ಅಂಗೈಯಲ್ಲಿನ ಮೊಬೈಲ್ ಫೋನ್ ಈಗ ಅಂಗೈಯಲ್ಲಿನ ಅಂಗಡಿಯಂತಾಗಿದೆ. ಈಗ ಎಲ್ಲರಿಗೂ ಅತ್ಯಂತ ಸರಳ ಮತ್ತು ಸುಲಭವಾಗಿ ಎಲ್ಲಾ ಅಗತ್ಯ ವಸ್ತುಗಳು ಮನೆಬಾಗಿಲಿಗೆ ಬಂದು ಬಿಡುತ್ತವೆ. ಭೌತಿಕ ರೂಪದಲ್ಲಿರುವ ಹಣ ಈಗ ಡಿಜಿಟಲ್ ಸ್ವರೂಪ ಪಡೆದುಕೊಂಡಿದೆ.
ಇಂದಿನ ಆಧುನಿಕ ಯುಗದಲ್ಲಿ ಯಾರ ಹತ್ತಿರವೂ ಸಮಯವಿಲ್ಲ.
ಈಗ ಹೆಚ್ಚಾಗಿ ಯಾರೂ ಕೂಡ ಮಾರ್ಕೆಟ್ ಗೆ ಹೋಗಿ ಅಗತ್ಯವಸ್ತುಗಳಾಗಲಿ, ಬಟ್ಟೆ, ಆಭರಣಗಳಾಗಲಿ, ಚಪ್ಪಲಿಗಳಾಗಲಿ, ಕೊನೆಗೆ ದಿನಸಿಯನ್ನೂ ಹೊರಗೆ ಹೋಗಿ ಕೊಂಡುಕೊಳ್ಳಲು ಇಷ್ಟಪಡುವುದಿಲ್ಲ. ಹಾಗೇಯೇ ತಿನಿಸು ಕೂಡ ಮನೆ ಬಾಗಿಲಿಗೆ ಬಂದು ರೆಡಿಯಾಗಿ ನಿಂತು ಬಿಡಬೇಕು. ಅಂತಹ ನಿರೀಕ್ಷೆ ನಮ್ಮದಾಗಿದೆ. ಅಂತೂ ಎಲ್ಲರೂ ಐಟಿ ಜಗತ್ತಿನ ಆನ್ ಲೈನ್ ಶಾಪಿಂಗ್ ಗೆ ಜೋತು ಬಿದ್ದಿದ್ದೇವೆ.
ಕೆಲವೊಮ್ಮೆ ಈ ಆನ್ ಲೈನ್ ಶಾಪಿಂಗ್ ಲಾಭದಾಯಕವಾದರೆ ,ಇನ್ನೂ ಕೆಲವೊಮ್ಮೆ ತಲೆಕೆರೆದುಕೊಳ್ಳುವಂತೆ ಮಾಡಿ, ಕೆಟ್ಟ ತಲೆನೋವಾಗಿ ಪರಿಣಮಿಸುತ್ತದೆ.
ಆನ್ ಲೈನ್ ಶಾಪಿಂಗ್ ನಿಂದ ಸಮಯವನ್ನು ಉಳಿಸಬಹುದು. ಆದರೆ ಆನ್ ಲೈನ್ ಶಾಪಿಂಗ್ ಭರಾಟೆಯಿಂದ ಹಬ್ಬಕ್ಕೋ, ಮದುವೆಗೂ ಒಮ್ಮೆ ಮನೆಮಂದಿಯೆಲ್ಲಾ ಶಾಪಿಂಗ್ ಗೆ ಹೋಗುವ ಸಂಭ್ರಮ ಕಡಿಮೆಯಾಗುತ್ತಿದೆ.
ಆನ್ ಲೈನ್ ಶಾಪಿಂಗ್ ಮೂಲಕ ನಮಗೆ ಇಷ್ಟದ ವಿವಿಧ ರೀತಿಯ ಬಟ್ಟೆಗಳಾಗಲಿ, ಅಗತ್ಯವಸ್ತುಗಳೇ ಆಗಲಿ ಅಂಗೈನ ಮೊಬೈಲ್ ಇಂದಲೇ ಆರ್ಡರ್ ಮಾಡಿ ಮನೆ ಬಾಗಿಲಿಗೆ ವಸ್ತುಗಳನ್ನು ತರಿಸಿಕೊಳ್ಳಬಹುದು.
