣ ಕೆ.ಎ, ಪಕ್ಷೇತರ ಅಭ್ಯರ್ಥಿಗಳಾಗಿ ಕೆ.ಎಸ್.ಈಶ್ವರಪ್ಪ ಮತ್ತು ರವಿಕುಮಾರ್ ಎಸ್ ನಾಮಪತ್ರ ಸಲ್ಲಿಸಿದರು. Lok Lok Sabha Election Shivamogga ಪಕ್ಷೇತರ ಅಭ್ಯರ್ಥಿ ಕೆ.ಎಸ್.ಈಶ್ವರಪ್ಪ ಪರವಾಗಿ ಸೂಚಕರು ಸಲ್ಲಿಸಿದ ನಾಮಪತ್ರಗಳು ಸೇರಿದಂತೆ ಇಂದು ಐದು ಅಭ್ಯರ್ಥಿಗಳಿಂದ ಒಟ್ಟು 06 ನಾಮಪತ್ರಗಳು ಸಲ್ಲಿಕೆಯಾಗಿವೆ.

Sacred Heart Church ಫಾದರ್ ಡುಮ್ಮಿಂಗ್ ಡಯಾಸ್ ಅವರಿಗೆ ಹಾರ್ದಿಕ ಬೀಳ್ಕೊಡುಗೆ

0

Sacred Heart Church ಶಿವಮೊಗ್ಗ ಧರ್ಮ ಕ್ಷೇತ್ರದ ಫಾದರ್ ಡುಮ್ಮಿಂಗ್ ಡಯಾಸ್ ರವರು ಕಾರವಾರ ಧರ್ಮ ಕ್ಷೇತ್ರದ ಧರ್ಮಾಧ್ಯಕ್ಷರಾಗಿ ನೇಮಕಗೊಂಡ ನಂತರ ಶಿವಮೊಗ್ಗದ ಸೆಕ್ರೆಡ್ ಹಾರ್ಟ್
ಕೆಥಡ್ರಲ್ ಸಭಾಂಗಣದಲ್ಲಿ ಬೀಳ್ಕೊಡುಗೆ ಸಮಾರಂಭ ಏರ್ಪಡಿಸಲಾಗಿತ್ತು.

Sacred Heart Church ಈ ಸಂದರ್ಭದಲ್ಲಿ ಶಿವಮೊಗ್ಗ ಜಿಲ್ಲಾ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಹಾಗೂ ಕ್ರೈಸ್ತ ಮುಖಂಡರಾದ ಎಸ್. ಚಿನ್ನಪ್ಪನವರು,ಪಾಲನಾ ಪರಿಷತ್ ಸದಸ್ಯರಾದ ಸನ್ನಿ ಮಾರ್ಸಿಲಾ,ರೋಷನ್ ಪೆರೆರಾ,ಮಾರ್ಕ್ ಡಿಕಾಸ್ಟ,ಮೆಲ್ವಿನ್ ಸಂಜಯ್,ಸುಸೈ ನಾದನ್ ಅವರು ಸನ್ಮಾನಿಸಿದರು.

K.S.Eshwarappa ಈಶ್ವರಪ್ಪ ,ಆಸ್ತಿ ವಿವರ ಘೋಷಣೆ.₹10 ಕೋಟಿಗೂ ಮೀರಿ ಸ್ಥಿರಾಸ್ತಿ

0

K.S.Eshwarappa ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಬಿಜೆಪಿ ಬಂಡಾಯ ಅಭ್ಯರ್ಥಿಯಾಗಿ ಸ್ಪರ್ಧಿಸುತ್ತಿರುವ ‌ಈಶ್ವರಪ್ಪ ಅವರು ತಮ್ಮ ಆಸ್ತಿ ವಿವರವನ್ನು ಚುನಾವಣೆ ಅಧಿಕಾರಿಗಳಿಗೆ ನೀಡಿದ್ದಾರೆ. ಇಂದು ನಾಮಪತ್ರ ಸಲ್ಲಿಸಿದ ಈಶ್ವರಪ್ಪ ಆಯೋಗಕ್ಕೆ ತಮ್ಮ ಆಸ್ತಿ ವಿವರಣೆಯನ್ನ ಪ್ರಕಟಿಸಿದ್ದಾರೆ.
ಅವರ ಹೆಸರಿನಲ್ಲಿ 98 ಲಕ್ಷದ 92 ಸಾವಿರದ 20 ರೂ ಹೊಂದಿದ್ದಾರೆ. ಪತ್ನಿ ಜಯಲಕ್ಷ್ಮಿ ಹೆಸರಿನಲ್ಲಿ 35 ಲಕ್ಷ 50 ಸಾವಿರದ 20 ರೂ. ಹೊಂದಿದ್ದಾರೆ. ಈಶ್ವರಪ್ಪ ಅವರ ಕೈಯಲ್ಲಿ ಇರುವ ನಗದು 25 ಲಕ್ಷ ರೂ.ಪತ್ನಿ ಜಯಲಕ್ಷ್ಮಿ ಅವರ ಕೈಯಲ್ಲಿ ಇರುವ ನಗದು 2 ಲಕ್ಷ ಎಂದು ಸಲ್ಲಿಸಿದ್ದಾರೆ.
ಈಶ್ವರಪ್ಪ ಹೆಸರಿನಲ್ಲಿ ಬಂಗಾರ 300 ಗ್ರಾಂ, ಬೆಳ್ಳಿ 2 ಕೆ.ಜಿ ಸಾಮಾಗ್ರಿಗಳನ್ನ ಹೊಂದಿದ್ದಾರೆ. ಪತ್ನಿ ಜಯಲಕ್ಷ್ಮಿ ಹೆಸರಿನಲ್ಲಿ ಬಂಗಾರ 500 ಗ್ರಾಂ, ಬೆಳ್ಳಿ 5 ಕೆ.ಜಿ. ಹೊಂದಿದ್ದಾರೆ.
ಈಶ್ವರಪ್ಪ ಹೆಸರಿನಲ್ಲಿ ನಿದಿಗೆ ಗ್ರಾಮದ ಬಳಿ 1 ಎಕರೆ31 ಗುಂಟೆ ಕೃಷಿ ಭೂಮಿ ಹೊಂದಿದ್ದಾರೆ. ಕೃಷಿಯೇತರ ಭೂಮಿ 4 ಎಕರೆ 24 ಗುಂಟೆ ಹೊಂದಿದ್ದಾರೆ. ಬೆಂಗಳೂರಿನ‌ ಜಯನಗರದಲ್ಲಿ ನಿವೇಶನ, ಶಿವಮೊಗ್ಗದಲ್ಲಿ ವಾಸದ ಮನೆ ಹೊಂದಿದ್ಷಾರೆ.

K.S.Eshwarappa ಈಶ್ವರಪ್ಪ ಹೆಸರಿನಲ್ಲಿ 5 ಕೋಟಿ 87 ಲಕ್ಷದ 39 ಸಾವಿರ ಸಾಲ ತೋರಿಸಲಾಗಿದೆ. ಪತ್ನಿ ಜಯಲಕ್ಷ್ಮಿ ಹೆಸರಿನಲ್ಲಿ 70 ಲಕ್ಷದ 80 ಸಾವಿರದ 13 ಸಾವಿರ ರೂ. ಈಶ್ವರಪ್ಪ ಅವರ ಹೆಸರಿನಲ್ಲಿ ಚರಾಸ್ಥಿ 4 ಕೋಟಿ 28 ಲಕ್ಷದ 61 ಸಾವಿರ ರೂ. ಹೊಂದಿದ್ದಾರೆ. 3 ಕೋಟಿ 77 ಲಕ್ಷದ 34 ಸಾವಿರ ರೂ. ಪತ್ನಿ ಜಯಲಕ್ಷ್ಮಿ ಹೆಸರಿನಲ್ಲಿ ಚರಾಸ್ಥಿ‌ ಇದೆ.
ಈಶ್ವರಪ್ಪ ಹೆಸರಿನಲ್ಲಿ ಸ್ಥಿರಾಸ್ಥಿ‌ 10 ಕೋಟಿ 95 ಲಕ್ಷದ 59 ಸಾವಿರ ರೂ‌ ಮೌಲ್ಯವಿದ್ದರೆ. ಪತ್ನಿ ಜಯಲಕ್ಷ್ಮಿ ಹೆಸರಿನಲ್ಲಿ ಸ್ಥಿರಾಸ್ಥಿ 7 ಲಕ್ಷದ 31 ಸಾವಿರವಿದೆ.‌ ತಮ್ಮ ಐದು ವರ್ಷಗಳ ಆದಾಯವನ್ನ ತೋರಿಸಿರುವ ಈಶ್ವರಪ್ಪ 2018-19 ರಲ್ಲಿ 34,88,380 ರೂ. ಆದಾಯವಿದೆ ಎಂದು ತೋರಿಸಿದರೆ 2019-20 ರಲ್ಲಿ 74,35,520ರೂ.ಎಂದು ತೋರಿಸಿದ್ದಾರೆ.

2020-21 ರಲ್ಲಿ 54,50,390 ರೂ. 2021-22 ರಲ್ಲಿ 88,35,420 ರೂ. ಇದ್ದರೆ 2022-23 ರಲ್ಲಿ 98,92,200 ರು ಆದಾಯ ಎಂದು ಘೋಷಿಸಿಕೊಂಡಿದ್ದಾರೆ. ವರ ವಿರುದ್ಧ ಯಾವುದೇ ಎಫ್ಐಆರ, ಯಾವುದೇ ಅಪರಾಧಗಳು ಇಲ್ಲ ಎಂದು ಘೋಷಿಸಿಕೊಂಡಿದ್ದಾರೆ

