ಯೂಕ್ರೇನ್ ಮೇಲೆ ರಷ್ಯಾ ದಾಳಿ ಆರಂಭಿಸಿ ಎರಡು ತಿಂಗಳಾಗುತ್ತಿದೆ. ಫೆ.24ರಂದು ಈ ದಾಳಿ ಆರಂಭವಾದ ಬೆನ್ನಿಗೆ ರಷ್ಯಾದ ಮೇಲೆ ಪಾಶ್ಚಾತ್ಯ ರಾಷ್ಟ್ರಗಳು ನಿರ್ಬಂಧಗಳನ್ನು ಹೇರಲಾರಂಭಿಸಿದವು. ರಷ್ಯಾದ ವಾಣಿಜ್ಯ, ವ್ಯಾಪಾರ ಚಟುವಟಿಕೆ ಮತ್ತು ಬ್ಯಾಂಕಿಂಗ್ ಮೇಲೆ ಇದರ ಕರಿಛಾಯೆ ಬಿದ್ದು, ಆದಾಯಕ್ಕೆ ಹೊಡೆತ ಬಿದ್ದಿದೆ.
ಯೂಕ್ರೇನ್ ಮೇಲೆ ನಿರ್ದಿಷ್ಟ ಉದ್ದೇಶ ಇಟ್ಟುಕೊಂಡು ದಾಳಿ ನಡೆಸಿದ್ದು, ಅದು ಈಡೇರದ ಹೊರತು ಯುದ್ಧ ನಿಲ್ಲಿಸುವುದಿಲ್ಲ ಎಂದು ರಷ್ಯಾ ಸ್ಪಷ್ಟಪಡಿಸಿದೆ. ಈ ನಡುವೆ, ಪಾಶ್ಚಾತ್ಯ ರಾಷ್ಟ್ರಗಳು ಹೇರಿದ ನಿರ್ಬಂಧಗಳು ರಷ್ಯನ್ನರನ್ನು ಬಾಧಿಸಿದಂತೆಯೇ, ಇತರೆ ದೇಶಗಳ ಜನರನ್ನೂ ಬಾಧಿಸಿರುವುದು ವಾಸ್ತವ. ನಿರ್ಬಂಧಗಳ ಮೂಲಕ ರಷ್ಯಾವನ್ನು ಹಿಮ್ಮೆಟ್ಟಿಸಬಹುದು ಎಂಬ ಪಾಶ್ಚಾತ್ಯ ರಾಷ್ಟ್ರಗಳ ಚಿಂತನೆ ಫಲ ನೀಡುವಲ್ಲಿ ವಿಫಲವಾಗುತ್ತಿರುವುದು ಗೋಚರವಾಗಿದೆ.
ಸದ್ಯ ಜಗತ್ತಿನ ಅತಿಹೆಚ್ಚು ನಿರ್ಬಂಧಿತ ರಾಷ್ಟ್ರ ರಷ್ಯಾ ಆಗಿದ್ದು, 6,900ಕ್ಕೂ ಹೆಚ್ಚು ನಿರ್ಬಂಧಗಳನ್ನು ಎದುರಿಸುತ್ತಿದೆ. 40ಕ್ಕೂ ಹೆಚ್ಚು ದೇಶಗಳು ರಷ್ಯಾ ಮೇಲೆ ಮತ್ತು ಪ್ರಮುಖ ರಷ್ಯನ್ನರ ಮೇಲೆ ನಿರ್ಬಂಧ ಹೇರಿವೆ. ಇದು ರಷ್ಯಾದ ಆರ್ಥಿಕತೆ ಕುಸಿಯಲು ಕಾರಣವಾಗದಿದ್ದರೂ, ಒಂದಷ್ಟು ಹೊಡೆತ ನೀಡುವುದು ಖಚಿತ. ಜಗತ್ತಿನಾದ್ಯಂತ ಸಹ ಇದರ ವ್ಯತಿರಿಕ್ತ ಪರಿಣಾಮ ಆಗತೊಡಗಿದೆ.
ಯುದ್ಧ ಆರಂಭವಾಗುತ್ತಿದ್ದಂತೆ ಕಚ್ಚಾ ತೈಲ ದರ ಏರಿಕೆ ಕಂಡರೆ, ರಷ್ಯಾ ಕರೆನ್ಸಿ ರೂಬಲ್ ಮೌಲ್ಯ ಕುಸಿಯುತ್ತ ಸಾಗಿದೆ. ಫೆ.23 ಮತ್ತು ಮಾರ್ಚ್ 15ರ ನಡುವೆ ರೂಬಲ್ ಭಾರಿ ಕುಸಿತ ಕಂಡಿದೆ. ಆದಾಗ್ಯೂ, ರಷ್ಯಾದ ಕೇಂದ್ರೀಯ ಬ್ಯಾಂಕ್ ಮಧ್ಯಪ್ರವೇಶ ಮಾಡಿ ಪಾಲಿಸಿ ದರವನ್ನು ಶೇಕಡ 20ಕ್ಕೆ ಏರಿಸಿದಾಗ ನಾಟಕೀಯವಾಗಿ ಕರೆನ್ಸಿ ಬೆಲೆಯೂ ಏರಿತ್ತು. ಏಪ್ರಿಲ್ 7ಕ್ಕೆ ಮತ್ತೆ ಯುದ್ಧಪೂರ್ವದ ಸ್ಥಿತಿಗೆ ತಲುಪಿದೆ.