ಈಗಾಗಲೇ ಅಂಗೈನ ಅಂಗಡಿಗೆ ಅಂಟಿಕೊಂಡಿರುವ ಅಭ್ಯಾಸ ಒಂದು ಚಟವಾಗಿಯೇ ಪರಿಣಮಿಸಿ ಬಿಟ್ಟಿದೆ.
ಆದರೆ, ಆನ್ ಲೈನ್ ಶಾಪಿಂಗ್ ವೇಳೆ ಹಲವಾರು ಅಗತ್ಯ ಕ್ರಮಗಳನ್ನು ಅನುಸರಿಸುವುದು ಉತ್ತಮ. ಇಲ್ಲದಿದ್ದರೆ, ಎಷ್ಟೇ ಬುದ್ದಿವಂತರಾದರೂ ಮೋಸ ಹೋಗಿ ಬಿಡುತ್ತೇವೆ.
ಒಮ್ಮೆ ನಾನು ಹಾಗೂ ನನ್ನ ಸ್ನೇಹಿತೆ ಬಹಳ ದಿನಗಳ ನಂತರ ಭೇಟಿ ಆದೆವು. ನೆನಪಿನಲ್ಲಿ ಉಳಿಯುವಂತಹ ಉಡುಗೊರೆಯನ್ನ ಕೊಡಬೇಕು ಎನ್ನುವ ನೆಪದಲ್ಲಿ ಆನ್ ಲೈನ್ ನಲ್ಲಿ ಶಾಪಿಂಗ್ ಗೆ ಮುಂದಾದೆವು. ಹೀಗೆ ಶಾಪಿಂಗ್ ಮಾಡಲು ಹೊರಟಾಗ ಯೂ ಟ್ಯೂಬ್ ನಲ್ಲಿ ಒಂದು ವೆಬ್ ಸೈಟ್ ಆಕರ್ಷಕವಾಗಿ ನಮ್ಮನ್ನು ಸೆಳೆಯಿತು. ಜಾಹೀರಾತಿನಲ್ಲಿ ಒಳ್ಳೆಯ ಆಫರ್ ಇರುವುದನ್ನ ನೋಡಿ 1000 ರೂ.ಗಳ 2 ಬಟ್ಟೆಗಳನ್ನು ಆರ್ಡರ್ ಮಾಡಿಯೂ ಆಯಿತು. ಆ ಬಟ್ಟೆಗಳನ್ನು ಮದುವೆಗೊ, ಮನೆಯ ಸಂಭ್ರಮಕ್ಕೋ ಹಾಕಿಕೊಂಡು ಬೇರೆಯವರ ಕಣ್ಣು ಕುಕ್ಕುವಂತೆ ಮೆರೆದರಾಯಿತು ಎಂದು ನನ್ನ ಅಹಂ ಸಾರಿ ಸಾರಿ ಹೇಳುತ್ತಿತ್ತು. ಅದು ಬರುವ ತನಕ ಹತ್ತಾರು ಜನರ ಹತ್ತಿರ ಕೊಚ್ಚಿಕೊಂಡಿದ್ದೇ ಕೊಚ್ಚಿಕೊಂಡಿದ್ದು.