K.S.Eshwarappa ಅಪಾರ ಬೆಂಬಲಿಗರೊಡನೆ ಸಾಗಿ,ನಾಮಪತ್ರ ಸಲ್ಲಿಸಿದ ಹಿಂದೂಹುಲಿ ಈಶ್ವರಪ್ಪ

0

K.S.Eshwarappa ಲೋಕಸಭಾ ಕ್ಷೇತ್ರದ ಬಿಜೆಪಿ ಬಂಡಾಯ ಅಭ್ಯರ್ಥಿ ಕೆ.ಎಸ್ ಈಶ್ವರಪ್ಪ ಸಾವಿರಾರು ಬೆಂಬಲಿಗರೊಡನೆ ತಮ್ಮ ನಾಮಪತ್ರ ಸಲ್ಲಿಸಿದ್ದು, ಕಣದಲ್ಲಿ ಉಳಿಯುವ ತಮ್ಮ ತಮ್ಮ ನಿರ್ಧಾರವನ್ನು ಪ್ರಬಲವಾಗಿ ಪ್ರತಿಪಾದಿಸಿದ್ದಾರೆ.
ತಮ್ಮ ಸ್ಪರ್ಧೆಯ ಬಗ್ಗೆ ಅನುಮಾನ ವ್ಯಕ್ತಪಡಿಸುವವರಿಗೆ ಇವತ್ತಿನ ಮೆರವಣಿಗೆಯೇ ಉತ್ತರ ಎಂದು ಈಶ್ವರಪ್ಪ ಎದಿರೇಟು ನೀಡಿದರು. ಒಂದೇ ಕುಟುಂಬದ ಅಪ್ಪ ಮಕ್ಕಳ ಕೈಯಲ್ಲಿ ಪಕ್ಷ ಏಕೆ ಇದೆ. ಈ ಚುನಾವಣೆಯಲ್ಲಿ ನಾನು ಗೆಲ್ಲುತ್ತೇನೆ. ಚುನಾವಣೆ ಗೆದ್ದ ನಂತರ ಬಿಜೆಪಿಯಲ್ಲಿ ಕೆಲವು ಬದಲಾವಣೆ ಆಗಲಿದೆ. ಪಕ್ಷ ಶುದ್ಧೀಕರಣ ಆಗುವ ವಿಶ್ವಾಸ ಇದೆ. ನನ್ನ ಸ್ಪರ್ಧೆ ಗ್ಯಾರಂಟಿಗೆ ಜನಸಾಗರವೇ ಸಾಕ್ಷಿ ಎಂದು ಕೆ ಎಸ್ ಈಶ್ವರಪ್ಪ ಹೇಳಿದ್ದಾರೆ.
ಬಿಜೆಪಿ ಬಂಡಾಯ ನಾಯಕರಾಗಿ ಸಲ್ಲಿಸಿರುವ ಈಶ್ವರಪ್ಪ ನಾಮಪತ್ರ ಸಲ್ಲಿಕೆ ನಂತರ ಮಾಧ್ಯಮಗಳ ಜೊತೆ ಅವರು ಮಾತನಾಡಿದರು.
ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಪಕ್ಷೇತರ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಿ ಬಂದಿದ್ದೇನೆ. ನಾಮಪತ್ರ ಸಲ್ಲಿಕೆಗೆ ಮೊದಲು ಬೆಂಬಲಿಗರು ಮೆರವಣಿಗೆ ನಡೆಸಿದರು. ನಮ್ಮ ಕಾರ್ಯಕರ್ತರು ಪ್ರತಿ ಮನೆ ಮನೆಗೆ ಹೋಗಿ ಈಶ್ವರಪ್ಪ ಏಕೆ ಚುನಾವಣೆಗೆ ನಿಂತಿದ್ದಾರೆ ಅವರಿಗೆ ಏನು ಅನ್ಯಾಯ ಆಗಿದೆ ಅಂತಾ ತಿಳಿಸುತ್ತಾರೆ ಎಂದರು.
ಕೇವಲ ಎಂಪಿ ಆಗಲು ನಾನು ಸ್ಪರ್ಧೆ ಮಾಡಿಲ್ಲ. ಹಾಲಿ ಸಂಸದ ರಾಘವೇಂದ್ರ ಈ ಬಾರಿಯ ಲೋಕಸಭಾ ಚುನಾವಣೆಯಲ್ಲಿ ಸೋಲುತ್ತಾರೆ. ಈ ಚುನಾವಣೆ ಬಳಿಕ ವಿಜಯೇಂದ್ರ ರಾಜ್ಯಾಧ್ಯಕ್ಷ ಸ್ಥಾನ ಕಳೆದುಕೊಳ್ಳುತ್ತಾರೆ ಎಂದರು.
ಮೆರವಣಿಗೆ:
K.S.Eshwarappa ಶಿವಮೊಗ್ಗ ನಗರದ ರಾಮಣ್ಣಶ್ರೇಷ್ಠಿ ಪಾರ್ಕ್ನ ಗಣಪತಿ ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸುವ ಮೂಲಕ ಮೆರವಣಿಗೆ ಮೂಲಕ ಜಿಲ್ಲಾಧಿಕಾರಿಗಳ ಕಚೇರಿಗೆ ಕುಟುಂಬ ಸಮೇತ ಆಗಮಿಸಿದ ಈಶ್ವರಪ್ಪ ನಾಮಪತ್ರ ಸಲ್ಲಿಸಿದರು. ಮೆರವಣಿಗೆ ವಾಹನದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಪೋಟೋ ಹಾಕಲಾಗಿತ್ತು. ಮೆರವಣಿಗೆಯಲ್ಲಿ ಸಾವಿರಾರು ಜನ ಪಾಲ್ಗೊಂಡಿದ್ದು, ಕೇಸರಿ ಧ್ವಜ, ಹಿಂದೂತ್ವ ಪರ ಘೋಷಣೆಗಳು ಮೊಳಗಿದ್ದವು.

Narendra Modi ಮೋದಿ ಹೋಲಿಕೆಯ ಮನುಷ್ಯ ಈಶ್ವರಪ್ಪನವರಿಗೆ ಮೆರವಣಿಗೆಯಲ್ಲಿ ಸಾಥ್! ಒಂದು ಕ್ಷಣ ಜನ ತಬ್ಬಿಬ್ಬು

0

Narendra Modi ಚುನಾವಣಾ ಪ್ರಚಾರಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರ ಫೋಟೊ ಬಳಕೆ ಮಾಡಬಾರದು ಎಂದು ಬಿಜೆಪಿಯಿಂದ ಒತ್ತಡವಿತ್ತು. ನಾಮಪತ್ರ ಸಲ್ಲಿಕೆ ಮೆರವಣಿಗೆಯಲ್ಲಿ ಮೋದಿ ಫೋಟೊಗಳಿದ್ದ ಧ್ವಜಗಳು ರಾರಾಜಿಸಿದವು. ಅಲ್ಲದೆ, ಮೋದಿಯ ತದ್ರೂಪಿಯೊಬ್ಬರು ಮೆರವಣಿಗೆಯಲ್ಲಿ ಕಾಣಿಸಿಕೊಂಡಿದ್ದು ಜನರಲ್ಲಿ ಅಚ್ಚರಿ ಮೂಡಿಸಿದರು.

ರಾರಾಜಿಸಿದ ಮೋದಿ ಫೊಟೋಗಳು
ನಾಮಪತ್ರ ಸಲ್ಲಿಕೆ ಹಿನ್ನೆಲೆ ಬೆಂಬಲಿಗರ ಮೆರವಣಿಗೆ ಆಯೋಜಿಸಲಾಗಿತ್ತು. ಪ್ರಧಾನಿ ನರೇಂದ್ರ ಮೋದಿ ಅವರ ಭಾವಿಚಿತ್ರವಿರುವ ಧ್ವಜಗಳು ರಾರಾಜಿಸಿದವು. ಈಶ್ವರಪ್ಪ ಅವರ ಬೆಂಬಲಿಗರು ಮೆರವಣಿಗೆ ಉದ್ದಕ್ಕೂ ಮೋದಿ ಅವರ ಭಾವಚಿತ್ರವಿರುವ ಧ್ವಜಗಳನ್ನು ಹಿಡಿದು ಸಾಗಿದರು.

ಮೆರವಣಿಗೆಯಲ್ಲಿ ಮೋದಿ ಪ್ರತ್ಯಕ್ಷ

Narendra Modi ಮತ್ತೊಂದೆಡೆ ಮೆರವಣಿಗೆಯಲ್ಲಿ ಪ್ರಧಾನಿ ಮೋದಿ ಅವರ ತದ್ರೋಪಿ ವ್ಯಕ್ತಿಯೊಬ್ಬರು ಕಾಣಿಸಿಕೊಂಡು ಜನರಲ್ಲಿ ಅಚ್ಚರಿ ಮೂಡಿಸಿದರು. ಎಲ್ಲರತ್ತ ಕೈ ಬೀಸುತ್ತ, ನಮಸ್ಕರಿಸುತ್ತ ತೆರದ ವಾಹನದಲ್ಲಿ ಸಾಗಿದರು. ಜನರು ಮೋದಿ ಅವರೆ ಮೆರವಣಿಗೆಯಲ್ಲಿ ಭಾಗಿಯಾಗಿದ್ದಾರೆ ಎಂದು ಭಾವಿಸಿದರು. ಮೋದಿ ಅವರನ್ನು ಹೋಲುವ ಇವರು ಉಡುಪಿ ಜಿಲ್ಲೆ ಹಿರಿಯಡ್ಕದ ಸದಾನಂದ ನಾಯಕ್‌. ಈಶ್ವರಪ್ಪ ಅವರ ನಾಮಪತ್ರ ಸಲ್ಲಿಕೆ ಮೆರವಣಿಗೆಗೆ ಸದಾನಂದ ನಾಯಕ್‌ ಅವರನ್ನು ಕರೆತಂದಿದ್ದು ಗಮನ ಸೆಳೆಯಿತು.
ಮೋದಿ ಅವರಪ್ಪನ ಮನೆ ಆಸ್ತಿಯಲ್ಲ
ಸುದ್ದಿಗಾರರೊಂದಿಗೆ ಮಾತನಾಡಿದ ಈಶ್ವರಪ್ಪ, ಮೋದಿ ಭಾವಚಿತ್ರ ಬಳಸಬಾರದು ಎಂದರು. ಮೋದಿ ಇವರಪ್ಪನ ಮನೆ ಆಸ್ತಿಯೇನು? ಇಡೀ ವಿಶ್ವನಾಯಕ. ಯಡಿಯೂರಪ್ಪ, ವಿಜಯೇಂದ್ರ ಮತ್ತು ರಾಘವೇಂದ್ರ ಅವರು ಮೂವರದ್ದೇ ಫೋಟೊ ಹಾಕಿಕೊಂಡು ಪ್ರಚಾರ ಮಾಡಲಿ. ಎಷ್ಟು ಮತ ಪಡೆಯುತ್ತಾರೆ ನೋಡೋಣ. ಇವತ್ತು ಮೋದಿ ಅವರಂತೆ ಕಾಣುವ ವ್ಯಕ್ತಿ ಬಂದಿದ್ದರು. ಹಾಗಾಗಿ ಮೋದಿ ಅವರೆ ಬಂದು ಇಲ್ಲಿ ಆಶೀರ್ವಾದ ಮಾಡಿದಂತಾಗಿದೆ ಎಂದರು

Madhu Bangarappa ಈ ಬಾರಿ ಖಂಡಿತ ಕೇಂದ್ರದಲ್ಲಿ ಕಾಂಗ್ರೆಸ್ ಸರ್ಕಾರ ರಚನೆಯಾಗುತ್ತದೆ- ಮಧು ಬಂಗಾರಪ್ಪ

