ಭಾರತ ತಂಡದ ದಕ್ಷಿಣ ಆಫ್ರಿಕಾ ಪ್ರವಾಸ

ಓಮಿಕ್ರಾನ್ ಕೊರೊನಾ ವೈರಸ್ ಆತಂಕದ ಹಿನ್ನೆಲೆಯಲ್ಲಿ ಮಾರ್ಪಾಟುಗೊಂಡ ಟೀಮ್ ಇಂಡಿಯಾದ ದಕ್ಷಿಣ ಆಫ್ರಿಕಾ ಪ್ರವಾಸದ ಹೊಸ ವೇಳಾಪಟ್ಟಿಯನ್ನು ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಸಂಸ್ಥೆ ಬಿಡುಗಡೆ ಮಾಡಿದೆ.
ಟೆಸ್ಟ್ ಸರಣಿಯು ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ನ ಭಾಗವಾಗಿದ್ದರೆ, ಏಕದಿನ ಪಂದ್ಯಗಳ ಸರಣಿ 2023 ರ ಐಸಿಸಿ ಪುರುಷರ ಏಕದಿನ ವಿಶ್ವಕಪ್ ನ ಅರ್ಹತಾ ಸುತ್ತು ಹಾಗೂ ಐಸಿಸಿ ಪುರುಷರ ಏಕದಿನ ವಿಶ್ವಕಪ್ ಸೂಪರ್ ಲೀಗ್ ನ ಭಾಗವಾಗಿರಲಿದೆ. ಒಟ್ಟು ನಾಲ್ಕು ತಾಣಗಳಲ್ಲಿ ಸರಣಿ ಆಯೋಜನೆಗೊಂಡಿದೆ.
ಡಿಸೆಂಬರ್ 17 ರಿಂದ ಆರಂಭ ಕೊಳ್ಳಬೇಕಾದ ಸರಣಿ 26 ಕ್ಕೆ ಮುಂದೂಡಿಕೆ ಆಗಿರುವುದನ್ನು ಈ ಹಿಂದೆಯೇ ಬಿಸಿಸಿಐ ಪ್ರಕಟಿಸಿತ್ತು. ಅಲ್ಲದೆ, ಟಿ20 ಸರಣಿ ರದ್ದು ಮಾಡಲಾಗಿದೆ ಎಂದು ಹೇಳಿತ್ತು. ಇದೀಗ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ವೇಳಾಪಟ್ಟಿ ಬಿಡುಗಡೆ ಮಾಡಿದೆ. ಮೂರು ಟೆಸ್ಟ್ ಹಾಗೂ ಅಷ್ಟೇ ಸಂಖ್ಯೆ ಏಕದಿನ ಪಂದ್ಯಗಳನ್ನು ಒಳಗೊಂಡ ಪ್ರವಾಸ ಡಿಸೆಂಬರ್ 26 ರಿಂದ ಆರಂಭಗೊಂಡು 2022 ರ ಜನವರಿ 23ರವರೆಗೆ ನಡೆಯಲಿದೆ.