ಹೀಗೆ ಆ ಬಟ್ಟೆಗಳನ್ನು ಹಾಕಿಕೊಂಡು ಸಂಭ್ರಮಿಸುವುದರ ಬಗ್ಗೆ ಕಲ್ಪನಾ ಲೋಕದಲ್ಲಿ ವಿಹರಿಸಿದ್ದೇ ವಿಹರಿಸಿದ್ದು. ಅಮ್ಮನ ಹತ್ತಿರ ಮತ್ತು ಸ್ನೇಹಿತರ ಹತ್ತಿರ ಮದುವೆಗೆ, ಸಮಾರಂಭಗಳಿಗೆ ಧರಿಸುವಂತಹ ಎರಡು ಭವ್ಯ ಉಡುಪನ್ನು ಕೇವಲ ಸಾವಿರ ರೂಪಾಯಿ ಗೆ ತರಿಸಿಕೊಳ್ಳುತ್ತಿದ್ದೆನೆ ಎಂದು ಜಂಬದಿಂದ ಹೇಳಿಕೊಂಡಿದ್ದೆ. ಯಾವುದಾದರೂ ಬೈಕ್ ನ ಶಬ್ದ ಆದಾಗಲೆಲ್ಲ ಅಂಗಳದತ್ತ ಕಣ್ಣು ಹಾಯಿಸುವುದು. ಹೀಗೆಯೇ ಹಲವಾರು ಬಾರಿ ಆಯಿತು. ಅಂತೂ ಒಂದು ದಿನ ಕೋರಿಯರ್ ಮನೆ ಬಾಗಿಲಿಗೆ ಬಂದೇ ಬಿಟ್ಟಿತು. ನಮ್ಮ ಸಂತೋಷಕ್ಕೆ ಪಾರವೇ ಇರಲಿಲ್ಲ. ಎಲ್ಲರ ಕಣ್ಣುಗಳೂ ಆ ಪಾರ್ಸಲ್ ಮೇಲೆಯೇ ನೆಟ್ಟಿದ್ದವು. ಪಾರ್ಸಲ್ ತೆರೆಯುತ್ತಾ ಹೋದಂತೆ ಗೊತ್ತಾಗಿದ್ದು ನಾವು ಮೋಸ ಹೋಗಿದ್ದೇವೆ ಎಂದು ಆ ಪಾರ್ಸೆಲ್ ನಲ್ಲಿ ಯಾರೋ ಉಪಯೋಗಿಸಿ ಬಿಟ್ಟ , ಹರಿದು ಹೋಗಿ ಗಬ್ಬು ವಾಸನೆ ಬೀರುವ ಬಟ್ಟೆಗಳಿದ್ದವು. ಆ ನಂತರ ಆ ಜಾಲತಾಣಕ್ಕೆ ಭೇಟಿ ನೀಡಲು ನೋಡಿದರೆ, ಅಂಥದ್ದೊಂದು ವೆಬ್ ಸೈಟ್ ಇಲ್ಲವೇ ಇಲ್ಲ ಎಂದು ತಿಳಿಯಿತು…ನಮ್ಮ ದುಡ್ಡು ನೀರಿನಲ್ಲಿ ಹೋಮವಾದಂತಾಯಿತು..
ಆನ್ ಲೈನ್ ಶಾಪಿಂಗ್ ಮಾಡುವಾಗ ಅನುಸರಿಸಬೇಕಾದ ಕೆಲವು ಟಿಪ್ಸ್ ಗಳು ಹೀಗಿವೆ.
ಒಮ್ಮೆ ಓದಿ ಎಂದಾದರೂ ಉಪಯೋಗಕ್ಕೆ ಬರಲಿವೆ.
- ಯಾವಾಗಲೂ ಅಧಿಕೃತ ಇ-ಕಾಮರ್ಸ್ ಜಾಲತಾಣಗಳಲ್ಲೇ ವ್ಯವಹಾರ ನಡೆಸಿ. ಅವುಗಳನ್ನೇ ಹೋಲುವ, ಇಲ್ಲವೇ ನಾನಾ ಹೆಸರಿನ ನಕಲಿ ಇ-ಕಾಮರ್ಸ್ ಜಾಲತಾಣಗಳು ಹುಟ್ಟಿಕೊಳ್ಳುತ್ತಲೇ ಇವೆ. ನಿಮ್ಮ ಇ-ಮೇಲ್, ವಾಟ್ಸಪ್ ಗಳಿಗೆ ಬರುವ ಲಿಂಕ್ ಗಳನ್ನು ಕ್ಲಿಕ್ ಮಾಡುವಾಗ ಹತ್ತು ಸಲ ಯೋಚಿಸಿ.
- ಲಕ್ಕಿ ಡ್ರಾ ನಲ್ಲಿ ನೀವು ಗೆದ್ದಿದ್ದೀರಿ. ನಿಮಗಾಗಿ ಸ್ಪೆಷಲ್ ಡೀಲ್ ಇದೆ ಎಂದು ಯಾರಾದರೂ ನಿಮಗೆ ಕರೆ ಮಾಡಬಹುದು. 10ಸಾವಿರ ರೂಪಾಯಿ ಬೆಲೆಯ ಸೀರೆ ನಿಮಗೆ ಕೇವಲ 3 ಸಾವಿರ ರೂಪಾಯಿಗೆ ಕೊಡುವುದಾಗಿ ಹೇಳಬಹುದು. ಆರ್ಡರ್ ದೃಢೀಕರಿಸಲು ನಿಮ್ಮ ಇ-ಮೇಲ್ ಗೆ ಬರುವ ಲಿಂಕ್ ಅನ್ನು ಕ್ಲಿಕ್ ಮಾಡಿ ಎಂದು ಸೂಚಿಸಬಹುದು. ಕ್ಲಿಕ್ ಮಾಡಿದರೆ, ನಿಮ್ಮ ವೈಯಕ್ತಿಕ ಮಾಹಿತಿಗಳು ಕಳುವಾಗುವ ಅವಕಾಶಗಳು ಇವೆ. ಎಚ್ಚರವಿರಲಿ.