0

Madhu Bangarappa ಗೀತಾ ಶಿವರಾಜ್ ಕುಮಾರ್ ಅವರ ಬಗ್ಗೆ ಮಾತನಾಡುವ ಹಕ್ಕು ಸಂಸದ ರಾಘವೇಂದ್ರ ಅವರಿಗಿಲ್ಲ. ಗೀತಕ್ಕನ ಪ್ರಚಾರ ಜೋರಾಗಿದ್ದು, ಮನೆಮಗಳಂತೆ ಎಲ್ಲರೂ ಸ್ವಾಗತಿಸುತ್ತಿದ್ದಾರೆ. ಅತಿ ಹೆಚ್ಚು ಮತಗಳ ಅಂತರದಿAದ ಅವರು ಗೆದ್ದೇ ಬರುತ್ತಾರೆ ಎಂದು ಸಚಿವ ಮಧು ಬಂಗಾರಪ್ಪ ಹೇಳಿದರು.
ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಂಸದ ರಾಘವೇಂದ್ರ ಅವರಿಗಿಂತ ಮೊದಲೆ ನಾನು ಅವರ ಅಪ್ಪ ಬಿ.ಎಸ್. ಯಡಿಯೂರಪ್ಪನವರ ಪರ ಚುನಾವಣಾ ಪ್ರಚಾರ ಮಾಡಿದ್ದೆ ಎಂಬುದು ಅವರಿಗೆ ನೆನಪಿರಲಿ ಎಂದರು.
ಕ್ಷೇತ್ರದಲ್ಲಿ ಈಗಾಗಲೇ ಒಳ್ಳೆಯ ಪ್ರಚಾರ ಮಾಡುತ್ತಿದ್ದೇವೆ. ಗೀತಾ ಮತ್ತು ಶಿವರಾಜ್‌ಕುಮಾರ್ ಪ್ರತಿದಿನ ೧೬-೧೭ ಗ್ರಾಪಂ ವ್ಯಾಪ್ತಿಯಲ್ಲಿ ಚುನಾವಣಾ ಪ್ರಚಾರ ಮಾಡುತ್ತಿದ್ದಾರೆ. ಮೊದ ಮೊದಲು ನಾನು ಅವರ ಜೊತೆ ಹೋಗುತ್ತಿದ್ದೆ. ಈಗ ಅವರೇ ಸಮರ್ಥವಾಗಿ ಪ್ರಚಾರ ಕಾರ್ಯದಲ್ಲಿ ತೊಡಗಿದ್ದಾರೆ ಎಂದರು.
ಯಾವುದೇ ಚುನಾವಣೆಗಳು ಜನರ ಮೇಲೆ ಒತ್ತಡ ತರಬಾರದು. ಒತ್ತಡ ಹಾಕಿ ಮತ ಪಡೆಯ ಬಾರದು. ಜನರೇ ಸ್ವತಂತ್ರವಾಗಿ ನಿರ್ಧರಿಸಿ ಸರ್ಕಾರ ರಚನೆಗೆ ಕಾರಣವಾಗ ಬೇಕು. ಕಾಂಗ್ರೆಸ್ ಪಕ್ಷದ ಸಿದ್ಧಾಂತಗಳನ್ನು ಜನರು ಒಪ್ಪಿಕೊಂಡಿದ್ದಾರೆ. ಈ ಬಾರಿ ಕೇಂದ್ರದಲ್ಲಿ ಖಂಡಿತಾ ಕಾಂಗ್ರೆಸ್ ಸರ್ಕಾರ ರಚನೆಯಾಗುತ್ತದೆ ಎಂದರು.
ಕರ್ನಾಟಕದಲ್ಲಿ ಬರಗಾಲ ಬಂದು ಕುಡಿಯುವ ನೀರಿಗೂ ಸಂಕಷ್ಟವಾದರೂ ಕೇಂದ್ರಕ್ಕೆ ಕರುಣೆ ಬರಲಿಲ್ಲ. ರಾಜ್ಯಕ್ಕೆ ಬರಬೇಕಾದ ಅನುದಾನ ಕೇಳಲು ಕೋರ್ಟ್ಗೆ ಹೋಗಬೇಕಾದ ಅನಿವಾರ್ಯತೆ ಸೃಷ್ಟಿಸಿದ್ದಾರೆ. ಕೋರ್ಟ್ ಕೂಡ ಛೀಮಾರಿ ಹಾಕಿದರೂ ಇವರಿಗೆ ನಾಚಿಕೆ ಇಲ್ಲ ಎಂದರು.
Madhu Bangarappa ಕರ್ನಾಟಕದ ಬಿಜೆಪಿ ಸಂಸದರು ರಾಜ್ಯದ ಪರಿಸ್ಥಿತಿ ಬಗ್ಗೆ ಒಂದೇ ಒಂದು ಮಾತನಾಡಲಿಲ್ಲ. ಆದರೆ ಇಂತಹ ಸಂಕಷ್ಟದ ಸಂದರ್ಭ ದಲ್ಲೂ ಕೂಡ ಕೇಂದ್ರ ಸರ್ಕಾರ ರಾಜ್ಯಕ್ಕೆ ಬರಬೇಕಾದ ೧.೫೬ ಲಕ್ಷ ಕೋಟಿ ರೂ.ಗಳನ್ನು ನೀಡಿಲ್ಲ. ಇದಕ್ಕೆಲ್ಲ ಮತದಾರ ಚುನಾವಣೆಯಲ್ಲಿ ಉತ್ತರ ಕೊಡುತ್ತಾನೆ ಎಂದರು.

B.Y.Raghavendra ನಮ್ಮ ಹಣ ಕಿತ್ತುಕೊಂಡು ಗ್ಯಾರಂಟಿ ನೀಡುತ್ತಿದ್ದಾರೆ ಎಂದು ಮಹಿಳೆಯರೇ ಹೇಳುತ್ತಿದ್ದಾರೆ- ಬಿ.ವೈ.ರಾಘವೇಂದ್ರ

0

B.Y.Raghavendra ಈ ಚುನಾವಣೆಯಲ್ಲಿ ಕಾಂಗ್ರೆಸ್‌ನ ಗ್ಯಾರಂಟಿಗಳ ಆಟ ನಡೆಯುವುದಿಲ್ಲ ಎಂದು ಸಂಸದ ಬಿ ವೈ ರಾಘವೇಂದ್ರ ಹೇಳಿದರು.
ಶುಕ್ರವಾರ ಆದಿಚುಂಚನಗಿರಿ ಮಠಕ್ಕೆ ಭೇಟಿ ಕಾಲಭೈರವೇಶ್ವರ ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸಿದ ಬಳಿಕ ಸುದ್ದಿಗಾರರೊಂದಿಗೆ ಅವರು ಮಾತನಾಡಿದರು.
ಗ್ಯಾರಂಟಿಗೆ ಬೆಲೆ ಇಲ್ಲವಾಗಿದೆ. ಕ್ಷೇತ್ರದಲ್ಲಿ ಪ್ರವಾಸ ಮಾಡಿದ ಸಂದರ್ಭದಲ್ಲಿ ಕಾಂಗ್ರೆಸ್ ಸರಕಾರದ ಗ್ಯಾರಂಟಿಗಳಿಗೆ ಬೆಲೆ ಇಲ್ಲ ಎಂಬುದು ಗೊತ್ತಾಗಿದೆ. ನಮ್ಮ ಸಭೆಗಳಲ್ಲಿ ಮಹಿಳೆಯರು ಗಣನೀಯ ಪ್ರಮಾಣದಲ್ಲಿ ಸೇರುತ್ತಿರುವುದೇ ಇದಕ್ಕೆ ಸಾಕ್ಷಿ. ನಮ್ಮ ಹಣ ಕಿತ್ತುಕೊಂಡು ಗ್ಯಾರಂಟಿ ನೀಡುತ್ತಿದ್ದಾರೆ ಎಂದು ಸಭೆಗಳಲ್ಲಿ ಮಹಿಳೆಯರೇ ಈ ಬಗ್ಗೆ ಹೇಳುತ್ತಿದ್ದಾರೆ ಎಂದರು.
ರಾಜ್ಯದಲ್ಲಿ ಬರಗಾಲ ತೀವ್ರವಾಗಿದೆ. ಸರಕಾರ ಕೇಂದ್ರದಿಂದ ಬರಪರಿಹಾರ ಬಂದಿಲ್ಲ ಎಂದು ಹೇಳುತ್ತಿದೆಯೇ ವಿನಾ ತನ್ನ ಜವಾಬ್ದಾರಿಯನ್ನು ಪೂರೈಸುತ್ತಿಲ್ಲ ನೆರೆಗೆ ಕೇಂದ್ರದಿಂದ ಅನುದಾನ ಬಾರದಿದ್ದರೂ ಈ ಹಿಂದೆ ಬಿಜೆಪಿ ಸರಕಾರ ರಾಜ್ಯ ಸರಕಾರದಿಂದಲೇ ರೈತರ ನೆರವಿಗೆ ಬಂದಿದ್ದರು. ಆದರೆ ಇಂದಿನ ಕಾಂಗ್ರೆಸ್ ಸರಕಾರ ಕೇಂದ್ರದ ಮೇಲೆ ಗೂಬೆ ಕೂರಿಸುತ್ತಿದೆ
ಕೈಲಾಗದವರು ಮೈ ಪರಚಿಕೊಂಡರು ಎಂದು ಸಿದ್ದರಾಮಯ್ಯ ಸರಕಾರ ಬರೀ ಕೇಂದ್ರದತ್ತ ಬೊಟ್ಟು ಮಾಡುತ್ತಿರುವುದು ಖಂಡನೀಯ ಎಂದು ಹೇಳಿದರು.
B.Y.Raghavendra ಪ್ರಧಾನಿ ರಾಜ್ಯಕ್ಕೆ ಭೇಟಿ ನೀಡುವುದರ ಬಗ್ಗೆ ಪ್ರಸ್ತಾಪಿಸಿದ ಅವರು, ರಾಜ್ಯಕ್ಕೆ ಪ್ರಧಾನಿ ನರೇಂದ್ರ ಮೋದಿ ಎಷ್ಟು ಸಾರಿ ಬಂದರೂ ನಮಗೆ ಒಳ್ಳೆಯದೆ, ಅವರು ಭೇಟಿಯಿಂದ ಕಾರ್ಯಕರ್ತರಲ್ಲಿ ಹುಮ್ಮಸ್ಸು ಮೂಡುತ್ತದೆ. ಪ್ರಧಾನಿ ಭೇಟಿಯಿಂದ ರಾಜ್ಯದ ಸಾಮಾನ್ಯ ಜನರು ಮತ್ತು ಬಿಜೆಪಿ ಕಾರ್ಯರ್ತರಲ್ಲಿ ಹೊಸ ಉತ್ಸಾಹ ಮೂಡಲಿದೆ ಎಂದರು.

Rameswaram Cafe ಬಾಂಬ್ ಬ್ಲಾಸ್ಟರ್ & ಮಾಸ್ಟರ್ ಮೈಂಡ್ ಈರ್ವರೂ ಈಗ ಅಂದರ್: ಫಲಪ್ರದ ಎನ್ಐಎ ಕಾರ್ಯಾಚರಣೆ

0

Rameswaram Cafe ರಾಮೇಶ್ವರಂ ಕೆಫೆ ಸ್ಪೋಟ ಪ್ರಕರಣದ ಇಬ್ಬರು ಉಗ್ರರರನ್ನು ಎನ್ ಐಎ ವಶಕ್ಕೆ ಪಡೆದಿದೆ. ಮುಸಾವೀರ್ ಮತ್ತು ಮತೀನ್ ಅವರನ್ನು ಕೊಲ್ಕತಾದ ಹೊರವಲಯದ ಪೂರ್ವ ಮಿಡ್ನಾಪುರ ದಿಘಾ ಎಂಬಲ್ಲಿ ಪತ್ತೆ ಹಚ್ಚಿ ಅರೆಸ್ಟ್ ಮಾಡಲಾಗಿದೆ.
ನಕಲಿ ದಾಖಲೆ ನೀಡಿ ಬಾಡಿಗೆ ಮನೆ ಪಡೆದು ವಾಸ್ತವ್ಯ ಹೂಡಿದ್ದ ಇಬ್ವರು ಉಗ್ರರು ಹೆಸರು ಕೂಡ ಬದಲಿಸಿಕೊಂಡು ವಾಸವಿದ್ದರು. ಉಗ್ರರಾದ ಅಬ್ದುಲ್ ಮತೀನ್ ತಾಹಾ ಹಾಗೂ ಮುಸಾವಿರ್ ಹುಸೇನ್ ಶಾಜಿಬ್ ಇಬ್ವರೂ ನಿದ್ದೆಯಲ್ಲಿರುವಾಗ ಪತ್ತೆಹಚ್ಚಲಾಗಿದೆ.
ಎನ್ ಐಎ ಅಧಿಕಾರಿಗಳು ಉಗ್ರರ ವಾಸ್ತವ್ಯ ಪತ್ತೆ ಹಚ್ಚಿದ್ದರು.ಇಂದು ಬೆಳಗ್ಗಿನ ಜಾವ 2.30 ರ ಸುಮಾರಿಗೆ ಉಗ್ರರಿಂದ ಮನೆ ಮೇಲೆ ದಾಳಿ ನಡೆಸಲಾಗಿದೆ. ನಿದ್ದೆಯಲ್ಲಿದ್ದ ಇಬ್ಬರು ಉಗ್ರರನ್ನು ವಶಕ್ಕೆ ಪಡೆಯಲಾಗಿದೆ.
ಎನ್ ಐಎ ಅಧಿಕಾರಿಗಳಿಂದ ಇಬ್ಬರನ್ನು ತೀವ್ರ ವಿಚಾರಣೆಗೊಳಪಡಿಸಲಾಗಿದೆ. ಸ್ಥಳೀಯ ನ್ಯಾಯಾಲಯಕ್ಕೆ ಎನ್ ಐಎ ತಂಡ ಹಾಜರು ಪಡಿಸಲಿದೆ. ಬಳಿಕ ಬೆಂಗಳೂರಿಗೆ ಕರೆತರಲಾಗುವುದು.
Rameswaram Cafe ಇಂದು ಸಂಜೆ 6 ಗಂಟೆಗೆ ಉಗ್ರರನ್ನು ಬೆಂಗಳೂರಿಗೆ ಕರೆತರುವ ಸಾಧ್ಯತೆವಿದೆ. . ಸಂಜೆ 6 ಗಂಟೆಗೆ ದೇವನಹಳ್ಳಿ ಕೆಂಪೇಗೌಡ ಇಂಟರ್ ನ್ಯಾಷನಲ್ ಏರ್ ಪೋರ್ಟ್ ಗೆ ಎನ್ ಐ ಎ ಅಧಿಕಾರಿಗಳು ಉಗ್ರರರನ್ನು ಕರೆತರಲಿದ್ದಾರೆ. ತಲೆಮೆಸಿಕೊಂಡಿದ್ದ ಮತೀನ್ ಅನೇ ಕ ವರ್ಷಗಳ ನಂತರ ಪತ್ತೆಯಾಗಿದ್ದಾನೆ.

