ಭಾರತದ ಚುನಾವಣಾ ಆಯೋಗ, ಚುನಾವಣಾ ಕಾನೂನು ಮತ್ತು ನಿಯಮಗಳಿಗೆ 4 ಪ್ರಮುಖ ತಿದ್ದುಪಡಿಗಳನ್ನು ಮಾಡಿದೆ. ಇವುಗಳು ಆಗಸ್ಟ್ ಒಂದರಿಂದ ಜಾರಿಗೊಳ್ಳಲಿದೆ ಎಂದು ಉಡುಪಿ ಜಿಲ್ಲಾಧಿಕಾರಿ ಕುರ್ಮ ರಾವ್ ಎಂ. ಅವರು ಇಂದಿಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
ಇವುಗಳಲ್ಲಿ ಪ್ರಮುಖವಾದುದು ಮತದಾರರ ಗುರುತು ಚೀಟಿಗೆ ಆಧಾರ ಕಾರ್ಡ್ನ್ನು ಲಿಂಕ್ ಮಾಡುವುದು. ಮತದಾನದ ವೇಳೆ ಮತದಾರರ ಗುರುತನ್ನು ಖಚಿತಪಡಿಸಿಕೊಳ್ಳಲು ಈ ಜೋಡಣೆಗೆ ಸೂಚಿಸಲಾಗಿದೆ ಎಂದವರು ತಿಳಿಸಿದ್ದಾರೆ.
ಆದರೆ, ಎಪಿಕ್ ಕಾರ್ಡ್ಗೆ ಆಧಾರ ಜೋಡಣೆ ಕಡ್ಡಾಯವಲ್ಲ. ಒಂದು ವೇಳೆ ಎಪಿಕ್ ಕಾರ್ಡ್ಗೆ ಮತದಾರನ ಆಧಾರ್ ಲಿಂಕ್ ಆಗದೇ ಇದ್ದರೂ ಆತನಿಗೆ ಮತದಾನ ನಿರಾಕರಿಸುವಂತಿಲ್ಲ. ಮತದಾರರ ಪಟ್ಟಿಗೆ ಆತನ ಹೆಸರನ್ನು ನೊಂದಾಯಿಸಲು ಸಹ ನಿರಾಕರಿಸುವಂತಿಲ್ಲ ಎಂದು ಡಿ.ಸಿ ಅವರು ಹೇಳಿದ್ದಾರೆ.
ಮತದಾರರ ಪಟ್ಟಿಗೆ ಹೊಸದಾಗಿ ಹೆಸರು ನೊಂದಾಯಿಸಿಕೊಳ್ಳಲು ಇದುವರೆಗೆ ಪ್ರತಿ ವರ್ಷ ಇದ್ದ ಒಂದು ಅವಕಾಶವನ್ನು ಈಗ ನಾಲ್ಕು ಅವಕಾಶವಾಗಿ ಬದಲಾಯಿಸಲಾಗಿದೆ. ಇದರಂತೆ ಜ.1, ಎ.1, ಜುಲೈ1, ಅ.1ರಂದು ಮತದಾರರ ಪಟ್ಟಿಗೆ ನೊಂದಾಣಿ ಮಾಡಿಕೊಳ್ಳಲು ಅವಕಾಶವಿದೆ ಎಂದು ಜಿಲ್ಲಾಧಿಕಾರಿ ತಿಳಿಸಿದ್ದಾರೆ.
