ರೇಡರ್ ಗಳ ಪರಾಕ್ರಮ ಮತ್ತು ರಕ್ಷಣಾ ವಿಭಾಗದ ಸಂಘಟಿತ ಹೋರಾಟದಿಂದ ಮಿಂಚಿದ ದಬಾಂಗ್ ದೆಹಲಿ ತಂಡ ಪ್ರೊ ಕಬಡ್ಡಿ ಲೀಗ್ ನ 81ನೇ ಪಂದ್ಯದಲ್ಲಿ ಎದುರಾಳಿ ಗುಜರಾತ್ ಜಯಂಟ್ಸ್ ವಿರುದ್ಧ 41 ರಿಂದ 22 ಅಂಕಗಳ ಬೃಹತ್ ಅಂತರದ ಗೆಲುವು ಸಾಧಿಸಿತು.
ಬೆಂಗಳೂರಿನ ಶೆರಟಾನ್ ಹೋಟೆಲ್ ನಲ್ಲಿ ನಿನ್ನೆ ನಡೆದ ಪಂದ್ಯದಲ್ಲಿ ಆರಂಭದಿಂದಲೂ ಮೇಲುಗೈ ಸಾಧಿಸಿದ ದಬಾಂಗ್ ದೆಹಲಿ ತಂಡ ಸುಲಭ ಜಯ ಗಳಿಸಿತು.ಆದರೆ, ಎದುರಾಳಿ ಆಟಗಾರರ ಅಬ್ಬರದ ಆಟಕ್ಕೆ ಮಂಕಾದ ಗುಜರಾತ್ ತಂಡ ಸೋಲಿನ ಶರಣಾಯಿತು. ದೆಹಲಿ ತಂಡ ಈ ಗೆಲುವಿನೊಂದಿಗೆ 14 ಪಂದ್ಯಗಳಲ್ಲಿ ಒಟ್ಟಾರೆ 48 ಅಂಕಗಳಿಸಿ ಅಂಕಪಟ್ಟಿಯಲ್ಲಿ ಪ್ರಥಮ ಸ್ಥಾನ ಪಡೆದುಕೊಂಡಿತು.
ಪಂದ್ಯದ ಮೊದಲಾರ್ಧ ಮುಕ್ತಾಯಗೊಂಡಾಗ ದಬಾಂಗ್ ದೆಹಲಿ ತಂಡ 22 ರಿಂದ 11 ಅಂಕಗಳ ಮುನ್ನಡೆಯನ್ನು ಕಾಪಾಡಿಕೊಂಡು ಗೆಲುವಿನ ವಿಶ್ವಾಸ ಮೂಡಿಸಿತು. ಹಾಗೆ ದ್ವಿತೀಯಾರ್ಧದಲ್ಲೂ 19 ಅಂಕಗಳನ್ನು ತನ್ನದಾಗಿಸಿಕೊಳ್ಳುವ ಮೂಲಕ ಜಯಭೇರಿ ಬಾರಿಸಿತು. ಗುಜರಾತ್ ಜಯಂಟ್ಸ್ ತಂಡಕ್ಕೆ 11 ಅಂಕ ಮಾತ್ರ ಗಳಿಸಲು ಸಾಧ್ಯವಾಯಿತು.
ದಬಾಂಗ್ ದೆಹಲಿ ತಂಡದ ಪರ ವಿಜಯ್ 8, ಮಂಜಿತ್ ಚಿಲ್ಲರ್ 5, ಸಂದೀಪ್ ನರ್ವಾಲ್ 6, ಅಶೋಕ್ ಮಲಿಕ್ 6 ಮತ್ತು ಕೃಷ್ಣ 5 ಅಂಕಗಳನ್ನು ಗಳಿಸುವ ಮೂಲಕ ತಂಡದ ಗೆಲುವಿಗೆ ಕೊಡುಗೆ ನೀಡಿದ್ದಾರೆ.
ಗುಜರಾತ್ ಜಯಂಟ್ಸ್ ಪರ ಪ್ರದೀಪ್ ಕುಮಾರ್ 7 ಗರಿಷ್ಠ ಅಂಕ ಗಳಿಸಿದ್ದಾರೆ.