Dr. Rajkumar ಸಂಗೀತದಲ್ಲಿ ಮಿಂದೆದ್ದ ಸಿರಿ ಕಂಠ ,ಡಾ.ರಾಜ್ ಕುಮಾರ್

0

Dr. Rajkumar ಡಾ. ರಾಜ್ ನಮ್ಮನ್ನು ಅಗಲಿ ಆಗಲೇ 18 ವರ್ಷವಾಯಿತು. ಏ.12 ಅವರ ಸ್ಮರಣೆಯ ದಿನ.

ನಾವು ಸಾಂತ್ವನ ಮತ್ತು ಸಮಾಧಾನ ಪಡೆಯಲು ಪದೇ ಪದೇ ಹಾಡಿಕೊಳ್ಳುವ, ಬಿಕ್ಕುತ್ತಲೇ ಹಾಡಿ ಕಣ್ಣೀರಾಗುವ ಅಮರಗೀತೆ ಹೊಸಬೆಳಕು ಚಿತ್ರದ “ಕಣ್ಣೀರ ಧಾರೆ ಇದೇಕೆ, ಇದೇಕೆ?” ಇದು ಲಲಿತ್ ರಾಗಾಧಾರಿತ. ಕರ್ನಾಟಕ ಸಂಗೀತದಲ್ಲಿ ಇದರ ಸಂವಾದಿ ರಾಗ ಶುಭಪಂತುವರಾಳಿ. ವಿಷಾದ ಮತ್ತು ಸಾಂತ್ವನ ಎರಡೂ ಒಟ್ಟಿಗೆ ಬೆರೆತ ವಿಶಿಷ್ಟ ಸಂಯೋಜನೆ. ಭೀಮ್‌ಪಲಾಸಿ ರಂಗರಾವ್ ಎಂದು ಖ್ಯಾತರಾಗಿದ್ದ ಎಂ. ರಂಗರಾವ್ ಅವರ ಅನನ್ಯ ಸಂಯೋಜನೆ. ‘ಏಕ್ ಶಹನ್ ಶಾಹ್‌ನೆ ಬನ್‌ವಾಯ ಹಸೀನ್ ತಾಜ್‌ಮಹಲ್’ ಹಾಡು ಗುನುಗಿದ್ದೀರಲ್ಲವೆ? ಅದೇ ಧಾಟಿಯ ಹಾಡಿದು.

ಕನ್ನಡಕ್ಕೂ ಲಲಿತ್‌ಗೂ ಅವಿನಾ ಸಂಬಂಧ. ವೈದೇಹಿ ಏನಾದಳೋ, ಸಿಹಿಯಾಗು ಬಾಳಿನಲ್ಲಿ … ರೋಷ ಬಿಡು ಬಿಡು, ಕನ್ನಡದಲ್ಲಿ ಲಲಿತ್‌ಗೆ ಒಂದೆರಡು ಉದಾಹರಣೆಗಳು. ಗಾಢವಿಷಾದವನ್ನು ತಬ್ಬಿಕೊಳ್ಳುತ್ತಲೇ ಸಾಂತ್ವನವನ್ನು ಅರಸುವ ಭಾವ. ಹಿಂದಿಯ ‘ಅಮರ್ ಪ್ರೇಮ್’ ಚಿತ್ರದ ಕಮಾಚ್‌ ರಾಗದ ಲತಾ ದೀದಿಯ ಅಮರಕಂಠದಲ್ಲಿನ ಮೊರೆ; ‘ರೈನಾ ಬೀತೀ ಜಾಯೇ, ಶಾಮ್ ನ ಆಯೇ’ ಸಹ ದಶಕಗಳಿಂದ ತನ್ನ ಜನಪ್ರಿಯತೆಯನ್ನು ಮಾಸದೆ ಉಳಿಸಿಕೊಂಡಿದೆ. ಅದೇ ಶೋಕಭಾವವನ್ನು “ಕಣ್ಣೀರ ಧಾರೆ ಇದೇಕೆ, ಇದೇಕೆ ಎಂದು ಕನ್ನಡಕ್ಕೆ ತಂದವರು ಡಾ. ರಾಜ್. ಇಲ್ಲಿ ರಾಗ ಬೇರಾದರೂ, ಭಾವವೊಂದೇ!

ಡಾ. ರಾಜ್ ಅವರದು ರಹ-ವಿರಹ, ರಕ್ತಿ-ವಿರಕ್ತಿ, ಆರ್ದ್ರತೆ-ಆರ್ತತೆಗಳ ಅಭಿವ್ಯಕ್ತಿಗೆ ಹೇಳಿ ಮಾಡಿಸಿದ ಕಂಠ. ತಾರಾಸ್ಥಾಯಿಯ ಸಂಚಾರವಿರದ, ಮಧ್ಯಮ ಶ್ರುತಿಯ ಹಾಡುಗಳಿಗೆ ಅವರು ಭಾವ ತುಂಬುತ್ತಿದ್ದರು.

ಖರಹರಪ್ರಿಯ ರಾಗದ ‘ಆರಾಧಿಸುವೆ ಮದನಾರಿ’ ಅವರ ಗಾಯನ ಶ್ರೇಷ್ಠತೆಗೆ ನಿದರ್ಶನ. ದರ್ಬಾರಿ ಕಾನಡ ರಾಗದಲ್ಲಿ ಘಂಟಸಾಲ ಅವರು ಜಗದೀಕವೀರನ ಕಥೆಗಾಗಿ ಹಾಡಿರುವ “ಶಿವಶಂಕರಿ ಶಿವಾನಂದ ಲಹರಿ” ಗೀತೆಯಷ್ಟೇ ಸವಾಲಿನದು. ಐವರಿಗೆ ಓರ್ವ ಗಾಯಕನೇ ಹಾಡಿದ ಹಾಡದು. ಘಂಟಸಾಲ ಪಳಗಿದ ಮೇರು ಗಾಯಕ. ಆದರೆ ರಾಜ್ ಸಹ ಅವರಂತೆಯೇ ಐವರಿಗೆ ಏಕಕಾಲಕ್ಕೆ ಬಬ್ರುವಾಹನ ಚಿತ್ರಕ್ಕಾಗಿ ಖರಹರಪ್ರಿಯ ರಾಗದಲ್ಲಿ ಆರಾಧಿಸುವೆ ಮದನಾರಿ ಎಂದು ಹಾಡಿ ಯಶಸ್ಸಿನ ಶಿಖರವೇರಿದರು.

ಗಾನಲೋಕ ನಿಬ್ಬೆರಗಿನಿಂದ ಅವರ ಈ ಉತ್ತುಂಗ ಸಾಧನೆಯನ್ನು ನೋಡಿ-ಕೇಳಿ, ಹಾಡಿ ಹೊಗಳಿತು.

ಹಿಂದೋಳದಲ್ಲಿನ ”ಆಕಾಶ ಭೂಮಿಗಳ ಒಂದು ಮಾಡಿ ನಿಂತ” ಹಾಡು ಪಂಡಿತ-ಪಾಮರ ಕೇಳುಗರನ್ನು ಏಕಕಾಲಕ್ಕೆ ತಣಿಸುತ್ತಲೇ ಇದೆ. ಬಾನಿನ ಅಂಚಿಂದ ಬಂದೆ ಎಂಬ ಹಾಡಿನಲ್ಲಿ ರಾಜ್ ಬೆಳಕನ್ನು ಚೆಲ್ಲುತ್ತಾ ಉದಯರಾಗ ಹಾಡಿದರಲ್ಲವೇ? ಹಾಡಿನ ಸಾಹಿತ್ಯದಲ್ಲಿ ಉದಯರಾಗ ಎಂದಿದೆ. ಅದರೆ ಅದು ಉದಯರಾಗ ಭೂಪಾಲಿಯಲ್ಲ. ಅದು ಕರ್ನಾಟಕ ಸಂಗೀತದಲ್ಲಿನ ಹಿಂದೋಳ. ಹಿಂದೂಸ್ತಾನಿ ಸಂಗೀತದಲ್ಲಿ ಇದರ ಸಂವಾದಿ ರಾಗ ಅಂದರೆ ಇದನ್ನು ಹೋಲುವ ಹತ್ತಿರದ ರಾಗ ಮಾಲ್ಕೌನ್ಸ್. ಮೃದುಮಧುರ ಭಾವನೆಗಳ ಒಟ್ಟು ಮೊತ್ತ ಎಂದು ಹೇಳಬಹುದಾದ ರಾಗ.

ರಾಜ್ ಅವರದು ಬಾಲಮುರಳಿಯಂತೆ, ಏಸುದಾಸರಂತೆ ಒಂದು ಅನನ್ಯ ಕಂಠ. ಅವರಿಬ್ಬರೂ ಶಾಸ್ತ್ರೀಯ ಸಂಗೀತವನ್ನು ಕಲಿತಿದ್ದವರು; ರಾಜ್ ಅವರು ಕಲಿಯದೆಯೇ ಕಲಿತಿದ್ದರೇನೋ ಎಂಬ ಭಾವ-ಬೆರಗು ಮೂಡಿಸಿದ್ದರು. ತೆರೆಕಾಣದ ಅಮೃತವರ್ಷಿಣಿ ಚಿತ್ರಕ್ಕಾಗಿ ಧ್ವನಿಮುದ್ರಿತಗೊಂಡು, ಜೀವನಚೈತ್ರದಲ್ಲಿ ಬಳಕೆಯಾದ ತೋಡಿ ರಾಗದಲ್ಲಿನ ”ನಾದಮಯ ಈ ಲೋಕವೆಲ್ಲಾ” ಹಾಡು ಕೇಳುಗರನ್ನು ಭಾವಪರವಶಗೊಳಿಸುತ್ತಲೇ ಇದೆ.

