ಸರ್ವಾಂಗೀಣ ಸಾಧನೆಗೈದ ಮೂರು ಬಾರಿಯ ಚಾಂಪಿಯನ್ ಪಾಟ್ನಾ ತಂಡ ಪ್ರೊ ಕಬಡ್ಡಿ ಲೀಗ್ ನ 8ನೇ ಆವೃತ್ತಿಯ 80ನೇ ಹಣಾಹಣಿಯಲ್ಲಿ ತಮಿಳು ತಲೈವಾಸ್ ತಂಡವನ್ನು ಸುಲಭವಾಗಿ ಸೋಲಿಸಿ ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನ ಪಡೆದುಕೊಂಡಿದೆ.
ವೈಟ್ ಫೀಲ್ಡ್ ನ ಶೆರಟಾನ್ ಗ್ರಾಂಡ್ ಹೋಟೆಲ್ ಸಭಾಂಗಣದಲ್ಲಿ ನಡೆದ ಉಭಯ ಅವಧಿಗಳಲ್ಲಿ ಪಾರಮ್ಯ ಮೆರೆದ ಪ್ರಶಾಂತ್ ಕುಮಾರ್ ರೈ ನಾಯಕತ್ವದ ಪೈರೇಟ್ಸ್ ತಂಡ 52 ರಿಂದ 24 ಅಂಕಗಳ ಭಾರಿ ಅಂತರದಿಂದ ಜಯ ಸಾಧಿಸಿತು.
ಡಿಫೆಂಡರ್ ಸಾಗರ್ ಅವರ 8 ಅಂಕಗಳ ಕೊಡುಗೆಯ ಹೊರತಾಗಿಯೂ ತಲೈವಾಸ್ ತಂಡ ಸೋಲಿಗೆ ಶರಣಾಯಿತು. ಇದು ಕಳೆದ ಐದು ಪಂದ್ಯಗಳಲ್ಲಿ ತಲೈವಾಸ್ ತಂಡಕ್ಕೆ ಎದುರಾದ ಮೂರನೇ ಸೋಲು.
ಮೊದಲಾರ್ಧದಲ್ಲಿ 21 ರಿಂದ 12ರ ಮುನ್ನಡೆ ಗಳಿಸಿದ ಪಾಟ್ನಾ ಪೈರೇಟ್ಸ್ , ದ್ವಿತೀಯಾರ್ಧದಲ್ಲಿ ಅದೇ ಲಯದಿಂದ ಅಡಿ 31ರಿಂದ 12 ಅಂಕಗಳ ಮೇಲುಗೈ ಸಾಧಿಸಿತು. ಪೈರೇಟ್ಸ್ ತಂಡಕ್ಕೆ ಮೋನು ಗೊಯಟ್ 9 ಮತ್ತು ಪ್ರಶಾಂತ್ ಕುಮಾರ್ 8 ಅಂಕಗಳ ಕಾಣಿಕೆ ನೀಡಿದರು.+++
ಇಲ್ಲಿಯವರೆಗೆ ಆಡಿದ 12 ಪಂದ್ಯಗಳಲ್ಲಿ 8 ಜಯ, ಮೂರು ಸೋಲು ಹಾಗೂ ಒಂದು ಡ್ರಾ ದೊಂದಿಗೆ ಒಟ್ಟಾರೆ 45 ಅಂಕ ಕಲೆಹಾಕಿದ ಪಾಟ್ನಾ ಪೈರೇಟ್ಸ್ ತಂಡ ದಬಾಂಗ್ ದೆಹಲಿ (43 ಅಂಕ) ತಂಡವನ್ನು ತೃತೀಯ ಸ್ಥಾನಕ್ಕೆ ತಳ್ಳಿ 2ನೇ ಸ್ಥಾನ ಪಡೆದುಕೊಂಡಿತು. ಗೊತ್ತು 46 ಅಂಕ ಹೊಂದಿರುವ ಬೆಂಗಳೂರು ಬುಲ್ಸ್ ಅಗ್ರ ಸ್ಥಾನ ಪಡೆದುಕೊಂಡಿದೆ. ತಲೈವಾಸ್ ತಂಡ 34 ಅಂಕಗಳೊಂದಿಗೆ 10ನೇ ಸ್ಥಾನದಲ್ಲಿದೆ.