- ಅಮೆಜಾನ್, ಫ್ಲಿಪ್ ಕಾರ್ಟ್ ಹೆಸರಿನಲ್ಲಿ ನಂಬಲು ಅಸಾಧ್ಯವಾದ ಆಫರ್ ಗಳ ಹೊತ್ತ ಸಂದೇಶಗಳು ವಾಟ್ಸಪ್ ನಲ್ಲಿ ಬರಬಹುದು. ಈ ಜನಪ್ರಿಯ ಸೈಟ್ ಗಳ ಗ್ರಾಹಕರ ಖಾತೆಗಳ ಮಾಹಿತಿ ಕದಿಯುವ ಯತ್ನವೂ ನಡೆದಿರಬಹುದು. ಸುಲಭದ ಪ್ರಶ್ನೆಗೆ ಉತ್ತರಿಸಿ ಬಹುಮಾನ ಗೆಲ್ಲಿ ಎನ್ನುವ ಆಮಿಷಗಳೂ ಇರುತ್ತವೆ. ಅಂತಹ ಅನುಮಾನಾಸ್ಪದ ಆಫರ್ ಗಳ ಸಂದೇಶಗಳನ್ನು ಡಿಲೀಟ್ ಮಾಡಿ.
- ಉಚಿತ ಕೂಪನ್ ಆಸೆಗೆ ಪಟ್ಟು ಬಿದ್ದು ಇಕ್ಕಟ್ಟಿಗೆ ಸಿಲುಕಬೇಡಿ. ಕೆಲವು ವಸ್ತುಗಳನ್ನು ಖರೀದಿ ಮಾಡುವಾಗ ಕೂಪನ್ ಕೋಡ್ ಗಳನ್ನು ಹಾಕಿದರೆ ಒಂದಿಷ್ಟು ರಿಯಾಯಿತಿ ಸಿಗುತ್ತದೆ. ಈ ಕೂಪನ್ ಕೋಡ್ ಗಳಿಗಾಗಿ ಗೂಗಲ್ ನಲ್ಲಿ ಸರ್ಚ್ ಮಾಡಿದಾಗ, ಸಿಗುವ ಬಹುತೇಕ ಕೂಪನ್ ಗಳು ನಕಲಿ ಆಗಿರುತ್ತವೆ. ಅದರ ಬಗ್ಗೆ ಗೋಜಿಗೆ ಹೋಗದಿರುವುದು ನಿಮ್ಮ ಜಾಣತನ.
- ಹಬ್ಬದ ಸೀಸನ್ ನಲ್ಲಿ ಭರ್ಜರಿ ಶಾಪಿಂಗ್ ಮಾಡುವ ಆಸೆ ಎಲ್ಲರಿಗೂ ಇದ್ದೇ ಇರುತ್ತದೆ. ಇಂಥ ಸಂದರ್ಭವನ್ನು ವಂಚಕರು ಬಳಸಿಕೊಳ್ಳುತ್ತಾರೆ. ನಿಮ್ಮ ಕ್ರೆಡಿಟ್ ಕಾರ್ಡ್ ಮಿತಿಯನ್ನು ಜಾಸ್ತಿ ಮಾಡುತ್ತೇವೆ. ಇಲ್ಲವೇ ಹೊಸ ಕ್ರೆಡಿಟ್ ಕಾರ್ಡ್ ನೀಡುತ್ತವೆ ಎನ್ನಬಹುದು. ನಿಮಗೆ ಸಹಾಯ ಮಾಡುವ ನೆಪದಲ್ಲಿ ನಿಮ್ಮಿಂದ ಮಾಹಿತಿಯನ್ನು ಪಡೆಯುವ ಅವಕಾಶಗಳು ಇಲ್ಲಿವೆ.