ಮೋಹನ ರಾಗದಲ್ಲಿನ ಚಲಿಸುವ ಮೋಡಗಳು ಚಿತ್ರದ ”ಜೇನಿನ ಹೊಳೆಯೋ, ಹಾಲಿನ ಮಳೆಯೋ” ಮತ್ತು ಸನಾದಿ ಅಪ್ಪಣ್ಣದ ”ರಾಗ ಅನುರಾಗ ಶುಭಯೋಗ ತಂದಿದೆ” ಗೀತೆಗಳು ವಾಣಿಯ ವೀಣೆಯ ಸ್ವರಮಾಧುರ್ಯದಂತೆಯೇ ಇದ್ದು ಕನ್ನಡಕ್ಕೆ ಶುಭಯೋಗ ತಂದಿವೆ. ಇದೇ ಮೋಹನ ರಾಗದಲ್ಲಿನ “ಇನ್ನು ಹತ್ತಿರ, ಹತ್ತಿರ ಬರುವೆಯಾ” ನಿಜಕ್ಕೂ ಆಹ್ಲಾದಕರ ತಂಗಾಳಿ ಬೀಸಿದಂತಿದೆ. ರಾಜ್ ಹಾಡಿದ ಮೊದಲ ಯುಗಳ ಗೀತೆ ಮಹಿಷಾಸುರ ಮರ್ದಿನಿ ಚಿತ್ರದ “ತುಂಬಿತು ಮನವ ತಂದಿತು ಸುಖವಾ ಪ್ರೇಮದ ಗಾಳಿ.” ಎಸ್. ಜಾನಕಿ ಅವರೊಂದಿಗಿನ ಈ ಯುಗಳವೂ ಮೋಹನ ರಾಗಾಧಾರಿತ. ಈ ನಾಲ್ಕು ಗೀತೆಗಳನ್ನು ಗಮನಿಸಿದರೆ ಕಾಲಾನುಕ್ರಮದಲ್ಲಿ ಅವರ ಕಂಠ ಮಾಗುತ್ತಾ ಸಾಗಿರುವುದನ್ನು ಗಮನಿಸಬಹುದು. ಅನಂತರ ಹಾಡಿದ ಮೋಹನ ರಾಗದ್ದೇ ಆದ ಕುವೆಂಪು ಅವರ “ಎಲ್ಲಾದರು ಇರು ಎಂತಾದರು ಇರು…ಕನ್ನಡವೇ ಸತ್ಯ ಕನ್ನಡವೇ ನಿತ್ಯ” ಎಂಬ ಭಾವಗೀತೆಯನ್ನು ಆಲಿಸಬಹುದು. ಆ ವೇಳೆಗೆ ಅವರ ದೇಹ ಮತ್ತು ಕಂಠದ ಮೇಲೆ ವಯಸ್ಸು ತನ್ನ ಛಾಪು ಒತ್ತಿರುವುದನ್ನು ಮನಗಾಣಬಹುದು. ಪಿ.ಬಿ. ಶ್ರೀನಿವಾಸ್ ಅವರು ಗಂಧದಗುಡಿ ಚಿತ್ರಕ್ಕಾಗಿ ತಮ್ಮ ಮಕಮಲ್ಲಿನಂತಹ ನವಿರಾದ ಧ್ವನಿಯಲ್ಲಿ ಹಾಡಿ ಜನಪ್ರಿಯಗೊಳಿಸಿದ ಅರ್ಧಶತಮಾನದ ಹಿಂದಿನ ಗೀತೆ, ಇದೇ ಮೋಹನರಾಗದ “ನಾವಾಡುವ ನುಡಿಯೇ ಕನ್ನಡನುಡಿ.” ಇದೇ ಡಾ. ಶಿವರಾಜಕುಮಾರ್ ಅವರ ಗಂಧದಗುಡಿ ಭಾಗ-1ರ ಮುಂದುವರೆದ ಸರಣಿ ಚಿತ್ರಕ್ಕಾಗಿ ಡಾ. ರಾಜ್ 1994ರಲ್ಲಿ ಹಾಡುವ ಅವಕಾಶ ಒದಗಿತು.

ಅವರ ಸ್ಪಷ್ಟ ಉಚ್ಚಾ(√)ರಕ್ಕೆ ಕವಿರತ್ನ ಕಾಳಿದಾಸ ಚಿತ್ರದಲ್ಲಿನ ಸಂಸ್ಕೃತದಲ್ಲಿರುವ ‘ಶ್ಯಾಮಲಾ ದಂಡಕ’ವನ್ನು ಉದಾಹರಿಸಬಹುದು. ”ಮಾಣಿಕ್ಯವೀಣಾಂ ಉಪಲಾಲಯಂತೀ ಮದಾಲಸ ಮಂಜುಳ ವಾಗ್ವಿಲಾಸ”ವು ಕಲ್ಯಾಣಿ ರಾಗದಲ್ಲಿ ತನುತುಂಬಿ, ಮನತುಂಬಿ, ಚಿತ್ತಚೇತನ ತುಂಬಿ ನಾದಝರಿಯಾಗಿ ಹರಿದಿರುವುದನ್ನು ನೆನಪಿಸಿಕೊಳ್ಳಬಹುದು.

ಕಲ್ಯಾಣಿ ರಾಗದಲ್ಲಿ ಸಂಯೋಜಿಸಲ್ಪಟ್ಟಿರುವ ಕಾಳಿದಾಸನ ಸಂಕೀರ್ಣವಾದ ‘ಶ್ಯಾಮಲಾ ದಂಡಕ’ವನ್ನು ರಾಜ್ ಸುಲಲಿತವಾಗಿ ಹಾಡಿ ಎಲ್ಲರನ್ನೂ ನಿಬ್ಬೆರಗಾಗಿಸಿದರು. ಅವರ ಪಾಲಿಗದು ಸಲಲಿತ ರಾಗ ಸುಧಾರಸ ಸಾರ. ಅದು ಸಂಸ್ಕೃತದಲ್ಲಿನ ರಚನೆ. ಉಚ್ಚಾರಣೆಯಲ್ಲಿ ಆಭಾಸ ಆಗಬಾರದೆಂದು ಕಾಶಿಯೂ ಸೇರಿದಂತೆ ಹಲವು ಕಡೆಗಳಿಂದ ಸಂಸ್ಕೃತ ವಿದ್ವಾಂಸರನ್ನು ಮನೆಗೆ ಕರೆಸಿಕೊಂಡು ಚರ್ಚಿಸಿ, ಅವರ ಮುಂದೆ ಹಾಡಿ ಅನಂತರ ಧ್ವನಿಮುದ್ರಣಕ್ಕೆ ತೆರಳಿದರು. ಯಾವುದೇ ಕಾರ್ಯದಲ್ಲೂ ಅವರದು ಅಪರಿಮಿತ ಶ್ರದ್ಧೆ ಮತ್ತು ಮುನ್ನೆಚ್ಚರಿಕೆ.

ಅವರೇ ಹಾಡಿರುವ ಯಮನ್‌ ಕಲ್ಯಾಣಿಯಲ್ಲಿನ “ನಿನ್ನ ಕಂಗಳ ಬಿಸಿಯ ಹನಿಗಳು ನೂರು ಕತೆಯಾ ಹೇಳಿವೆ” ಗೀತೆಯ ಆರ್ತತೆಗೆ ಎಣೆಯುಂಟೆ?

Dr. Rajkumar ದೇಶ್ ರಾಗದ “ಬಾಳೆ ಪ್ರೇಮಗೀತೆ, ನಲ್ಲ ನಲ್ಲೆ ಸೇರಿದಾಗ” ಅನಿರ್ವಚನೀಯವಾದ ಆನಂದ ನೀಡದಿರದು. ಚಂದ್ರಕೌಂಸ್ ರಾಗದಲ್ಲಿನ ಯಾವ ಕವಿಯು ಬರೆಯಲಾರ ಒಲವಿನಿಂದ ಕಣ್ಣೋಟದಿಂದ” ಗೀತೆಯು ಕಡೆದಿಟ್ಟ ಭಾವವನ್ನು ಸುಲಭದಲ್ಲಿ ಚದುರಿಸಲಾಗದು. ಇನ್ನು ಅಠಾಣ ರಾಗದಲ್ಲಿ ಹೊಡೆದಾಟದ ದೃಶ್ಯಕ್ಕೆಂದು ಸಂಯೋಜಿಸಲಾದ ಹಾಸ್ಯದ ಸ್ಪರ್ಶವುಳ್ಳ “ಬಿಸಿಬಿಸಿ ಕಜ್ಜಾಯ, ರುಚಿರುಚಿ ಕಜ್ಜಾಯ ಮಾಡಿಕೊಡಲೆ ನಾನು?” ಗೀತೆ ಹೊಡೆದಾಟದ ಬಿಸಿ, ಕಜ್ಜಾಯದ ಸಿಹಿ, ತುಪ್ಪದ ಸಮ್ಮಿಶ್ರಣದಂತೆ ಭಾಸವಾಗುತ್ತದೆ.

ಚಕ್ರವಾಕವೆಂಬುದು ಒಂದು ರಾಗದ ಹೆಸರು. ಪ್ರಧಾನವಾಗಿ ಭಕ್ತಿ ಅಥವಾ ಶೋಕತಪ್ತ ಭಾವದ ಅಭಿವ್ಯಕ್ತಿಗಾಗಿ ಬಳಸುವ ರಾಗವಿದು. ಇದೇ ರಾಗವನ್ನು ಜ್ವಾಲಾಮುಖಿ ಚಿತ್ರದಲ್ಲಿ ಹಾಸ್ಯಾಭಿವ್ಯಕ್ತಿಗಾಗಿ ಬಳಸಲಾಗಿದೆ: ಹೇಳುವುದು ಒಂದು, ಮಾಡುವುದು ಇನ್ನೊಂದು. ಅದನ್ನೂ ಹಾಡಿ ಗೆದ್ದವರು ರಾಜ್.

ಪಹಾಡಿ ಎಂಬುದು ಕೋಮಲ ಮಲಯ ಸಮೀರದಂತಹ ರಾಗ. ಹಿಂದೂಸ್ತಾನಿ ಸಂಗೀತದ ಈ ರಾಗದಲ್ಲಿನ “ಏನೇನೋ ಆಸೆ ನೀ ತಂದಾ ಭಾಷೆ”ಯನ್ನು ಜೇನದನಿಯ ಗಾಯಕಿ ವಾಣಿ ಜಯರಾಮ್ ಅವರ ಜೊತೆ ಹಾಡಿ ಕನ್ನಡದ ಸವಿಯನ್ನು ಸವಿಯುವಂತೆ ಮಾಡಿದವರು ರಾಜ್. ಇದೇ ಪಹಾಡಿಯಲ್ಲಿ ಗುಲಾಮ್ ಅಲಿ ಖಾನ್ ಅವರ ಗಜಲ್ ನೆನಪಿಸುವಂತಹ “ಗೆಳತಿ ಬಾರದು ಇಂಥಾ ಸಮಯ, ಅನುರಾಗ ಬೇಕೆಂದಿದೆ ಹೃದಯ” ಎಂದು ನಿವೇದಿಸಿಕೊಳ್ಳುವ ಶೀತಲ ಶೃಂಗಾರದ ಧಾಟಿ ಮನಕ್ಕೆ ನಾಟಿಕೊಳ್ಳದಿರದು.

