ಜೈಪುರ ಪಿಂಕ್ ಪ್ಯಾಂಥರ್ಸ್ ವಿರುದ್ಧ ಸೋತ ಹೊರತಾಗಿಯೂ ದಬಾಂಗ್ ದೆಹಲಿ ತಂಡ ಪ್ರೊ ಕಬಡ್ಡಿ ಲೀಗ್ ನ 8ನೇ ಆವೃತ್ತಿ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನ ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಗಿದೆ.
ವೈಟ್ ಫೀಲ್ಡ್ ನ ಶೆರಾಟಾನ್ ಗ್ರಾಂಡ್ ಹೋಟೆಲ್ ಸಭಾಂಗಣದಲ್ಲಿ ನಡೆದ ಮೊದಲ ಹಣಾಹಣಿಯಲ್ಲಿ ದಬಾಂಗ್ ತಂಡ 30ರಿಂದ 36 ಅಂಕಗಳ ಅಂತರದಿಂದ ಜೈಪುರ ತಂಡಕ್ಕೆ ಶರಣಾಗಿ ಟೂರ್ನಿಯಲ್ಲಿ 5ನೇ ಸೋಲಿಗೆ ಒಳಗಾಯಿತು.
ಒಟ್ಟಾರೆ 54 ಅಂಕ ಹೊಂದಿರುವ ದೆಹಲಿ ತಂಡ ಅಂಕಪಟ್ಟಿಯಲ್ಲಿ ಲೀಗ್ ಲೀಡರ್ ಆಗಿ ಮುಂದುವರಿದಿದೆ. ಈಚೆ ಏಳನೇ ಜಯಸಿ ದಾಖಲಿಸಿದ ಪಿಂಕ್ ಪ್ಯಾಂಥರ್ಸ್ ಒಟ್ಟು 45 ಅಂಕಗಳೊಂದಿಗೆ ನಾಲ್ಕನೇ ಸ್ಥಾನ ಪಡೆದುಕೊಂಡಿದೆ.
ಪ್ರಥಮಾರ್ಧದ ಅಂತ್ಯಕ್ಕೆ 21ರಿಂದ 15ರಲ್ಲಿ ಮೇಲುಗೈ ಸಾಧಿಸಿದ ಜೈಪುರ ತಂಡ, ದ್ವಿತೀಯಾರ್ಧದಲ್ಲಿ ಎದುರಲ್ಲಿ ತಂಡದಿಂದ 15 ರಿಂದ 15 ರಲ್ಲಿ ಸಮಬಲದ ಹೋರಾಟ ಎದುರಿಸಿತ್ತಾದರೂ ಅಂತಿಮವಾಗಿ ಆರು ಅಂಕಗಳಿಂದ ಗೆಲುವಿನ ಕೇಕೆ ಹಾಕಿತು. ಜೈಪುರ ಪರ ಆಲ್ರೌಂಡರ್ ದೀಪಕ್ ಹೂಡಾ 12ಅಂಕ ಕಲೆಹಾಕಿದರೆ, ದಬಾಂಗ್ ಪರ ಏಕಾಂಗಿ ಹೋರಾಟ ನಡೆಸಿದ ವಿಜಯ್ 16 ಅಂಕಗಳಿಸಿ ಗಮನ ಸೆಳೆದಿದ್ದಾರೆ