- ಆಫರ್ ಗಳು, ಹೆಚ್ಚಿನ ರಿಯಾಯಿತಿ ನೀಡುವುದಾಗಿ ನಿಮಗೆ ಬರುವ ಎಸ್ ಎಂಎಸ್ ಅಥವಾ ಇ-ಮೇಲ್ ಗಳನ್ನು ನಂಬಬೇಡಿ. ನಿಮ್ಮ ಮಾಹಿತಿ ಕದಿಯುವ ಫಿಶಿಂಗ್ ಮೇಲ್ ಗಳ ಬಗ್ಗೆ ಎಚ್ಚರ ಇರಲಿ.
07.ಆನ್ ಲೈನ್ ನಲ್ಲಿ ಶಾಪಿಂಗ್ ಮಾಡುವಾಗ ಈಗಾಗಲೇ ನೀವು ಬಯಸಿದ ಉಡುಗೆಯಾಗಲಿ, ಅಗತ್ಯವಸ್ತುಗಳನ್ನಾಗಲಿ , ಈಗಾಗಲೇ ಖರೀದಿಸಿರುವ ಗ್ರಾಹಕರು ತಮ್ಮ ಅಭಿಪ್ರಾಯಗಳನ್ನು (review) ಹಂಚಿಕೊಂಡಿರುತ್ತಾರೆ. ಅದನ್ನು ಒಮ್ಮೆ ಗಮನಿಸಿ. ನಂತರ ಆರ್ಡರ್ ಮಾಡಿ.
- ಆನ್ಲೈನ್ ನಲ್ಲಿ ಯಾವುದೋ ಒಂದು ವಸ್ತು ನಿಮ್ಮ ಮನೆಗೆ ಬಂದಿರಬಹುದು. ಅದನ್ನು ಖಚಿತಪಡಿಸಿಕೊಳ್ಳುವ ವಂಚಕರು, ಡಿಲಿವರಿ ಫೀಡ್ ಬ್ಯಾಕ್ ಪಡೆಯುವ ನೆಪದಲ್ಲಿ ನಿಮ್ಮ ಮೊಬೈಲ್ ನಂಬರ್ ಗೆ ಕರೆ ಮಾಡಬಹುದು. ಈ ನೆಪದಲ್ಲಿ ನಿಮ್ಮ ಮಾಹಿತಿಯನ್ನು ಕದಿಯಬಹುದು. ಅಂತಹ ಫೋನ್ ಕಾಲ್ ಗಳಿಂದ ಎಚ್ಚರವಿರಲಿ.
ಬಲ್ಲವರ ಪಾಲಿಗೆ ಆನ್ ಲೈನ್ ಶಾಪಿಂಗ್ ಎನ್ನುವಂಥದ್ದು ಕಲೆಯಾದರೆ, ಎಚ್ಚರ ತಪ್ಪಿದರೆ ಅದು ಕೊಳೆಯೂ ಆಗಬಲ್ಲದು.
ಉಂಡೂ ಉಂಡೂ ರೋಗ ತಂದುಕೊಳ್ಳುವಂತೆ, ಕೊಂಡೂ ಕೊಂಡೂ ಕೊಳ್ಳುಬಾಕ ಸಂಸ್ಕೃತಿಯನ್ನು ಬೆಳೆಸಿಕೊಳ್ಳುವುದೂ ಸಹ ಒಂದು ರೋಗವೇ ಸರಿ.
ಆನ್ ಲೈನ್ ಶಾಪಿಂಗ್ ನಡೆಸುವಾಗ ಹಣದ ಹರಿವಿನ ಅರಿವಾಗುವುದೇ ಇಲ್ಲ. ಅಗತ್ಯವಿದ್ದಲ್ಲಿ ಮಾತ್ರ ಶಾಪಿಂಗ್ ಮಾಡಿ. ಅನಗತ್ಯವಾಗಿ ಕೊಂಡುಕೊಳ್ಳುವಾಗ ಯೋಚಿಸಿ.
Our site will give you the option of the best Article available in the selected area along with their Analytics of advertisement. You can choose the Keelambi Media Lab Pvt Ltd according to your need/budget.
Latest News on WhatsApp
Why Keelambi Media Lab Pvt Ltd ?
Klive News has simplified and given a complete makeover to the whole process of booking ads for different media platforms. Now there is no need for you to travel all the way to the respective offices. Nor do you need to write messages manually on Email form. Klive.news lets you do all this and more from the comfort of your home, office or even when you’re travelling. We have created a niche for ourselves in the world of advertising and our work speaks volumes about our ability and integrity.
KLIVE at Google News App
KLIVE Android App on Google Play Store
Download the most loved Klive App for your Android phone or tablet.