ಅಭೇರಿ ರಾಗದಲ್ಲಿನ ಚೆಲುವೆಯೇ ನಿನ್ನ ನೋಡಲು ಮಾತುಗಳು ಬರದವನು ಬರೆಯುತ ಹೊಸ ಕವಿತೆಯ, ಹಾಡುವ ನೋಡಿ ಅಂದವನು” ಎಂಬುದು ನಿಜಕ್ಕೂ ಪ್ರಣಯಭಾವ ಸ್ಫುರಿಸಬಲ್ಲ ಚೇತೋಹಾರಿ ಗೀತೆ. ಇದೇ ರಾಗದಲ್ಲಿ ಕಸ್ತೂರಿ ಶಂಕರ್ ಅವರೊಂದಿಗೆ ಟಿ.ಜಿ. ಲಿಂಗಪ್ಪನವರ ಸಂಯೋಜನೆಯಲ್ಲಿ ಹಾಡಿದ ಸೂರ್ಯನ ಕಾಂತಿಗೆ ಸೂರ್ಯನೆ ಸಾಟಿ ಬೇರೆ ಯಾರಿಲ್ಲ” ಗೀತೆಗೆ ಸಾಟಿಯಾದದ್ದು ಬೇರೆಲ್ಲುoಟು? ಪರಸ್ತ್ರೀಯೊಬ್ಬಳ ದೈವೀಕ ಸೌಂದರ್ಯಕ್ಕೆ ಬೆರಗಾಗಿ ಮೆಚ್ಚಿ ಸ್ತುತಿಸುವ ಗೀತೆ “ಎಂಥ ಸೌಂದರ್ಯ ಕಂಡೆ! ಆದಿಲಕ್ಷ್ಮಿಯೋ, ಮಹಾಲಕ್ಷ್ಮಿಯೋ, ವಾಣಿಯೋ ಬೇರೆ ಕಾಣೆ ನಾ” ಸಹ ಅಭೇರಿಯೇ.

ಪ್ರೇಮದ ಕಾಣಿಕೆ ಚಿತ್ರದ ಪೀಲು ರಾಗದ “ಇದು ಯಾರು ಬರೆದ ಕಥೆಯೋ” ಸಹ ಅನನ್ಯ. ಅದೇ ಚಿತ್ರದಲ್ಲಿನ ಕಾಪಿ ರಾಗದ “ಬಾನಿಗೊಂದು ಎಲ್ಲೆ ಎಲ್ಲಿದೆ? ನಿನ್ನಾಸೆಗೆಲ್ಲಿ ಕೊನೆಯಿದೆ?” ಗೀತೆ ಸಹ ಒಗರಲ್ಲ, ಕಡುವಲ್ಲ, ಕಹಿಯಲ್ಲ; ಸವಿ- ಸವಿ- ಸವಿ! ಇಂತಹುದೇ ಸವಿ ತುಂಬಿದ ಮತ್ತೊಂದು ಹಾಡು ಬೇಕೆಂದರೆ ನೇರ ‘ಶ್ರಾವಣ ಬಂತು’ ಚಿತ್ರದ “ಇದೇ ರಾಗದಲ್ಲಿ ಇದೇ ತಾಳದಲ್ಲಿ ರಾಧೆಗಾಗಿ ಹಾಡಿದ ನೀಲಮೇಘ ಶ್ಯಾಮ” ಗೀತೆಯನ್ನು ಆಲಿಸಿ.

ಎಪ್ಪತ್ತು, ಎಂಬ(√)ತ್ತರ ದಶಕಗಳಲ್ಲಿ ರಾಜ್ ಹಾಡಿದ ಈ ಗೀತೆಗಳನ್ನು ನೀರವ ರಾತ್ರಿಗಳಲ್ಲಿ ಆಲಿಸುವುದೇ ಒಂದು ರಸಾನುಭೂತಿ. ನೀರವತೆ ಕಳೆದು ರವದ ಚೈತನ್ಯವನ್ನು ಬಾಳಿಗೆ ಮರಳಿ ತರುವ ಸಾಮರ್ಥ್ಯವುಳ್ಳ ಗೀತೆಗಳಿವು. ಮಾಧುರ್ಯದಿಂದ ಆಚೆಗೆ ಹೊರಳಿ ವ್ಯತಿರಿಕ್ತ ಭಾವದ ಪ್ರತೀಕವಾದ, ಭಕ್ತಪ್ರಹ್ಲಾದ ಚಿತ್ರದ ಹಂಸಧ್ವನಿ ರಾಗದ ಬೀಭತ್ಸ ತುಂಬಿದ “ಸಿಗಿವೆಮ್ ಕ್ಷಣದಲಿ ನಿನ್ನ ನಾಮ್” ವೈರಿಗಳ ಜಂಘಾಬಲ ಉಡುಗಿಸದಿರದು. ಪರಿಸರ ಪ್ರೇಮವನ್ನು ಅನನ್ಯವಾಗಿ ಮೆರೆದ ಗೀತೆ ಗಿರಿಕನ್ಯೆ ಚಿತ್ರದ “ಏನೆಂದು ನಾ ಹೇಳಲಿ ಮಾನವನಾಸೆಗೆ ಕೊನೆಯೆಲ್ಲಿ?”

ಗಜ಼ಲ್‌ಪ್ರಿಯ ರಾಜ್ ಇಷ್ಟಪಟ್ಟು “ಸದಾ ಕಣ್ಣಲೇ ಪ್ರಣಯದಾ ಕವಿತೆ” ಹಾಡಿದವರು. ಹಿಂದಿಯಲ್ಲಿರುವ ಅದನ್ನು ಕನ್ನಡಕ್ಕೆ ಬರುವಂತೆ ಮಾಡಿದರು. ಮಧ್ಯಮಾವತಿ ಎಂಬ ಮಂಗಳ ರಾಗದಲ್ಲಿ ದನಿಯಿರದ ಬಾಳಿನಲ್ಲಿ ಕೊಳಲಾದೆ ನೀನು ಎಂದು ದೊಡ್ಡರಂಗೇಗೌಡರ ಭಾವಗೀತೆಗೆ ರಾಗ-ರಂಗು ತುಂಬಿದವರು. ವಾರ ಬಂತಮ್ಮ ಗುರುವಾರ ಬಂತಮ್ಮ ಎಂದು ಮಧ್ಯಮಾವತಿಗೆ ಶರಣಾದವರು. ದುರ್ಗಾ ರಾಗದಲ್ಲಿ “ಅನುರಾಗದಾ ಭೋಗ” ಎಂದು ಆಕಸ್ಮಿಕ ಚಿತ್ರಕ್ಕಾಗಿ ಹಾಡಿ ರಂಗಗೀತೆಯ ಮಟ್ಟುಗಳನ್ನು ನೆನಪಿಸಿದವರು ಅವರು.

ನೀ ತಂದೆ, ನಾ ಕಂದ ಎಂಬ ಸಮರ್ಪಣಾ ಭಾವ, ಹಾಲಲ್ಲಾದರು ಹಾಕು, ನೀರಲ್ಲಾದರು ಹಾಕು ಎಂಬ ಉದಾರ ಭಾವ, ಹಾಡು ಕೋಗಿಲೆ, ನಲಿದಾಡು ಕೋಗಿಲೆ ಎಂಬ ಪರವಶ ಭಾವಗಳ ಅಭಿವ್ಯಕ್ತಿಗೆ ರಾಜ್ ಅವರ ಗಳಕ್ಕೆ ಸರಿಸಾಟಿಯುಂಟೆ? “ಏನು ದಾಹ, ಯಾವ ಮೋಹ ತಿಳಿಯದಾಗಿದೆ ಸ್ವಾಮಿ. ಇಂದು ನಿನ್ನ ಹೆಸರ ಹೇಳೊ ಆಸೆಯಾಗಿದೆ” ಎಂಬ ಭಕ್ತಿಗೀತೆಯಲ್ಲಿ ತನ್ಮಯತೆಯ ಜೊತೆಗೆ ಭಗವಂತನೆಡೆಗೆ ನೆಟ್ಟ ನಂಬಿಕೆಯನ್ನೂ ಮನಗಾಣಬಹುದು.‌ ಇದು ಲತಾ ಮಂಗೇಷ್ಕರ್ ಅವರು ಶರ್ಮೀಲಿ ಚಿತ್ರಕ್ಕಾಗಿ ಹಾಡಿರುವ ಪಟದೀಪ್ ರಾಗದ ಮೇಘಾ ಛಾಯೆ ಆಧೀ ರಾತ್ ಭೈರನ್ ಬನಗಯೀ ನಿಂದಿಯ ಗೀತೆಯ ಆರ್ತತೆಯನ್ನೂ ನೆನಪಿಸದಿರದು. ಭಾರತರತ್ನ ಸುಬ್ಬುಲಕ್ಷ್ಮಿ ಅವರಂತೆ ಭಕ್ತಿಯನ್ನು ಆವಾಹನೆ ಮಾಡಿಕೊಂಡು ಆಲಾಪಿಸುತ್ತಿದ್ದ ಅಪ್ರತಿಮ ಗಾಯಕ…

ಡಾ. ರಾಜ್ ಅವರ ಸಿರಿಕಂಠ ಅವರ ತಂದೆಯ ಬಳುವಳಿ. ತಮ್ಮ ಮಗ ಒಳ್ಳೆಯ ಗಾಯಕನಾಗಬೇಕೆಂದು ಬಯಸಿ
ಅವರ ತಂದೆ ಸಿಂಗಾನಲ್ಲೂರು ಪುಟ್ಟಸ್ವಾಮಯ್ಯನವರು ರಾಜ್ ಅವರನ್ನು ಬಾಲ್ಯದಲ್ಲೇ ಸಂಗೀತ ಕಲಿಕೆಗೆ ಹಚ್ಚಿದ್ದರು. ಸಂಗೀತ ಪಾಠಕ್ಕೆ ರಾಜ್ ಅವರಿಗೆ ಶಿಕ್ಷಕರೊಬ್ಬರನ್ನು ನೇಮಿಸಲಾಗಿತ್ತು. ಇದು ಗುಬ್ಬಿ ಕಂಪನಿಗೆ ಸೇರುವ ಮುನ್ನ ಆದದ್ದು. ಅನಂತರ ನಾಟಕ ಕಂಪನಿಯಲ್ಲಿ ಸಂಗೀತಾಭ್ಯಾಸ ಮುಂದುವರೆಯಿತು. ರಾಜ್ ಅವರದು ಅನುಕರಣೆಯ ಹಾಡುಗಾರಿಕೆಯಲ್ಲ. ಅದು ಪರಿಶ್ರಮ, ಆಸಕ್ತಿ ಮತ್ತು ಬದ್ಧತೆಯ ಮುಪ್ಪುರಿ. ಸ್ವಂತಿಕೆಯ ಛಾಪನ್ನು ಅವರ ಹಾಡುಗಳಲ್ಲಿ ಕೇಳಬಹುದು.

ಬೆಳಗ್ಗೆ ಎದ್ದು ರಾಜ್ ಸಂಗೀತಾಭ್ಯಾಸ ಮಾಡಬೇಕಾಗಿತ್ತು. ಸಂಗೀತ ಕಲಿಯಲು ಹೋಗುವಾಗ ಚಡ್ಡಿ ಧರಿಸಬೇಕಾಗುತ್ತಿತ್ತು. ಅಲ್ಲಿ ಸರಿಯಾಗಿ ಹಾಡದಿದ್ದರೆ ಆ ದೂರ್ವಾಸ ಸ್ವಭಾವದ ಶಿಕ್ಷಕರು ತೊಡೆಯ ಮೇಲೆ ಬಡಿಯುತ್ತಿದ್ದರು. ತೊಡೆ ಕೆಂಪಗೆ ಆಗಿದ್ದನ್ನು ಕಂಡರೆ ರಾಜ್ ಅವರ ತಂದೆ ಮತ್ತಷ್ಟು ಬಡಿಯುತ್ತಿದ್ದರು! ಹಾಗಾಗಿ ಸಂಗೀತದ ಕಲಿಕೆಯಲ್ಲಿ ರಾಜ್ ತಪ್ಪುವಂತೆಯೇ ಇರಲಿಲ್ಲ.

