ಮಲೆನಾಡಿನ ಭರತನಾಟ್ಯ ಕಲೆಯ ಕಂಪು ಅಂತರಾಷ್ಟ್ರೀಯ ವೇದಿಕೆಯಲ್ಲಿ ಪಸರಿಸಲು ಶಿವಮೊಗ್ಗದ ಸಹಚೇತನ ನಾಟ್ಯಾಲಯದ ಏಳು ಸದಸ್ಯರ ತಂಡ ದುಬೈಗೆ ಪ್ರಯಾಣ ಬೆಳೆಸಿದೆ.
ಗುರು ವಿದುಷಿ ಸಹನಾ ಚೇತನ್ ಅವರ ಮಾರ್ಗದರ್ಶನ ಹಾಗೂ ನಿರ್ದೇಶನದಲ್ಲಿ ತೆರಳಿರುವ ತಂಡ, ನವೆಂಬರ್ 22ರಂದು ದುಬೈನ ಅಲ್ ಖಿಸೈಸ್ನ ನ್ಯೂ ಡಾನ್ ಪ್ರೈವೇಟ್ ಸ್ಕೂಲ್ ಆವರಣದಲ್ಲಿ ನಡೆಯಲಿರುವ **‘ದುಬೈ ಕರ್ನಾಟಕ ರಾಜ್ಯೋತ್ಸವ–2026’**ರ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಭರತನಾಟ್ಯ ಪ್ರದರ್ಶನ ನೀಡಲಿದೆ.
ದುಬೈಗೆ ತೆರಳಿರುವ ತಂಡದಲ್ಲಿ ವಿದುಷಿ ಸಹನಾ ಚೇತನ್, ಸಿಂಧುಶ್ರೀ ಅಡಿಗ, ಸ್ನೇಹಶ್ರೀ, ರವೀನಾ, ಸಂಜನಾ ಸಾಳಂಕೆ, ಚರಿತಾ ಪಟೇಲ್ ಹಾಗೂ ಚೇತನ್ ಎಸ್. ಇದ್ದಾರೆ.
ಕರ್ನಾಟಕ ಸಂಘ ದುಬೈ ಹಾಗೂ ಕನ್ನಡಿಗರ ಕೂಟ ದುಬೈ ಜಂಟಿಯಾಗಿ ಆಯೋಜಿಸುತ್ತಿರುವ ಈ ರಾಜ್ಯೋತ್ಸವ ಕಾರ್ಯಕ್ರಮ, ವಿದೇಶಿ ನೆಲದಲ್ಲಿ ಕನ್ನಡ ನಾಡು, ನುಡಿ, ಕಲೆ, ಸಾಹಿತ್ಯ ಹಾಗೂ ಸಂಸ್ಕೃತಿಯ ವೈಭವವನ್ನು ಸಾರುವ ವೇದಿಕೆಯಾಗಿದೆ.
ಈ ಸಾಂಸ್ಕೃತಿಕ ಉತ್ಸವದಲ್ಲಿ ಸಹಚೇತನ ನಾಟ್ಯಾಲಯದ ಕಲಾವಿದರು ಭರತನಾಟ್ಯದ ಮೂಲಕ ಕರ್ನಾಟಕದ ಶ್ರೀಮಂತ ಕಲಾ ಪರಂಪರೆ ಹಾಗೂ ಭಾರತೀಯ ಶಾಸ್ತ್ರೀಯ ನೃತ್ಯದ ಸೊಬಗನ್ನು ಅನಿವಾಸಿ ಕನ್ನಡಿಗರ ಮುಂದೆ ಅನಾವರಣಗೊಳಿಸಲಿದ್ದಾರೆ.
ವಿಶೇಷ ಕಲಾತ್ಮಕ ಪರಿಕಲ್ಪನೆಯಲ್ಲಿ ರೂಪುಗೊಂಡಿರುವ ನೃತ್ಯ ಸಂಯೋಜನೆಗಳು ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಲಿವೆ. ಶಿವಮೊಗ್ಗದ ಕಲಾವಿದರಿಗೆ ಅಂತರಾಷ್ಟ್ರೀಯ ವೇದಿಕೆಯಲ್ಲಿ ತಮ್ಮ ಪ್ರತಿಭೆ ಪ್ರದರ್ಶಿಸಲು ದೊರೆತಿರುವ ಈ ಅವಕಾಶ, ಸಹಚೇತನ ನಾಟ್ಯಾಲಯದ ಪಾಲಿಗೆ ಹೆಮ್ಮೆಯ ಮೈಲಿಗಲ್ಲಾಗಿದ್ದು, ಜಿಲ್ಲೆಯ ಸಾಂಸ್ಕೃತಿಕ ಕ್ಷೇತ್ರಕ್ಕೂ ಗೌರವ ತಂದಿದೆ.
