ಅಮೆರಿಕದ ಆರ್ಥಿಕತೆ ಕಳೆದ ನಾಲ್ಕನೇ ತ್ರೈಮಾಸಿಕದಲ್ಲಿ (ಅಕ್ಟೋಬರ್-ಡಿಸೆಂಬರ್) ಶೇ.6.9 ಬೆಳವಣಿಗೆ ದಾಖಲಿಸಿದೆ.
2021ರಲ್ಲಿ ಆರ್ಥಿಕತೆ ಬೆಳವಣಿಗೆ ದಾಖಲಿಸಿರುವುದರಿಂದ ಫೆಡರಲ್ ರಿಸರ್ವ್ ತನ್ನ ಬಡ್ಡಿದರಗಳನ್ನು ಮಾರ್ಚ್ ನಲ್ಲಿ ಏರಿಸಲು ಮುಂದಾಗಿದೆ. ಆರ್ಥಿಕತೆಗೆ ಇನ್ನು ಉನ್ನತ ಮಟ್ಟದ ಹಣಕಾಸು ನೆರವು ನೀಡಬೇಕಾದ ಅಗತ್ಯವಿಲ್ಲ ಎಂದು ಫೆಡರಲ್ ರಿಸರ್ವ್ ಮುಖ್ಯಸ್ಥ ಜೇರೋಮ್ ಪೊವೆಲ್ ತಿಳಿಸಿದ್ದಾರೆ.
ಕಳೆದ 1984ರಿಂದ ಇಲ್ಲಿಯವರೆಗಿನ ಅವಧಿಯಲ್ಲೇ ಗರಿಷ್ಠ ಆರ್ಥಿಕ ಬೆಳವಣಿಗೆಯನ್ನು ಅಮೆರಿಕ ದಾಖಲಿಸಿದೆ.
ಕಳೆದ ನಾಲ್ಕು ದಶಕದಲ್ಲೆ ಉತ್ತಮ ಪ್ರಗತಿ ಉಂಟಾಗಿದೆ. ಸರಕು ಮತ್ತು ಸೇವೆಗಳ ವಹಿವಾಟು ವೃದ್ಧಿಸಿದೆ. 2021ರಲ್ಲಿ ವಾರ್ಷಿಕವಾಗಿ ಜಿಡಿಪಿ ಶೇ.5.7ವೃದ್ದಿಸಿದೆ.2020ರಲ್ಲಿ ಕೋವಿಡ್ ಬಿಕ್ಕಟ್ಟಿನಿಂದಾಗಿ ಇದು ಶೇಕಡ 3.4ಕ್ಕೆ ಅಂದರೆ ಕಳೆದ 74 ವರ್ಷಗಳಲ್ಲಿಯೇ ಭಾರಿ ಕುಸಿತಕ್ಕೆ ಈಡಾಯಿತು. ಇದೀಗ ಮತ್ತೆ ಬೆಳವಣಿಗೆ ಹಂತವನ್ನು ಕಾಣುತ್ತಿದೆ.
ಅಮೆರಿಕದಲ್ಲಿ ಕಳೆದವಾರ ನಿರುದ್ಯೋಗ ಭತ್ಯೆಗೆ 2.60 ಲಕ್ಷ ಮಂದಿ ಅರ್ಜಿ ಸಲ್ಲಿಸಿದ್ದರು. ಇದಕ್ಕೂ ಹಿಂದಿನ ವಾರಕ್ಕೆ ಹೋಲಿಸಿದರೆ ಇಳಿಕೆಯಾಗಿದೆ. ಹೀಗಿದ್ದರೂ, ಅಮೆರಿಕದಲ್ಲಿ ಹಣದುಬ್ಬರ ಶೇ.6ರ ಏರುಗತಿಯಲ್ಲಿದ್ದು, ಫೆಡರಲ್ ರಿಸರ್ವ್ ನ ಶೇ.2ರ ಗುರಿಗಿಂತ ಮೇಲಿದೆ. ಆದರೆ ಫೆಡರಲ್ ರಿಸರ್ವ್ ಬಡ್ಡಿ ದರ ಇಳಿಸಲು ಮುಂದಾಗಿರುವುದು ಜಾಗತಿಕ ಷೇರು ಮಾರುಕಟ್ಟೆಯನ್ನು ತಲ್ಲಣಗೊಳಿಸಿದೆ.
ಅಭಿವೃದ್ಧಿಶೀಲ ದೇಶಗಳಿಂದ ಹೂಡಿಕೆ ಹೊರಹೋಗುವ ನಿರೀಕ್ಷೆಯಿದೆ ಎಂದು ತಿಳಿದುಬಂದಿದೆ.