ಮದರಾಸಿನಲ್ಲಿ ನೆಲೆಸಿದ್ದಾಗ ಅವರ ಮನೆಯಲ್ಲಿ ಒಂದರ ಪಕ್ಕ ಇನ್ನೊಂದು ಹೀಗೆ ಎರಡು ಬಚ್ಚಲು ಇದ್ದವಂತೆ. ಒಂದರಲ್ಲಿ ರಾಘವೇಂದ್ರ, ಮತ್ತೊಂದರಲ್ಲಿ ರಾಜ್ ಅವರ ಸ್ನಾನ. ಹಾಡುವಾಗ ರಾಘವೇಂದ್ರ ತಪ್ಪು ಮಾಡಿದರೆ ಈ ಕಡೆಯ ಬಚ್ಚಲಿನಿಂದ ರಾಜ್ ಅದನ್ನು ಸರಿಯಾಗಿ ಹಾಡಿ ಕೇಳಿಸುತ್ತಿದ್ದರಂತೆ. ಎಷ್ಟು ಹೊತ್ತಾದರೂ ಇಬ್ಬರ ಸ್ನಾನ ಮುಗಿಯುತ್ತಿರಲಿಲ್ಲವಂತೆ.

ರಾಜ್ ಅವರ ಸೋದರಿ ಶಾರದಮ್ಮನವರೂ ಚೆನ್ನಾಗಿ ಹಾಡುತ್ತಿದ್ದರು. ರಾಜ್ ಅವರ ಹಿರಿಯ ಮಗಳು ಲಕ್ಷ್ಮಿ ಗೋವಿಂದರಾಜ್. ನಾನು ಅವರನ್ನು ಇತ್ತೀಚಿಗೆ ಕೇಳಿದಾಗ ತಾನೂ ಸಹ ಹಾಡುತ್ತೇನೆಂದರು. ಪುನೀತ್, ಶಿವರಾಜಕುಮಾರ್ ಅವರು ಸಹ ಆಗೊಮ್ಮೆ, ಈಗೊಮ್ಮೆ ಚಲನಚಿತ್ರಗಳಿಗಾಗಿ ಉಲಿದಿದ್ದನ್ನು ಕೇಳಿದ್ದೇವೆ. ರಾಘವೇಂದ್ರ ರಾಜಕುಮಾರ್ ಪಳಗಿದ ಗಾಯಕ ಎಂದು ಆರಂಭದಿಂದಲೇ ಸಾಬೀತುಪಡಿಸಿದವರು.

ರಾಜ್ ವೇದಿಕೆಯ ಮೇಲೆ ಹಾಡುವಾಗ ಸಂಭ್ರಮದ ತೊರೆಯಾಗುತ್ತಿದ್ದರು. ನಾಟ್ಯದ ನವಿಲಾಗುತ್ತಿದ್ದರು. ಅವರ ಹಾಡು ಶ್ರೋತೃಗಳ ಕಣ್ಣು-ಕಿವಿ-ಮನಸ್ಸು; ಈ ಮೂರನ್ನೂ ಏಕಕಾಲಕ್ಕೆ ತಾಕುತ್ತಿತ್ತು. ಯಾವುದೇ ಹಾಡಿಗೂ ಸಾಹಿತ್ಯವನ್ನು ನೋಡದೆ ವೇದಿಕೆಯ ಮೇಲೆ ಹಾಡಬಲ್ಲ ಸಾಮರ್ಥ್ಯವಿದ್ದ ಏಕೈಕ ಕಲಾವಿದ. ಅವರು ಹಾಡುವಾಗ ಆ ಹಾಡಿನ ಭಾವವನ್ನೂ ಅಭಿವ್ಯಕ್ತಿಸಬಲ್ಲ ಸಮರ್ಥ ನಟ ಅವರಲ್ಲಿದ್ದ. ಆ ಮೊಗದಲ್ಲಿ ಎಂದೂ ಮುಖ ಕಿವುಚುವ ‘ಮುದ್ರಾದೋಷ’ ಕಂಡಿದ್ದೇ ಇಲ್ಲ. ರಾಜ್ ವಿಚಾರದಲ್ಲಿ ಗಾಯನ ಎಂಬುದು ಒಂದು ಪ್ರದರ್ಶಕ ಕಲೆಯೂ ಹೌದು.

ಕವಿರತ್ನ ಕಾಳಿದಾಸ ಚಿತ್ರಕ್ಕಾಗಿ ಸಂಸ್ಕೃತದಲ್ಲಿನ ‘ಶ್ಯಾಮಲಾ ದಂಡಕ’ವನ್ನು ಹಾಡಬೇಕಾಗಿ ಬಂದಾಗ ಉಚ್ಚಾರಣೆಯಲ್ಲಿ ದೋಷವಾಗಬಾರದು ಎಂದು ನಾಡಿನ ಶ್ರೇಷ್ಠ ಸಂಸ್ಕೃತ ವಿದ್ವಾಂಸರನ್ನು ತಮ್ಮ ಮನೆಗೆ ಕರೆಸಿ ಒಂದು ವಾರ ಅವರ ಮುಂದೆ ತಾಲೀಮು ಮಾಡಿ ಧ್ವನಿಮುದ್ರಣಕ್ಕೆ ಅಣಿಯಾದರು ಎಂಬುದನ್ನು ರಾಘವೇಂದ್ರ ರಾಜಕುಮಾರ್ ಅವರು ಹೇಳಿದ್ದನ್ನು ನೆನೆದರೆ ಅಭಿನಯಿಸಲು ಅಷ್ಟೇ ಅಲ್ಲ, ಹಾಡುವಾಗಲೂ ಅವರು ವಹಿಸುತ್ತಿದ್ದ ಎಚ್ಚರಿಕೆಯನ್ನು
ಮನಗಾಣಬಹುದು.

ಸ್ವರಲಿಪಿ/notations ಸಹಿತ, ರಾಜ್ ಹಾಡಿರುವ ಶಾಸ್ತ್ರೀಯ ರಾಗಾಧಾರಿತ ಹಾಡುಗಳ, ಪೂರ್ವಗ್ರಹ ಪೀಡನೆಯಿಲ್ಲದ, ಅಧ್ಯಯನಯೋಗ್ಯ ಕೃತಿಯೊಂದನ್ನು ಕರ್ನಾಟಕ ಸಂಗೀತ ವಿಶ್ವವಿದ್ಯಾಲಯ ಅಥವಾ ಹಂಪಿ ಕನ್ನಡ ವಿಶ್ವವಿದ್ಯಾಲಯ ಪ್ರಕಟಿಸುವ ಅಗತ್ಯವಿದೆ. ತಾವು ಹಾಡಿದ ಅಷ್ಟೂ ಗೀತೆಗಳಿಗೆ ಜೀವತುಂಬಿದ ಗಾನ ಶಿರೋಮಣಿ ಅವರು. ಗಾಯನದಲ್ಲಿ ಅಭಿನಯದ ಮಟ್ಟುಗಳನ್ನು ಹದವಾಗಿ ಬೆರೆಸಿ ನೋಡಿದ ಪ್ರಯೋಗಶೀಲರೂ ಹೌದು. ಒಂದೆರಡು ಸಹಜ ಮಿತಿ ಮತ್ತು ಅತಿಗಳ ನಡುವೆಯೂ, ರಾಜ್ ಅವರು ಗಾಯನ ಕ್ಷೇತ್ರದ ಒಂದು ಸುಮೇರು ಪ್ರತಿಭೆ.

ಅರವತ್ತರ ದಶಕದಲ್ಲಿ ಒಂದೆರಡು ಹಾಡುಗಳನ್ನು ಮಾತ್ರ ಹಾಡಿದ್ದ ಅವರು 1974ರಲ್ಲಿ ತೆರೆಕಂಡ ಸಂಪತ್ತಿಗೆ ಸವಾಲ್ ಚಿತ್ರದಲ್ಲಿನ ಎಮ್ಮೆಯನ್ನು ಕುರಿತಾದ “ಯಾರೇ ಕೂಗಾಡಲಿ ಊರೇ ಹೋರಾಡಲಿ” ಎಂಬ ಹಾಡಿನ ಮೂಲಕ ನಿರತವಾಗಿ ಹಾಡಲು ತೊಡಗಿದರು. ಈ ಹಾಡನ್ನು ಅವರಿಂದಲೇ ಹಾಡಿಸಬೇಕೆಂದು ತಮ್ಮ ಗುರುಗಳಾದ ಜಿ.ಕೆ. ವೆಂಕಟೇಶ್ ಅವರಿಗೆ ಸಲಹೆ ನೀಡಿದ್ದವರು ಅವರ ಸಂಗೀತ ಸಹಾಯಕ ಇಳಯರಾಜಾ. ರಾಜಾ ಅವರಿಂದ ಸಂಗೀತ ಕ್ಷೇತ್ರಕ್ಕೆ ಸಂದ ಮಹದುಪಕಾರಗಳಲ್ಲಿ ಇದೂ ಒಂದು.

ರಾಜ್ ತಮ್ಮ ಇಳಿವಯಸ್ಸಿನಲ್ಲಿ ಉಪೇಂದ್ರಕುಮಾರ್ ಅವರಿಂದ ಸಿತಾರ್ ಕಲಿಯಲು ಹೊರಟ ವಿಧೇಯ ವಿದ್ಯಾರ್ಥಿ. ಸಂಗೀತದ ಯಾವುದೇ ಪ್ರಕಾರವಿರಲಿ, ಶೈಲಿಯಿರಲಿ ಅದರ ನಾಡಿ ಹಿಡಿಯುತ್ತಿದ್ದ ರಸಜ್ಞ ಡಾ. ರಾಜ್. ಕನ್ನಡದ ಸಾರ್ವಕಾಲಿಕವಾದ ಕೆಲವು ಶ್ರೇಷ್ಠಗೀತೆಗಳು ಕನ್ನಡಕ್ಕೆ ಬಂದಿದ್ದು ಅವರ ಸೂಚನೆಯಿಂದಾಗಿ. ಹಿಂದಿಯ ಎರಡು ಜನಪ್ರಿಯ ಗಜಲ್‌ಗಳನ್ನು ಆಲಿಸಿ ಅವು ಕನ್ನಡಕ್ಕೆ ಇಳಿದು ಬರಲಿ ಎಂದು ಇಷಾರೆ ನೀಡಿದರು. ಕಣ್ಣೀರಧಾರೆ ಇದೇಕೆ, ಇದೇಕೆ ಮತ್ತು ಕವಿರತ್ನ ಕಾಳಿದಾಸ ಚಿತ್ರದ ಸದಾ ಕಣ್ಣಲಿ ಪ್ರಣಯದ ಕವಿತೆ ಹಾಡುವೆ ಗೀತೆಗಳು ಕನ್ನಡಕ್ಕೆ ಒಲಿದು ಬಂದಿದ್ದು ಹಾಗೆ. ಸಂಗೀತದ ಬಗೆಗಿನ ಅವರ ಅಭಿರುಚಿ ನಿರುಪಮ. ಡಾ. ರಾಜ್ ಕನ್ನಡದ ನಿಜ ಹಂಸಗೀತೆ!