ರಷ್ಯಾ ಇಂಧನ ಸಂಪದ್ಭರಿತ ರಾಷ್ಟ್ರವಾಗಿದ್ದು, ವಿವಿಧ ದೇಶಗಳೊಂದಿಗೆ ರಷ್ಯಾದ ದ್ವಿಪಕ್ಷೀಯ ಸಂಬಂಧಗಳಿಗೆ ಇಂಧನವೇ ಮೂಲಾಧಾರವಾಗಿದೆ. ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ರಷ್ಯಾಕ್ಕೆ ದೊಡ್ಡ ಪಾಲಿದೆ. ಅಲ್ಲಿ ಉತ್ಪಾದನೆ ಯಾಗುವ ಅರ್ಧಕ್ಕಿಂತ ಹೆಚ್ಚು ಇಂಧನ ಯುರೋಪ್ಗೆ ರಫ್ತಾಗುತ್ತದೆ. 2030ಕ್ಕಿಂತ ಮುಂಚಿತವಾಗಿ ರಷ್ಯಾದಿಂದ ಇಂಧನ ಆಮದು ಮಾಡುವುದನ್ನು ನಿಲ್ಲಿಸಲಾಗದು. ಇದಕ್ಕೆ ಹೋಲಿಸಿದರೆ ಭಾರತ ಆಮದು ಮಾಡಿಕೊಳ್ಳುವ ಇಂಧನ ಪ್ರಮಾಣ ತುಂಬಾ ಕಡಿಮೆ. ಯುರೋಪ್ ಒಕ್ಕೂಟದಲ್ಲಿ ಈಗ ರಷ್ಯಾದಿಂದ ಇಂಧನ ಆಮದು ಕಡಿಮೆ ಮಾಡುವ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ.
ಯುದ್ಧದ ಪರಿಣಾಮ, ಭಾರತದಲ್ಲಿ ಮಾರ್ಚ್ ತಿಂಗಳ ಹಣದುಬ್ಬರ ಪ್ರಮಾಣ 17 ತಿಂಗಳ ಗರಿಷ್ಠ ಮಟ್ಟದಲ್ಲಿದೆ. ಚಿಲ್ಲರೆ ಹಣದುಬ್ಬರ ಶೇಕಡ 6.95 ಮತ್ತು ಸಗಟು ಹಣದುಬ್ಬರ ಶೇಕಡ 14.55 ಆಗಿದೆ. ಭಾರತದ ವಿದೇಶಿ ಮೀಸಲು ನಿಧಿ ಕೂಡ ಏ.8ರ ದತ್ತಾಂಶ ಪ್ರಕಾರ, 11.173 ಶತಕೋಟಿ ಡಾಲರ್ ಕುಸಿದು 606.475 ಶತಕೋಟಿ ಡಾಲರ್ಗೆ ತಲುಪಿದೆ. ವಾರದ ಅವಧಿಯಲ್ಲಿ ಅತ್ಯಧಿಕ ಕುಸಿತ ಮಾರ್ಚ್ 11ಕ್ಕೆ ಕೊನೆಗೊಂಡ ವಾರದಲ್ಲಿ 9.6 ಶತಕೋಟಿ ಡಾಲರ್ ಕುಸಿತ ದಾಖಲಾಗಿತ್ತು.
ಜಗತ್ತಿನಾದ್ಯಂತ ಜೀವನ ವೆಚ್ಚ ನಿರ್ವಹಣೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಹಣದುಬ್ಬರ ಏರಿಕೆ ಇದಕ್ಕೆ ಕಾರಣ. ಕೆಪಿಎಂಜಿಯ ಏಪ್ರಿಲ್ 1ರ ವರದಿ ಪ್ರಕಾರ, ಜಾಗತಿಕ ಹಣದುಬ್ಬರ ಪ್ರಮಾಣ ಈ ವರ್ಷ 4.5%ನಿಂದ 7.7% ತನಕ ಏರಿದೆ. 2023ರಲ್ಲಿ ಶೇಕಡ 2.9ರಿಂದ ಶೇಕಡ 4.3ರ ತನಕ ಏರಲಿದೆ. ಹಣದುಬ್ಬರ ಕೆಲವು ರಾಷ್ಟ್ರಗಳಲ್ಲಿ ಕಡಿಮೆ ಎಂದೆನಿಸಿದರೂ, ಅಲ್ಲಿ ದಶಕಗಳಲ್ಲೇ ಹೆಚ್ಚಿನ ಹಣದುಬ್ಬರ ದಾಖಲಾಗಿದೆ ಎಂದು ತಿಳಿದುಬಂದಿದೆ.