ಲೇಖಕರು
ಕೆ.ರಾಜಕುಮಾರ್. ಬೆಂಗಳೂರು

DC Shivamogga ಏ.19 ರವರೆಗೆ ನಾಮಪತ್ರ ಸಲ್ಲಿಕೆಗೆ ಅವಕಾಶ- ಗುರುದತ್ತ ಹೆಗಡೆ

0

DC Shivamogga ಏ.12 ರಿಂದ 19 ರವರೆಗೆ ಜಿಲ್ಲಾಧಿಕಾರಿಗಳ ಕಾರ್ಯಾಲಯದಲ್ಲಿ ಲೋಕಸಭಾ ಚುನಾವಣೆಗೆ ನಾಮಪತ್ರಗಳನ್ನು ಉಮೇದುದಾರರು ಅಥವಾ ಸೂಚಕರು ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾ ಚುನಾವಣಾಧಿಕಾರಿ ಗುರುದತ್ತ ಹೆಗಡೆ ತಿಳಿಸಿದರು.
ಇಂದು ಜಿಲ್ಲಾಡಳಿತ ಕಚೇರಿ ಸಭಾಂಗಣದಲ್ಲಿ ವಿವಿಧ ರಾಜಕೀಯ ಪಕ್ಷಗಳ ಮುಖಂಡರೊಂದಿಗೆ ಚುನಾವಣಾ ನಾಮಪತ್ರ ಸಲ್ಲಿಕೆ ಮತ್ತು ಚುನಾವಣಾ ಪ್ರಕ್ರಿಯೆ ಕುರಿತು ಮಾಹಿತಿ ನೀಡಲು ಏರ್ಪಡಿಸಲಾಗಿದ್ದ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
ಭಾರತ ಚುನಾವಣಾ ಆಯೋಗವು ಮಾ.16 ರಂದು ಲೋಕಸಭಾ ಸಾರ್ವತ್ರಿಕ ಚುನಾವಣೆ-2024ರ ಅಧಿಸೂಚನೆ ಹೊರಡಿಸಿದ್ದು, ಅದರಂತೆ 14-ಶಿವಮೊಗ್ಗ ಲೋಕಸಭಾ ಚುನಾವಣಾ ಕ್ಷೇತ್ರದಿಂದ ಲೋಕಸಭೆಗೆ ಸಂಬಂಧಿಸಿದಂತೆ ಉಮೇದುವಾರರು ಅಥವಾ ಅವರ ಸೂಚಕರು ನಾಮಪತ್ರಗಳನ್ನು ಚುನಾವಣಾಧಿಕಾರಿಗಳಿಗೆ ಅಥವಾ ಸಹಾಯಕ ಚುನಾವಣಾಧಿಕಾರಿಗಳಿಗೆ ಜಿಲ್ಲಾಧಿಕಾರಿಗಳ ಕಾರ್ಯಾಲಯದಲ್ಲಿ ಏ.12 ರಿಂದ ಏ.19 ರವರೆಗೆ ಬೆಳಿಗ್ಗೆ 11.00 ರಿಂದ ಮಧ್ಯಾಹ್ನ 3.00 ರ ನಡುವೆ ಯಾವುದೇ ದಿನದಂದು (ಸರ್ಕಾರಿ ರಜಾದಿನದ ಹೊರತು) ಸಲ್ಲಿಸಬಹುದಾಗಿದೆ.
ನಾಮ ಪತ್ರದ ನಮೂನೆಗಳನ್ನು ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ನಿಗದಿತ ವೇಳೆಯಲ್ಲಿ ಪಡೆದುಕೊಳ್ಳಬಹುದು. ನಾಮ ಪತ್ರಗಳನ್ನು ಜಿಲ್ಲಾಧಿಕಾರಿಗಳ ಕಾರ್ಯಾಲಯ, ಶಿವಮೊಗ್ಗ ಇಲ್ಲಿ ಏ.20ರ(ಶನಿವಾರ) ರಂದು ಬೆಳಿಗ್ಗೆ 11.00 ಗಂಟೆಗೆ ಪರಿಶೀಲನೆಗೆ ತೆಗೆದುಕೊಳ್ಳಲಾಗುತ್ತದೆ. ಉಮೇದುವಾರಿಕೆಯನ್ನು ಹಿಂತೆಗೆದುಕೊಳ್ಳುವ ತಿಳಿವಳಿಕೆ ಪತ್ರವನ್ನು ಉಮೇದುವಾರನು ಅಥವಾ ಅವರ ಯಾರೇ ಸೂಚಕರು ಅಥವಾ ಅದನ್ನು ಸಲ್ಲಿಸಲು ಉಮೇದುವಾರನಿಂದ ಲಿಖಿತದಲ್ಲಿ ಅಧಿಕೃತನಾದ ಆತನ ಚುನಾವಣಾ ಏಜೆಂಟನು ಮೇಲ್ಕಂಡ ಇಬ್ಬರಲ್ಲೊಬ್ಬ ಅಧಿಕಾರಿಗೆ ನಿಗದಿಪಡಿಸಿದ ಕಚೇರಿಯಲ್ಲಿ ಏ.22 ರಂದು ಮಧ್ಯಾಹ್ನ 03.00 ಗಂಟೆಗೆ ಮುಂಚೆ ಸಲ್ಲಿಸಬಹುದು.
ಚುನಾವಣೆಗೆ ಸ್ಪರ್ಧೆ ನಡೆದ ಸಂದರ್ಭದಲ್ಲಿ ಮೇ.7 ರ ಮಂಗಳವಾರ ಬೆಳಿಗ್ಗೆ 07.00 ಗಂಟೆಯಿಂದ ಸಂಜೆ 06.00 ಗಂಟೆಯ ವರೆಗೆ ಮತದಾನ ನಡೆಯುವುದು. ನಾಮಪತ್ರ ಸಲ್ಲಿಸುವ ಅಭ್ಯರ್ಥಿಗಳು ಚುನಾವಣಾ ಆಯೋಗ ನೀಡಿರುವ ಎಲ್ಲಾ ಸೂಚನೆಗಳನ್ನು ಪಾಲಿಸುವ ಮೂಲಕ ಅಗತ್ಯ ದಾಖಲೆಗಳೊಂದಿಗೆ ನಾಮಪತ್ರ ಸಲ್ಲಿಸಬೇಕು.
ಅಭ್ಯರ್ಥಿಗಳು ನಾಮಪತ್ರವನ್ನು ನಮೂನೆ-2ಎ ನಲ್ಲಿ ಸಲ್ಲಿಸಬೇಕು. ನಮೂನೆ-26 ರಲ್ಲಿ ರೂ.100/- ಗಳ ಛಾಪಾ ಕಾಗದದಲ್ಲಿ ಅಭ್ಯರ್ಥಿಯ ಘೋಷಣಾ ಪತ್ರ, ಬೇಬಾಕಿಗೆ ಸಂಬಂಧಿಸಿದ ಇಲಾಖೆ ಹಾಗೂ ನೋಟರಿ ಪಬ್ಲಿಕ್ ರವರಿಂದ ದೃಢೀಕರಣ ಪತ್ರ ಸಲ್ಲಿಸಬೇಕು. ಸಾಮಾನ್ಯ ಅಭ್ಯರ್ಥಿಗಳು ರೂ.25000/- ಹಾಗೂ ಪರಿಶಿಷ್ಠ ಜಾತಿ, ಪರಿಶಿಷ್ಠ ಪಂಗಡದ ಅಭ್ಯರ್ಥಿಗಳಿಗೆ ಶೇ.50 ವಿನಾಯಿತಿ ನೀಡಿ ರೂ.12500/- ಗಳ ಭದ್ರತಾ ಠೇವಣಿಯನ್ನು ನಿಗದಿಪಡಿಸಲಾಗಿರುತ್ತದೆ. ಅಭ್ಯರ್ಥಿಗಳು ಹೊಸದಾಗಿ ಬ್ಯಾಂಕ್ ಖಾತೆ ತೆರೆದು ಅದರಲ್ಲೇ ತಮ್ಮ ಚುನಾವಣಾ ವೆಚ್ಚಗಳನ್ನು ನಿರ್ವಹಿಸಬೇಕಾಗುತ್ತದೆ. ಒಬ್ಬ ಅಭ್ಯರ್ಥಿ ಗರಿಷ್ಟ 4 ನಾಮಪತ್ರಗಳನ್ನು ಸಲ್ಲಿಸಬಹುದು ಹಾಗೂ ಎರಡಕ್ಕಿಂತ ಹೆಚ್ಚು ಕ್ಷೇತ್ರಗಳಲ್ಲಿ ಸ್ಪರ್ಧಿಸುವಂತಿಲ್ಲ.
ರಾಷ್ಟ್ರೀಯ, ರಾಜ್ಯ ಮಾನ್ಯತೆ ಪಡೆದ ಪಕ್ಷದ ಅಭ್ಯರ್ಥಿಗೆ ಒಬ್ಬ ಸೂಚಕರು, ನೋಂದಾಯಿತ ಮಾನ್ಯತೆ ಪಡೆಯದ ಪಕ್ಷ, ಪಕ್ಷೇತರರಿಗೆ 10 ಸೂಚಕರು ಸಹಿ ಮಾಡಿರಬೇಕು. ನಾಮಪತ್ರ ಸಲ್ಲಿಸುವ ಅಭ್ಯರ್ಥಿಯ ಜೊತೆಗೆ 4 ಇತರ ಅಧಿಕೃತ ವ್ಯಕ್ತಿಗಳಿಗೆ ಮಾತ್ರ ನಾಮಪತ್ರ ಸ್ವೀಕೃತಿ ಕೇಂದ್ರದಿಂದ 100 ಮೀಟರ್ ಅಂತರದೊಳಗೆ ಪ್ರವೇಶಿಸಲು ಅವಕಾಶವಿರುತ್ತದೆ.
ನಾಮಪತ್ರ ಸ್ವೀಕೃತಿ ಕೇಂದ್ರದ ಒಳಗಡೆ, ಪ್ರವೇಶ ದ್ವಾರದಲ್ಲಿ, ನಿರ್ಗಮನ ದ್ವಾರದಲ್ಲಿ ಕಣ್ಗಾವಲಿಗೆ ಸಿಸಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿದೆ. ನಾಮಪತ್ರ ಸ್ವೀಕೃತಿ ಕಾರ್ಯದ ಚಿತ್ರೀಕರಣ ಮಾಡಲು ವೀಡಿಯೋ ಕ್ಯಾಮೇರಾದೊಂದಿಗೆ ಸಿಬ್ಬಂದಿಯನ್ನು ನಿಯೋಜಿಸಲಾಗಿರುತ್ತದೆ. ಮಾನ್ಯ ಚುನಾವಣಾ ಆಯೋಗದ ಮಾರ್ಗದರ್ಶಗಳನ್ವಯ ನಾಮಪತ್ರ ಸ್ವೀಕೃತಿ ಕಾರ್ಯಕ್ಕೆ ಅವಶ್ಯವಿರುವ ಸಕಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ ಎಂದು ತಿಳಿಸಿದ ಅವರು ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸುವ ವೇಳೆ ಅನುಸರಿಸಬೇಕಾದ ಸೂಚನೆಗಳ ಬಗ್ಗೆ ತಿಳಿಸಿದರು.
DC Shivamogga ಸಭೆಯಲ್ಲಿ ವಿವಿಧ ರಾಜಕೀಯ ಪಕ್ಷಗಳ ಮುಖಂಡರು, ಅಪರ ಜಿಲ್ಲಾಧಿಕಾರಿ ಸಿದ್ದಲಿಂಗ ರೆಡ್ಡಿ ಹಾಜರಿದ್ದರು.